Скачать или смотреть ထိုင်ဝမ်နားမှာ ဒုံးကျည်တွေ ဖြန့်ကျက်ထားမယ့်ကိစ္စ ဆက်လုပ်မယ်လို့ ဂျပန်အတည်ပြု| People's Spring

ထိုင်ဝမ်နားမှာ ဒုံးကျည်တွေ ဖြန့်ကျက်ထားမယ့်ကိစ္စ ဆက်လုပ်မယ်လို့ ဂျပန်အတည်ပြု

ထိုင်ဝမ်နိုင်ငံ ပိုင်နက်နားမှာ ဒုံးကျည်တွေ ဖြန့်ကျက်ထားမယ့် အစီအစဉ်ကို ပြောင်းလဲဖို့ မရှိကြောင်း ဂျပန် ကာကွယ်ရေး ဝန်ကြီးက ပြောပါတယ်။

ထိုင်ဝမ်နဲ့ ပတ်သက်လို့ ဂျပန် ဝန်ကြီးချုပ်ရဲ့ စကားတစ်ခွန်းကြောင့် တရုတ်-ဂျပန် ဆက်ဆံရေး တင်းမာမှုတွေ မြင့်တက်နေချိန်မှာ ကာကွယ်ရေး ဝန်ကြီး ရှင်ဂျီရို ကွိုင်ဇူမီက အခုလို ပြောဆိုခဲ့တာလည်း ဖြစ်ပါတယ်။

ထိုင်ဝမ်ပိုင်နက်နဲ့ နီးကပ်ရာ ဂျပန်တောင်ပိုင်းက ယိုနာဂူနီ ကျွန်းမှာရှိတဲ့ စစ်စခန်းကို နိုဝင်ဘာ ၂၃ ရက်နေ့က သွားရောက် စစ်ဆေးခဲ့တဲ့နောက် ကွိုင်ဇူမီက ဒုံးကျည်တွေ ဖြန့်ကျက်ထားမယ့် အစီအမံကို မူလ လျာထားတဲ့အတိုင်း ဆက်လက် အကောင်အထည် ဖော်နေတယ်လို့ မှတ်ချက်ပေးသွားခဲ့ပါတယ်။

ဒီအစီအစဉ်ကြောင့် ဒေသတွင်း တင်းမာမှုတွေ မြင့်တက်လာနိုင်တယ်ဆိုတဲ့ ထင်ကြေးမျိုးတွေက မမှန်ကန်ပါဘူးလို့လည်း သူက ဆိုပါတယ်။

ဂျပန်ဟာ ထိုင်ဝမ် အရှေ့ဖက် ကီလိုမီတာ ၁၁၀ လောက်သာ ကွာဝေးတဲ့ ယိုနာဂူနီ ကျွန်းပေါ်မှာ မြေပြင်ကနေ ဝေဟင် ပစ်ခတ်နိုင်တဲ့ တာလတ်ဒုံးကျည်တွေကို ဖြန့်ကျက်ဖို့ စီစဉ်နေပါတယ်။ ဒါဟာ နိုင်ငံတောင်ပိုင်း ကျွန်းစုတွေမှာ စစ်ရေးအင်အား ပိုမိုချဲ့ထွင် တည်ဆောက်မယ့် ဂျပန်ရဲ့ အစီအမံတွေထဲက အစိတ်အပိုင်း တစ်ခုလည်း ဖြစ်နိုင်ပါတယ်။

ယိုနာဂူနီ ကျွန်းဆီ မရောက်ခင်မှာ ဝန်ကြီးဟာ အီရှီကာဂီနဲ့ မီယာကို ကျွန်းတွေပေါ်က စစ်စခန်းတွေဆီ အရင်ဆုံး ဝင်ရောက် စစ်ဆေးခဲ့ပါသေးတယ်။ အီရှီကာဂီကျွန်းပေါ်က စစ်စခန်းမှာတော့ သင်္ဘောဖျက် ဒုံးကျည်တွေ အခြေစိုက်ထားပြီး မီယာကို စခန်းကတော့ လေကြောင်းထောက်လှမ်းရေး စခန်းတစ်ခုနဲ့ ခဲယမ်းမီးကျောက် သိုလှောင်ရုံတွေ ရှိနေပါတယ်။ ယိုနာဂူနီ ကျွန်းမှာ ပတ်ဝန်းကျင် ရေပြင်နဲ့ ဝေဟင် စစ်ရေးလှုပ်ရှားမှုတွေကို အချိန်ပြည့် စောင့်ကြည့် ထောက်လှမ်းနေတဲ့ ရေဒါစခန်း တစ်ခုလည်း တည်ရှိပါတယ်။ နောက်ပြီး ရန်သူ့ ဆက်သွယ်ရေး ကွန်ရက်တွေနဲ့ ပဲ့ထိန်း ဒုံးကျည်တွေကို ကြားဖြတ် နှောင့်ယှက် ဟန့်တားနိုင်မယ့် အီလက်ထရောနစ် စစ်ဆင်ရေး စခန်းတစ်ခုလည်း အဲဒီကျွန်းပေါ်မှာ ရှိနေပါတယ်။

