Рустам Карибов "Бубадин веси". Макьам: Майина Абдулмуталибова, гафар: Надим Абдулаев.

Бубадин веси.

Квез веси хьуй, чаз бубади лугьудай,
Лекьери хьиз чан багъиша хзандиз.
Чlуру кlвалах ийимир тlвар кьацlудай.
Вафалу хьухь жуван чlехи ватандиз.

Дуьз рехъ аваз уьленрайни вирерай,
Сирнав ийиз, квез экъечlиз кlан жемир.
Дар девирда техил кlватlиз чуьллерай,
Гишинбурун кьилел минтlикь хан жемир.

Гьикьван гьекьер кlвахьайтlани чандикай,
Гъиле кьунвай кlвалах кьилиз акъуда.
Гъери жедач кlеви хьайи тlандикай,
Мукьва-кьили, миресар квев агуда.

Лезги хуьрер машгьур ая дуьнедиз,
Чи адетар, чи къилихар чир хьурай.
Икрам ийиз хайи чилиз, Куьредиз,
Макандикай квез гьамиша пlир хьурай.

Инсаф мийир чилел атай душмандиз.
Бубадин кlвал, дидедин чlал рикlе хуьх.
Чара халкьдиз гьич къалурмир пашмандиз.
Зи гафарин мана куьне кьиле хуьх.

Н. Абдулаев