දරුවන්ට දිවා ආහාරය දෙන්න රජයෙන් ලබා දුන් හාල් ප්‍රමිතියෙන් තොරයි 🖥️1️⃣6️⃣0️⃣

දරුවන්ට දිවා ආහාරය දෙන්න රජයෙන් ලබා දුන් හාල් ප්‍රමිතියෙන් තොරයි - විපක්ෂ නායක සජිත් ප්‍රේමදාස මහතා

පසුගිය කාලයේ දරුවන්ගේ දිවා ආහාරය වෙනුවෙන් හාල් දෙන බවට ප්‍රවෘත්තියක් ගියත් මහජන සෞඛ්‍ය පරීක්ෂකවරුන්ගේ වෘත්තිය සමිති ප්‍රධානිය විසින් මෙම සහල්වලින් කොටසක් ප්‍රමිතියෙන් තොර කෘමී සහ සතුන් සිටින සහල් බවට හදුනා ගෙන ඇති බවත් ප්‍රමිතියෙන් යුක්ත සහල්වලින් දරුවන්ට කන්න දෙන්න බැරි ආණ්ඩුවක් රට ගොඩගන්නවා යැයි කීම විහිළුවක් බවත් විපක්ෂ නායකවරයා පැවසීය.

මේ රටේ සිදුවන සෑම දෙයක්ම ප්‍රමිතියෙන් යුතුව සිදුවිය යුතු බවත් දරුවන්ට දිවා ආහාරය දෙනවා කියා කෘමීන් සිටින සහල් ලබා දීම යුක්තිසහගත නොවන සාපරාධී ක්‍රියාවක් බවත් මේ වන විට මොවුන් බලය ලබා ගැනීමට විවිධ කුමන්ත්‍රණ සහ කුලල් කා ගැනීම් සිදුවන බවත් මේ හැමදේම කරන්නේ තමන්ගේ සුබසිද්ධිය උදෙසා බලය ලබා ගැනීමට මිස පාසල් 10126 දියුණු කිරිමට නොවන බවත් විපක්ෂ නායක සජිත් ප්‍රේමදාස මහතා පැවසීය.

විපක්ෂ නායක සජිත් ප්‍රේමදාස මහතා මේ බව කියා සිටියේ සක්වල සුහුරු පන්ති කාමර ලබා දීමේ වැඩසටහනේ 160 වැනි අදියර යටතේ අද හම්බන්තොට බෙලිඅත්ත ඉහළබෙලිගල්ල මහා විද්‍යාලයට රුපියල් ලක්ෂ 10ක් වටිනා සුහුරු පන්ති කාමරයක් ලබා දීමේ අවස්ථාවට එක්වෙමිනි. මෙම පාසලේ අමතර වියදම් වෙනුවෙන් පාසල් සංවර්ධන සමිතියට රුපියල් ලක්ෂයක මුදලක් ද පරිත්‍යාග කළේය.

විනයක් සහිතව රට පාලනය කරන්න බැරි නම් අපි ගෙදර යනවා

මේ සියල්ල දේශපාලන කුමන්ත්‍රණ බවත් මේ කුමන්ත්‍රණවලින් සිදුවන්නේ රට තවදුරටත් කඩා වැටීම බවත් මේ අදුරින් ආලෝකය කරා යාමට සමගි ජන බලවේගය කටයුතු කරන බවත් විනයක් සහිත රාජ්‍ය පාලනයක් ක්‍රියාත්මක කරන බවත් එසේ කරන්න බැරි නම් ඕනෑම අවස්ථාවක ගෙදර යාමට සූදානම් බවත් නිවැරදිව රට ගොඩනගන සැලසුම සමගි ජන බලවේගය සතු බවත් විපක්ෂ නායකවරයා පැවසීය.

නෙළුම් කුළුණ හදනවට වඩා සුහුරු පන්ති කාමර දෙන්න තිබුණා

ජනාධිපතිවරයෙක්, අගමැතිවරයෙක් සිටි දිස්ත්‍රික්කයක් වන හම්බන්තොට දිස්ත්‍රික්කයේ පාසල්වලට සුහුරු පන්ති කාමර නොමැති වුවත් නෙළුම් කුළුණක් සකස් කර ඇති බවත් මෙම නෙළුම් කුළුණ හදන්නේ නැතිව පාසල් පද්ධතියට සුහුරු පන්ති කාමර උපකරණ කීයක් දෙන්න පුළුවන්ද කියා සිතන ලෙසත් විපක්ෂ නායකවරයා පැවසීය.

