Скачать или смотреть ရိုဟင်ဂျာတွေ အတွက် နစ်နာကြေး ရလိုမှု အာဂျင်တီးနားတရားရုံးမှာ လျှောက်ထား - BBC News မြန်မာ

ရိုဟင်ဂျာတွေ အတွက် နစ်နာကြေး ရလိုမှု အာဂျင်တီးနားတရားရုံးမှာ လျှောက်ထား
ရိုဟင်ဂျာ ဂျီနိုဆိုက် အမှုမှာ ရှင်သန် ကျန်ရစ်သူတွေ အတွက် ပြန်လည် ကုစားမှု “Reparations” တွေ ရရှိနိုင်ရေး အတွက်လို့ ဆိုပြီး ယူကေ အခြေစိုက် ရိုဟင်ဂျာ အဖွဲ့ (BROUK ) ဟာ အာဂျင်တီးနား နိုင်ငံမြို့တော် ဘွေနိုဆိုင်းရပ်စ် (ဗျူနိုအေးရိစ်) မှာ ရှိတဲ့ တရားရုံးတော်ထံမှာ တရားမမှု လျှောက်ထားလိုက်ပါတယ်။

ဒါဟာ ရိုဟင်ဂျာ အရေးနဲ့ ပတ်သက်ပြီး အာဂျင်တီးနား နိုင်ငံထဲမှာ ဥပဒေကြောင်းအရ နောက်ထပ် ပုံစံ အသစ် တမျိုးနဲ့ လုပ်ဆောင်လာတာ ဖြစ်ပါတယ်။ အာဂျင်တီးနား ရုံးတော်ဟာ နိုင်ငံတကာ တရားစီရင်ပိုင်ခွင့် Universal jurisdiction ကို သုံးပြီး ၂၀၁၆ - ၁၇ နှစ် ကာလတွေမှာ ပေါ်ပေါက်ခဲ့တာတွေ အတွက် မြန်မာ အရပ်ဘက် စစ်ဘက် ခေါင်းဆောင်တွေကို နိုင်ငံတကာ ဖမ်းဝရမ်းတွေ ထုတ်ထားပြီး ဖြစ်ပါတယ်။

အခု လျှောက်ထားမှုမှာလည်း စစ်တပ်ရဲ့ ထိပ်ပိုင်းခေါင်းဆောင်တွေကို နာမည်တပ် ထားတယ်လို့ အမှု လျှောက်ထားတဲ့ BROUK အဖွဲ့ရဲ့ ဥက္ကဋ္ဌလည်းဖြစ်၊ အာရ်ကန် ရိုဟင်ဂျာ အမျိုးသားကောင်စီ ARNC ရဲ့ ဥက္ကဋ္ဌ လည်းဖြစ်တဲ့ ကိုထွန်းခင်က ဘီဘီစီကို ပြောပါတယ်။

ငွေကြေး ဘယ်လောက်တောင်းတာလဲ၊ လျှောက်ထားမှုမှာ တာဝန်ရှိသူတွေ အဖြစ် လူပုဂ္ဂိုလ် နာမည်တွေကို အတိတကျ တပ်ထားလား၊ ဖမ်းဝရမ်းကို အကောင်အထည် မဖော်နိုင်သေးတဲ့ အခြေအနေမှာ အခုလို နစ်နာကြေး အမှု ထပ်စွဲတာ အဓိပ္ပာယ် ရှိလား ... စတာတွေ သိရအောင် ကိုထွန်းခင်ကို ဘီဘီစီ သတင်းထောက် ကိုဝေဖြိုး ဆက်သွယ် မေးမြန်းထားပါတယ်။ #ဘီဘီစီမြန်မာပိုင်း