តើលក្ខខណ្ឌអ្វីខ្លះដែលនាំឲ្យ Viroth’s Hotel របស់ខ្មែរជាប់លេខ១លើពិភពលោកប្រចាំឆ្នាំ២០១៨?

សៀមរាប៖ គេហទំព័រទេសចរណ៍ដ៏ល្បីល្បាញលើពិភពលោក TripAdvisor បានចេញផ្សាយតារាងចំណាត់ថ្នាក់សណ្ឋាគារកំពូលចំនួន២៥ដែលជាជម្រើសរបស់អ្នកធ្វើដំណើរ (Travelers Choice) ប្រចាំឆ្នាំ២០១៨។ សណ្ឋាគារ វិរតន៍ (Viroth’s Hotel) របស់ខ្មែរដែលមានទីតាំងនៅភូមិវត្តបូណ៌ ខេត្តសៀមរាប បានស្ថិតនៅចំណាត់ថ្នាក់លេខ១ ដោយនាំមុខសណ្ឋាគារនៅកូស្តារីកា ឥណ្ឌា វៀតណាម និងម៉ាល់ឌីវ។ ដើម្បីជ្រាបព័ត៌មានឲ្យច្បាស់ថា តើមូលហេតុអ្វីបានជាសណ្ឋាគារ វិរតន៍ ជាប់ចំណាត់ថ្នាក់លេខ១ប្រចាំពិភពលោកនោះ
ដឹកនាំដោយកូនខ្មែរ និងតាមរបៀបខ្មែរ, សណ្ឋាគារ វិរតន៍ (Viroth’s Hotel) របស់ខ្មែរទទួលបានចំណាត់ថ្នាក់លេខ១លើពិភពលោកប្រចាំឆ្នាំ២០១៨។ ចំណាត់ថ្នាក់នេះ បានធ្វើឲ្យលោក សាយ សុខរស់ នាយកគ្រប់គ្រងសណ្ឋាគារ វិរតន៍ (Viroth’s Hotel) រំភើបក្នុងចិត្ត ក្នុងនាមជាកូនខ្មែរដែលបានដឹកនាំសណ្ឋាគារខ្មែរឲ្យមានឈ្មោះបោះសំឡេងលើឆាកអន្តរជាតិ។
លោក សាយ សុខរស់ នាយកគ្រប់គ្រងសណ្ឋាគារ វិរតន៍ (Viroth’s Hotel) បានបញ្ជាក់ថា៖«រចនាបទខ្មែរ បរិស្ថានធម្មជាតិ សេវាកម្មល្អឥតខ្ចោះ ការតុបតែគ្រឿងសង្ហារិមខ្មែរបុរាណ គឺជាលក្ខខណ្ឌចាំបាច់ៗដែលជំរុញឲ្យសណ្ឋាគាររបស់លោកទទួលបានចំណាត់ថ្នាក់លេខ១លើពិភពលោក»។
សណ្ឋាគារ វិរតន៍ (Viroth’s Hotel) មាន៣៥បន្ទប់។ បន្ទប់សម្រាកអាចមានតម្លៃពីជាង១០០ដុល្លាររហូតដល់ជិត៤០០ដុល្លារអាមេរិក។ ជនជាតិអឺរ៉ុប, អាមេរិក, អូស្រ្តាលី និងជនជាតិអាស៊ី សុទ្ធតែចាប់អារម្មណ៍ និងឲ្យតម្លៃចំពោះសណ្ឋាគារ រវិរតន៍។ តែជាក់ស្តែង សណ្ឋាគារប្រណិតមួយនេះ មិនសូវទទួលបានភ្ញៀវអាស៊ីទេ ព្រោះ ភ្ញៀវអាស៊ីភាគច្រើន ច្រើនតែមានបំណងកក់បន្ទប់នៅនាទីចុងក្រោយ ហើយជារឿយៗ បន្ទប់ត្រូវបានគេកក់អស់រួចហើយ។ សម្រាប់ជនជាតិខ្មែរ, លោក សាយ សុខរស់ នាយកគ្រប់គ្រងសណ្ឋាគារ បានឲ្យដឹងថា មិនទាន់មានចំនួនច្រើនឡើយទេ។
តែទោះជាយ៉ាងណា សណ្ឋាគារ វិរតន៍ (Viroth’s Hotel) គឺជាជម្រើសដ៏ត្រឹមត្រូវសម្រាប់អតិថិជនខ្មែរ ព្រោះអ្វីៗសុទ្ធតែជារបស់ខ្មែរ រួមទាំងរបៀបដឹកនាំផង។ គ្រប់យ៉ាងជារបស់ខ្មែរ សម្រាប់បម្រើសេវាកម្មជូនជនបរទេស និងខ្មែរ៕

--------------------------------------------------------------------
ThmeyThmey News Social Media:

https://thmeythmey.com/
  / thmeythmey  
  / thmeythmeyvideonews  
  / thmeythmeynews  
  / thmeythmey