សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ចាត់លោកស្រីបណ្ឌិត អ៊ុក ម៉ាលី ដឹកនាំសហការី នាំយកទេយ្យ...

សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ចាត់លោកស្រីបណ្ឌិត អ៊ុក ម៉ាលី ដឹកនាំសហការី នាំយកទេយ្យវត្ថុប្រគេនព្រះសង្ឃ ២៣១អង្គ គង់នៅវត្តប្រជុំនទី​ ហៅវត្តក្រពើហា

(កណ្ដាល)៖ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជាកុលធីតាខ្មែរដ៏គំរូមួយរូប ទាំងក្នុងសកម្មភាពការងារមនុស្សធម៌ជួយដល់ជនងាយរងគ្រោះ និងងាយរងគ្រោះបំផុតនៅកម្ពុជា ហើយក៏ជាពុទ្ធសាសនិកមួយរូប ដែលតែងតែទ្រទ្រង់ព្រះពុទ្ធសាសនា ដែលជាសាសនារបស់រដ្ឋ, នៅព្រឹកថ្ងៃចន្ទ ៣កើត ខែអាសាឍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី៨ ខែកក្កដា ឆ្នាំ២០២៤នេះ បានចាត់លោកស្រីបណ្ឌិត អ៊ុក ម៉ាលី អគ្គហេរញ្ញិក​កាកបាទក្រហមកម្ពុជា​ ដឹកនាំសហការី អញ្ជើញបូជាទៀន ធូប ផ្កាភ្ញី ថ្វាយព្រះរតនត្រ័យ និងនាំយកទេយ្យវត្ថុ គ្រឿងអត្ថបរិក្ខារ និងបច្ច័យមួយចំនួន ទៅវេរប្រគេនចំពោះ ព្រះសិរីវិសុទ្ធិ បណ្ឌិត វ័ន្ត វណ្ណោ ព្រះរាជាគណៈកិត្តិយស ព្រះលេខាធិការគណខេត្តកណ្តាល នាយកពុទ្ធិកវិទ្យាល័យ ប៊ុន រ៉ានី ហ៊ុនសែន ក្រពើហា និងជាព្រះចៅអធិការវត្តប្រជុំនទី (ហៅក្រពើហា) ដែលស្ថិតនៅសង្កាត់ព្រែកឫស្សី ក្រុងតាខ្មៅ ខេត្តកណ្តាល។

ការចាត់តំណាងនាំយកទេយ្យវត្ថុ គ្រឿងអត្ថបរិក្ខារ និងបច្ច័យមួយចំនួន ប្រគេនដល់ព្រះសង្ឃគង់នៅប្រជុំនទី​ ហៅវត្តក្រពើហានេះ គឺតែងតែធ្វើជារៀងរាល់ឆ្នាំ ពិសេសនៅក្នុងរដូវវស្សាឈានចូលមកដល់នេះ ដែលជារដូវមួយដែលព្រះសង្ឃមិនអាចនិមន្តចេញទៅបិណ្ឌបាត្របាន ព្រោះរដូវវស្សានេះមានភ្លៀងធ្លាក់ជោគជាំ។ ​ជាងនេះទៅទៀត វត្តក្រពើហានេះ មានព្រះសង្ឃ និងសាមណសង្ឃជាច្រើនរយអង្គ កំពុងបំពេញវិជ្ជានៅពុទ្ធិកវិទ្យាល័យ ប៊ុន រ៉ានី ហ៊ុនសែន ដែលធ្វើឱ្យវត្ដអារាមមួយនេះ កាន់តែមានភាពអាត់តាខាត់។