ယိုနာဂူနီ ကျွန်းပေါ်မှာ ဒုံးကျည်တွေ ဖြန့်ကျက်ထားခြင်းက ဂျပန်ကို ပစ်မှတ်ထား တိုက်ခိုက်မှု တစ်ခုခု ဖြစ်ပေါ်လာနိုင်ခြေကို ဟန့်တား လျှော့ချပေးလိမ့်မယ်လို့ ကွိုင်ဇူမီက ဆိုပါတယ်။

နိုဝင်ဘာ ၇ ရက်နေ့တုန်းက ဂျပန် ဝန်ကြီးချုပ် စာနအဲ တကအိချိက တကယ်လို့ တရုတ်ကသာ ထိုင်ဝမ်ကို တိုက်ခိုက်ခဲ့မယ်ဆိုရင် ဂျပန်ကလည်း ထိုင်ဝမ်ကိုကူဖို့ တပ်တွေ စေလွှတ်မယ်လို့ ပြောကြားခဲ့ပြီး အဲဒီမှတ်ချက်အပေါ် တရုတ်က ခါးခါးသီးသီး ဝေဖန် တုံ့ပြန်မှုတွေကြောင့် အရှေ့အာရှ အင်အားကြီး နှစ်နိုင်ငံကြား ဆက်ဆံရေး တင်းမာနေပါတယ်။

ဂျပန်ဝန်ကြီးချုပ်ရဲ့ နုတ်ထွက်စကားကို ပြန်ရုပ်သိမ်းဖို့ တရုတ်က တောင်းဆိုနေပေမယ့် တကအိချိကတော့ ဒါဟာ အစိုးရရဲ့ အရင်ကတည်းက ရှိနှင့်ပြီးသား ရပ်တည်မှု ဖြစ်တာကြောင့် ပြင်စရာ မလိုဘူးလို့ ပြောပါတယ်။ ဒါကို မကျေနပ်လို့ တရုတ်က ဂျပန်ကို သံတမန်ရေး၊ ကုန်သွယ်ရေး၊ စီးပွားရေး နည်းလမ်းတွေနဲ့ ဖိအားပေးဖို့လည်း ကြိုးစားနေပါတယ်။

ဒီအတောအတွင်း ထိုင်ဝမ် သမ္မတ လိုင်ချင်တေးကတော့ တရုတ်နဲ့ ပြဿနာမှာ ဂျပန်ဖက်က အပြည့်အဝ ထောက်ခံကြောင်း ပြသတဲ့ အနေနဲ့ လူမှုကွန်ရက်ပေါ်မှာ ဂျပန်အစားအစာ ဆူရှီတွေ စားပြတဲ့ ဓာတ်ပုံကို တင်ထားခဲ့ပါတယ်။

𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴

  / subscribe  
𝗬𝗼𝘂𝗧𝘂𝗯𝗲 -    / @peoplespring  
𝗙𝗮𝗰𝗲𝗯𝗼𝗼𝗸 -   / ludunwayoo  
𝗪𝗲𝗯𝘀𝗶𝘁𝗲 - https://www.ludunwayoo.com/
𝗧𝗲𝗹𝗲𝗴𝗿𝗮𝗺 - https://t.me/peoplespring

#ludunwayoo #လူထုနွေဦး #PS #People*sSpring #myanmar #NewsMedia #media #politics #international #trending #new #update #info #newsfeed #dailynews #newsupdate #breakingnews #myanmarnews #updatenews #PSA