නිදහස් අධ්‍යාපනයේ දෙවැනි විප්ලවය ක්‍රියාත්මක කරනවා

තවදුරටත් සිංහල පමණයි දමිළ පමණයි කියන බොරු රැවටිලිකාර වචනවලට හසු නොවී ශක්තිමත් ගමනක් යාමට නූතනවාදී අධ්‍යාපන ක්‍රමයක් වෙනුවෙන් එක්වන ලෙසත් විපක්ෂ නායකවරයා මෙහි දී පැවසීය. එසේම නව දැනුමින් සන්නද්ධ නොවීම දරුවන්ගේ වරද නොව ක්‍රමයේ, පාලකයන්ගේ සහ පාලකයන් පත් කරන වැඩිහිටියන්ගේ වරද බවත් අධ්‍යාපන ක්‍රමයත්, පාලකයන්ගේ දැක්මත්, දැක්මක් නොමැති පාලකයන් පත් කරපු දෙමාපියන් පවා වැරදි බවත් විපක්ෂ නායකවරයා පැවසීය.

තමා නිදහස් අධ්‍යාපනය පණටත් වඩා සුරකින නමුත් යල්පැන ගිය අධ්‍යාපනයෙන් දරුවන්ට සෙතක් නොවන නිසා නවීන නූතනවාදී නිදහස් අධ්‍යාපනයට මුල පිරිය යුතු බවත් කන්නන්ගර මැතිතුමාගේ නිදහස් අධ්‍යාපනයේ දෙවැනි විප්ලවය ක්‍රියාත්මක කිරීමට සූදානම් බවත් විපක්ෂ නායක සජිත් ප්‍රේමදාස මහතා පැවසීය.

මම පාසල්වලට බෙදන්නේ මත්කුඩු මත්පැන් නොවෙයි. පරිගණක

තමා පාසල්වලට මෙවැනි ප්‍රදාන සිදු කරන විට සජිත් ප්‍රේමදාස දන්නේ බෙදන්න යැයි චෝදනා කරන බවත් තමා කිසිදු අවස්ථාවක මත්ද්‍රව්‍ය, මත්පැන හෝ සිගරට් බෙදන්නේ නැති බවත් තමා බෙදන්නේ පරිගණක, ශබ්දකෝෂ ආදිය වුවත් කුහකයෝ කොට්ඨාසයක් මේ බෙදිල්ලට දිගින් දිගටම මඩ ප්‍රහාර එල්ල කරමින් සිටින බවත් විපක්ෂ නායකවරයා පැවසීය.

මම බෙදනවා කියලා චෝදනා කරන්නේ කාඩ්බෝඩ් සමාජවාදීන්

තමා බෙදනවා කියා චෝදනා කරමින් මඩ ප්‍රහාර එල්ල කරන කාඩ්බෝඩ් සමාජවාදීන්ගේ දරුවන් යන්නේ ජාත්‍යන්තර පාසල්, පෞද්ගලික පාසල් හා විශ්වවිද්‍යාවලට බවත් ඔවුන්ගේ දරුවන්ට ප්‍රමිතියෙන් ඉහළ අධ්‍යාපනයක් ලබා දෙන අතරතුර රටේ පාසල් දරුවන්ට ප්‍රමිතියෙන් පහළ අධ්‍යාපන ක්‍රමයක් ලබා දීමට කටයුතු කරන බවත් මේ සඳහා හේතු වී ඇත්තේ ඊර්ෂයාව සහ කුහකකම බවත් විපක්ෂ නායක සජිත් ප්‍රේමදාස මහතා පැවසීය.

කවුරු කුමන නමක් කිව්වත් මේ අධ්‍යාපන විප්ලවය අනිවාර්යෙන්ම ක්‍රියාත්මක කර මහපොළොවේ යථාර්ථයක් බවට පත් කරන බවත් මෙහෙම කියන විට දරුවන්, දෙමාපියන්, ගුරුවරු පවා පාරට බැස්සවිය හැකි බවත් පාසල් ගිණිතියපු මේ අයට දරුවන් පවා පාරට බැස්සවීම මහලොකු දෙයක් නොවන බවත් විපක්ෂ නායකවරයා මෙහි දී පැවසීය.

සමගි ජන බලවේගය විසින් ක්‍රියාත්මක කරන හුස්ම වැඩසටහන යටතේ මේ වන විට රෝහල් 57කට රුපියල් ලක්ෂ 1766ක් වටිනා ඖෂධ සහ රෝහල් උපකරණත්, සක්වල බස් රථ වැඩසටහන යටතේ පාසල් 87 ක් සඳහා රුපියල් ලක්ෂ 50ක් වටිනා බස් රථ 87ක් ලබා දී ඇති අතර ඒ සඳහා රුපියල් ලක්ෂ 4242ක් ද සක්වල තොරතුරු තාක්ෂණ වැඩසටහන යටතේ පාසල් 160 ක් සඳහා සුහුරු පන්ති කාමර උපකරණ ලබා දී ඇති අතර ඒ සඳහා රුපියල් ලක්ෂ 1749ක් වැය කර තිබේ.