Скачать или смотреть Thornaby (Roseberry Topping, Barbecue, Cycling) 29-30 May 2023

Kum 2023, May 29 (Thawhtanni)-ah Thornaby khaw kianga North Yorkshire tlang hmingthang pakhat Roseberry Topping an tih ‘lungtileng tlang’ kan lawn chhuak thung a. He tlang hi feet 1049 (meter 320) leka sang a ni a. Naupang tan pawh muangchanga lawn chhuah theih a nih avangin chhungkuaa len leh lawnna hmun lar tak a ni a. Kan kal ni pawh hian a pui a pang, a chiap a lapin kan tam tham hle mai a. A hlimawm phian mai. A tlang chhip atang chuan a chhehvel a lang thuiin a lang mawi hle mai a. Tlang chhipah chuang chhuak a, England thal ni eng lum nuam tak hnuaia thlifim thaw heuh heuh han hip a, mit tlin tawka inzar pharh tlang leh mual hring dup mai han thlir kual zet kha chuan lawn chhoh laia chauh leh hah zawng zawng a dam sawng sawng mai a, nawm namen lohvin a nuam a ni ber e. Tlai a lo thleng a, tlai ni nemah huanah meihawl thuk kan rem a. Sa hem hmin (barbecue) ruai kan han theh zui bawk a. Kan hlim leh nui thawm a ring a. Thenawmte tan pawh kan thikawm viau ta ve ang. Ni e, kan tlaiin kan puar a, kan hlimin kan lawm a ni.

Thornaby-ah Anauva te chhungkaw bulah hlimin nuam ti viau mah ila, Manchester pana kan haw ni tur May 30 (Thawhlehni) a lo thleng a. Kan hawnna tur rel chu zing dar 11:27 am-a chhuak tur a nih avangin Anauva nen cycle chuang turin breakfast ei khamin kan han chhuak leh hram a. Khaw thenawm pahnih tlawhin mel 10 zet chhukchhovah cycle kan chuang a. Vaphai leh Tahan kawng khawkrawk taka tunhma kum 15 chuang zet tawha ka lo tih than em em mah ni se la, tun tuma ka cycle chuang zet zawng ka chau chhe ngang mai! Kawng lakah chuang chhunzawm thei lo khawp erawh chuan ka che chhe bik lo va, a tihzia hlauh. Chau viau mah ila, ‘nuam’ erawh a tel tho si! Sim a hnehin, hun remchang nei ila, kha aia thui zawk leh chak zawka la chuan kha ka la chak tho mai. Pathian zarah chu hun remchang chu la inher chhuak hram teh se!

Helai North Yorkshire bawr vel, Middlesbrough, Whitby leh Durham chhehvel hi British tuipui khualzin hmingthang Captain James Cook-a tuallenna hmun a nih avangin a hming chawitu kawng, school leh hmun pawimawh tam tak a awm a. Hawina lam apiangah Captain Cook-a hming inziak hmuh tur a awm zel tih theih hial khawpin a hming an chawi lar hle. Captain Cook-a hi Pacific tuipui kana Australia leh New Zealand tlawh chhuaktu kha a ni a. Australia-a Queensland khawpuiah phei chuan ama hming chawia sak, university tha leh hmingthang tak, James Cook University a awm nghe nghe. British Lalram (Empire) zauhtu pawimawh tak a nih vangin a tuallenna hmuna mite hian an chhuang viau niin a lang a. Amaherawhchu, khawvel hun inher danglam zelah hian hmanlaia ram dang awp bettu Colonial lalram thiltih tha lo tak takte chhuikir a, chung lalram tana thawh hlawk tak mi pawimawhte chu chawimawi tur ni lovin ‘tihmualpho’ tur nia ngaihna (cancel culture) a lian chho zel a. Tunhnu rei lovah Captain Cook-a hming ngei pawh hi tihchhiat leh nawhreh duh pawl lo pung zelin a hming leh a limte lama tihbo a la ni ve mai ang em tih erawh ngaihtuahtham tak a ni ta.

Khawvelah hian kumhlun tur tumah kan awm lo va, hmingthanna leh hausaknate pawh hi rei lo te atan mai chauh an ni tih he Captain Cook-a tuallenna ram atang hian ka ngaihtuahnaah a lo lut a. Eng dinhmunah pawh ding ila, kan hmuh theih thilsiam mawi takte avanga hlimna changtu nih hi a hlu tak zet niin ka hria. Tun tuma hetianga kan thian Anauva te chhungkaw zara Siamtu kutchhuak mawi tak tak hmu thei leh a thatna nasa tak temtua kan tang hi nihlawhna ropui tak chu a va ni teh lul em ka ti a ni.