គ្រួសារខ្មែរក្រោម នៅខេត្តព្រះត្រពាំង ត្រូវ​អាជ្ញាធរយួនហាម​ឃាត់​មិន​ឲ្យ​ធ្វើ​បុណ្យ

ប្រជាពលរដ្ឋ​ខ្មែរក្រោមមួយគ្រួសារ នៅ​ខេត្ត​ព្រះត្រពាំង ចោទ​អាជ្ញាធរ​​ថា ​រារាំង​ពួកគាត់​មិន​ឲ្យ​ធ្វើ​បុណ្យទាន ។ ការ​ហាម​នោះ​ ធ្វើ​ឡើង​ គឺ​បន្ទាប់​គ្រួសារខ្មែរក្រោមនោះ គ្រោងនឹង​ប្រារព្ធ​ពិធី​បុណ្យ​ចម្រើនជន្មានយុជូនម្តាយរបស់ខ្លួន និងប្រារព្ធ​ពិធី​រំឭកខួបមួយឆ្នាំ ដែលរបបអាណានិគមយួន បានប្លន់យកដីកេរដូនតារបស់គាត់ផង ។

អាជ្ញាធរ​យួន នៅថ្នាក់មូលដ្ឋានប្រមាណជាង ១០ នាក់ បាន​ចុះ​មក​មើលដោយ​ផ្ទាល់ នៅទីតាំងផ្ទះរបស់គ្រួសាសារខ្មែរក្រោម ដែលកំពុងរៀបចំសង់រោងបុណ្យចម្រើនព្រះជន្មជូនម្តាយរបស់ពួកគាត់ នៅព្រឹក​ថ្ងៃ​ទី១០ ខែមិថុនា និងបានធ្វើ​កំណត់ហេតុ​ដោយមិន​អនុញ្ញាតឲ្យធ្វើពិធីនេះបានឡើយ។

លោក ថាច់ ញ៉ឹក នៅភូមិផ្នោលើ ឃុំដំបូកបី ស្រុកផ្នោដាច់ នៃ ខេត្តព្រះត្រពាំង អះអាង​ថា ទង្វើ​របស់អាជ្ញាធរ​យួនមាន​ចេតនា​បំបិទ​សិទ្ធិ​ពលរដ្ឋខ្មែរក្រោម ​មិន​ឲ្យ​គោរព​ប្រតិបត្តិ​ខាង​ជំនឿសាសនា។ លោក ថាច់ ញ៉ឹក បញ្ជាក់ថា ធ្លាប់​ធ្វើលិខិត​ស្នើសុំ​អនុញ្ញាត​ធ្វើ​ពិធី​បុណ្យ​ចម្រើនជន្មានយុជូនម្តាយរបស់លោកដែរ កាល​ពី​ថ្ងៃ​ទី​ ៤ ខែមិថុនា ហើយ​មេភូមិក៏បានអនុញ្ញាតដែរ​ តែតម្រូវឲ្យលោកត្រូវ​ឆ្លង​អាជ្ញាធរ​ឃុំ ក៏ប៉ុន្តែ​ ត្រូវ​បាន​​ផ្អឹប​ទុក​សំណើ​នោះ ត្រឹម​មេឃុំទៅវិញ ។

សូមបញ្ជាក់ថា កាលពីឆ្នាំ ២០២២ អាជ្ញាធរនៃរបបអាណានិគមយួន បានដាក់ពង្រាយកម្លាំងសមត្ថកិច្ចចម្រុះជាច្រើននាក់ បញ្ជាឱ្យគ្រឿងចក្រឈូសឆាយដី និងគាស់កកាយរំលោភបំពានសិទ្ធិលំនៅឋានរបស់លោក ថាច់ ញ៉ឹក ដែលជាម្ចាស់ដី ។ នៅក្នុងពេលជាមួយគ្នានោះ លោក ថាច់ ញ៉ឹក បានប្រកាសសុខចិត្តស្លាប់ នៅមុខកង់គ្រឿងចក្រឈូសឆាយដី ដោយមិនព្រមចាកចេញពីដីរបស់ខ្លួនជាដាច់ខាត ទើបអាជ្ញាធរ វៀតណាម ដកថយចេញពីដី ដែលកំពុងប្រឈមមុខដាក់គ្នា ។ លោក ថាច់ ញ៉ឹក បានអះអាងទៀតថា របបកុម្មុយនិស្តយួន ទើបតែមកបង្កើត និងចូលកាន់កាប់ទឹកដីកម្ពុជាក្រោម នៅថ្ងៃទី ៣០ ខែមេសា ឆ្នាំ ១៩៧៥ ទេ តែទឹកដីកេរដូនតារបស់គាត់ មានរាប់ពាន់ឆ្នាំមកហើយ មិនគួរណារបបនេះ មករំលោភបំពានប្លន់យកដីរបស់គាត់ដូច្នោះឡើយ ៕ អត្ថបទដោយ ស៊ឺន ចែងចើន | វីដេអូពីទំព័រហ្វេសប៊ុកលោក ថាច់ ញ៉ឹក

--គេហទំព័រ--
✓ សំឡេងកម្ពុជាក្រោម (VOKK)
👉 www.vokk.net
✓ សារព័ត៌មាន ព្រៃនគរ
👉 www.preynokornews.info
---------ទាក់ទង---------
👉 Tel: +1 (408) 7917556
👉 Email: [email protected]