Скачать или смотреть പട്ടികവർഗ്ഗ വികസന വകുപ്പിന്റെ വിവിധ പദ്ധതികൾ/Programs of Scheduled Tribes Development Department

കേരളത്തിലെ പട്ടികവർഗ്ഗ വികസന വകുപ്പ് അനേകം പദ്ധതികളാണ് ആദിവാസികളുടെ ഉന്നമനത്തിനായി ആവിഷ്കരിച്ചു നടപ്പിലാക്കുന്നത്. ഓരോ വർഷവും കോടിക്കണക്കിന് രൂപയാണ് ഈ പദ്ധതികൾ നടപ്പിലാക്കുന്നതിന് സർക്കാർ ചിലവഴിക്കുന്നത്. പക്ഷേ, കേരളത്തിലെ പല ആദിവാസികൾക്കും സർക്കാരിന്റെ എല്ലാ പദ്ധതികളെക്കുറിച്ചും അറിവില്ല. അതിനാൽ ആദിവാസികൾക്കും ആദിവാസികളുടെ വികസനത്തിൽ താത്പര്യമുള്ള പൊതുജനങ്ങൾക്കും വേണ്ടിയാണ് ഈ വിഡിയോ തയ്യാറാക്കിയത്.

കേരളത്തിൽ മുപ്പത്തിയേഴോളം ആദിവാസി ഗോത്രവിഭാഗങ്ങളുണ്ട്. അവയിൽ അഞ്ചെണ്ണം കേന്ദ്ര സർക്കാരിന്റെ പ്രാക്തനവിഭാഗത്തിൽ (primitive tribes) ഉൾപ്പെടുന്നു. കേരളത്തിലെ ഓരോ ആദിവാസി ഗോത്രവിഭാഗവും മാനവ വികസനത്തിൽ വ്യത്യസ്തനിലകളിലാണുള്ളത്. സമൂഹികമായും സാമ്പത്തികമായും മുന്നേറാൻ കഴിഞ്ഞ ആദിവാസി ഗോത്രവിഭാഗങ്ങളുണ്ട്. അതേസമയം, കേരള വികസനത്തിൽ തികച്ചും പാർശ്വവത്കരിക്കപ്പെട്ട ഗോത്രവിഭാഗങ്ങളുമുണ്ട്. ഗോത്രവിഭാഗങ്ങൾ തമ്മിലുള്ള വികസനത്തിലെ ഈ അന്തരത്തിനുള്ള ഒരു പ്രധാന കാരണം സർക്കാർ പദ്ധതികൾ നടപ്പിലാക്കുമ്പോൾ ഓരോ ഗോത്രവിഭാഗങ്ങളുടെയും നിലവിലെ മാനവ വികസനത്തെ വേണ്ടത്ര പരിഗണിക്കുന്നില്ലെന്നതാണ്. വികസനത്തിൽ മുമ്പിൽ നിൽക്കുന്ന ആദിവാസികളാണ് സർക്കാർ പദ്ധതികളിലെ ഗുണഭോക്താക്കളിൽ അധികവുമെന്ന ഒരു ആക്ഷേപം നിലവിലുണ്ട്.

സർക്കാർ ജോലികളിൽ ആദിവാസികൾക്ക് സംവരണം ഏർപ്പെടുത്തുമ്പോൾ സാമൂഹികമായും സാമ്പത്തികമായും വളരെ പിന്നാക്കം നിൽക്കുന്നവർക്ക് മുന്തിയ പരിഗണന നൽകണമെന്ന ശക്തമായ ഒരു ആവശ്യം പല ആദിവാസി ഗോത്രവിഭാഗങ്ങൾക്കിടയിൽ ഇപ്പോൾ ഉണ്ടായിട്ടുണ്ട്. ഏതായാലും വിവിധ പദ്ധതികൾ നടപ്പിലാക്കുമ്പോൾ ഗുണഭോക്താക്കളുടെ നിലവിലെ മാനവ വികസനവും തൊഴിൽ താത്പര്യങ്ങളും പരിഗണിക്കുന്നത് ഗുണകരമാകുമെന്നാണ് സാമൂഹിക സാമ്പത്തിക ഗവേഷണ രംഗത്ത് പ്രവർത്തിക്കുന്ന വിദഗ്ധരുടെ അഭിപ്രായം.

അതോടൊപ്പം, സർക്കാരിന്റെ ഓരോ പദ്ധതികളുടേയും മേൻമകളും പോരായ്മകളും ശാസ്ത്രിയമായി പഠനവിധേയമാക്കേണ്ടതുണ്ട്. ഏതെല്ലാം പദ്ധതികളാണ് ആദിവാസികൾക്ക് ഗുണകരവും താത്പര്യവുമുള്ളത്? പദ്ധതികൾ ഗുണകരമാകുന്നത്, അല്ലെങ്കിൽ മോശമാകുന്നത് എന്ത് കൊണ്ടാണ്? നിലവിലെ പദ്ധതികളിലെ പോരായ്മകൾ ഇല്ലാതാക്കാൻ സർക്കാർ അടിയന്തരമായി എന്താണ് ചെയ്യേണ്ടത്? പദ്ധതികൾ നടപ്പിലാക്കുമ്പോൾ ഏത്രത്തോളം സുതാര്യതയും കാര്യക്ഷമതയും ഉണ്ട്? തുടങ്ങിയവ ആദിവാസി വികസനത്തിൽ പ്രസക്തമാണ്. ഈ സാഹചര്യത്തിൽ, കാലാകാലങ്ങളിൽ വിവിധ പദ്ധതികളിലെ ഗുണഭോക്താക്കളുടെ വിവരങ്ങൾ ശാസ്ത്രിയമായി ശേഖരിക്കുകയും അത് ഗവേഷകർക്കും നയരൂപികരണം ചെയ്യുന്നവർക്കും ലഭ്യമാക്കേണ്ടതുണ്ട്.

നിങ്ങളുടെ അഭിപ്രായങ്ങളും നിർദ്ദേശങ്ങളും പങ്കുവയ്ക്കുക
ഇ-മെയിൽ : [email protected]