Zəngəzur dəhlizi İranı niyə “yandırır”?

1 ay yarımdır ki, İranın yeni prezidenti var – Məsud Pezeşkian. Seçki günlərində azərbaycanlı olması ilə fəxr etdiyini deyirdi. İndi isə ondan səs çıxmır. İranda az qala hamı Azərbaycandan nəsə danışır, bircə Pezeşkiandan başqa. Hər halda prezident seçildiyindən bəri mən onun Azərbaycan haqqında mühüm nəsə dediyini eşitməmişəm. Pezeşkian hakimiyyətə gələndə Azərbaycanda bir ümid var idi. Tehran-Bakı münasibətləri əvvəlkindən daha yaxşı olacaq. Amma Pezeşkianın Cənubi Qafqaz ölkələrindən görüşdüyü ilk lider Paşinyan oldu. Məncə artıq şərhə ehtiyac yoxdur. Tehranın Bakıya münasibətində heç nə dəyişmədiyini yeni xarici işlər naziri də sübut edir. Abbas Əraqçi. 2020-ci ildə İran xarici işlər nazirinin müavini kimi Bakıya gəlmişdi. Ondan müsahibə alırdım. O zaman 44 günlük müharibə davam edirdi. Məlumatlar var idi ki, İran Ermənistana silah ötürür. Əraqçidən bunu soruşdum. Təbii ki, inkar etdi. Əslində isə İran elə o zaman da İrəvanı silahlandırırdı. Bu gün də İran üzərindən Ermənistana silah daşınır. Yəni İrəvanı yeni müharibəyə hazırlayanlardan biri də elə Tehrandır. Bir yandan silahlandırır, digər yandan sərhədlərin dəyişdirilməsini qırmızı xətt hesab edir. Abbas Əraqçidən indi müsahibə alsaydım, bu sualı verərdim: cənab Əraqçi, Ermənistan 30 ilə yaxın Azərbaycanın sərhədlərini dəyşdirəndə bu, İran üçün qırmızı xətt deyildi? Və ya Zəngəzur dəhlizi sizi niyə bu qədər narahat edir? Tehranda çox əmindirlər ki, Zəngəzur dəhlizi açılmayacaq. İran mediası onu xəyali dəhliz də adlandırır. İranda düşünürlər ki, Rusiyanınn Zəngəzur dəhlizi istəyi onların dostluğuna ziddir. Maraqlısı odur ki, Rusiya İranın bu bəyanatlarına reaksiya vermir. Görünür, Ukrayna məsələsində Tehranın dəstəyi Moskvanın dilini qısa edib. Bütün bunlar isə ən çox Ermənistanın ziyanınadır. Bitməyən Zəngəzur dəhlizi mübahisəsi, natamam sülh sazişi təklifi, mövqelərimizin tez-tez atəşə tutulması, separatçıların baş qaldırmaq sevdası. Sentyabrın 8-ci günüdür. Son 3 ilin sentyabrı Ermənistan üçün qara gəlib. Məşhur məsələ görə, atalar üçdən deyib. Amma görünür ermənilər üçün yox.

Bizi İzləyin:
Whatsapp: https://whatsapp.com/channel/0029Va8Q...
Facebook:   / ictimai.tv  
Instagram:   / ictimaitv.official  
Teleqram: https://t.me/tvictimai
Sayt: https://itv.az/

Copyright © İCTİMAİ TV

#itv #ictimaitv #video #televiziya #baku #videolar #sondakika #video #gündem #news #sondeqiqe #sondəqiqə #gündem #news #keşfet