ដូច្នេះនេះក្នុងឱកាសនេះ លោកស្រីបណ្ឌិត អ៊ុក ម៉ាលី តំណាងសម្ដេចកិត្ដិព្រឹទ្ធបណ្ឌិត​ ប៊ុន រ៉ានី ហ៊ុនសែន បាននាំយកនូវបច្ច័យចំនួន ៤០លានរៀល និងទេយ្យវត្ថុរួមមាន ទៀនព្រះវស្សា១គូ, អង្ករ ៥តោន, មី ៥០កេស, ត្រីខ ៥កេសធំ, ទឹកស៊ីអ៊ីវ ១០ឡូ, ទឹកត្រី ១០ឡូ, ទឹកក្រូច ១០កេស, ទឹកសណ្តែក ១០កេស, មៀនកំប៉ុង២កេស, ទឹកសុទ្ធអារុណា ១០កេស, ទឹកដោះគោខាប់ ២កេស, អូរវ៉ាន់ទីន ២កេស, ស្ករស ២៥គីឡូក្រាម, តែ ៥គីឡូក្រាម, ត្រីងៀត ១២គីឡូក្រាម, សាច់ក្រក ១២គីឡូក្រាម, ផ្លែឈើ ១កន្ត្រក ព្រមទាំងប្រគេនបច្ច័យព្រះចៅអធិការវត្ត ចំនួន ២លានរៀល, សម្រាប់ព្រះសង្ឃ៤អង្គទៀត បច្ច័យចំនួន ៥០ម៉ឺនរៀល និងសីលវ៍នសីវតី ២០នាក់ ម្នាក់ក្រណាតស១ដុំ ថវិកា២ម៉ឺនរៀល។

ក្នុងឱកាសនោះ លោកស្រីបណ្ឌិត អ៊ុក ម៉ាលី ក៏បានពាំនាំនូវប្រសាសន៍ផ្ដាំផ្ញើសួរសុខទុក្ខ និងការគិតគូរពីសុខុមាលភាពចំពោះព្រះសង្ឃគ្រប់ៗព្រះអង្គ។ ជាពិសេសបានថ្លែងកោតសរសើរនូវភាពជាអ្នកដឹកនាំ របស់ព្រះគ្រូចៅអធិការ​ និងព្រះសង្ឃ​ក្នុងវត្តក្រពើហា​ ដែលបានបណ្តុះបណ្តាលធនធានព្រះសង្ឃ​ ឱ្យក្លាយជាធនធានមនុស្សប្រកបដោយគុណវុឌ្ឍិ​ ស្របតាមយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលនីតិកាលទី៧​ នៃរដ្ឋសភា​ ក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រី ការកសាងមូលធនមនុស្ស ដែលជាចំណុចអាទិភាព។ លោកស្រីបណ្ឌិត ក៏បានប្រគេនពរដល់ព្រះសង្ឃ​គ្រប់ព្រះអង្គ​ សូមមានព្រះសុខភាពល្អបរិបូរណ៍​ ដើម្បីបន្តទ្រទ្រង់ព្រះពុទ្ធសាសនាឱ្យគង់វង្សតទៅ។

លោកស្រីបណ្ឌិត អ៊ុក ម៉ាលី ក៏​បានឱ្យដឹងទៀតថា វត្តក្រពើហា មិនត្រឹមតែជាទីគោរពសក្ការៈសម្រាប់ពុទ្ធបរិស័ទគ្រប់ទិសទីប៉ុណ្ណោះទេ ថែមទាំងជាថ្នាលបណ្តុះបណ្តាលពុទ្ធិដល់សាមណសង្ឃទាំងអស់ ពិសេសសាមណសង្ឃគង់ក្នុងវត្ដមានរហូតដល់ទៅ ២៣១អង្គ ដែលងាយរងនឹងការខ្វះខាតចង្ហាន់ និងការចំណាយផ្សេងៗលើការសិក្សារៀនសូត្រ ដូច្នេះហើយទើបសម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន បានគិតគូរបន្ថែមនូវការជួយឧបត្ថម្ភនូវបច្ច័យ និងទេយ្យវត្ថុ ដោយក្នុងមួយឆ្នាំ៣ដង ដោយឆ្នាំកន្លងៗទៅ គឺតែ២ដងប៉ុណ្ណោះក្នុងមួយឆ្នាំ។

ក្នុងឱកាសនោះ ព្រះចៅអធិការវត្ដប្រពើហារ ​ព្រះសិរីវិសុទ្ធិ បណ្ឌិត វ័ន្ត វណ្ណោ បានសម្ដែងនូវសប្បាយរីករាយយ៉ាងខ្លាំង និងបានថ្លែងអំណរគុណយ៉ាងជ្រាលជ្រៅចំពោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលតែងតែយកចិត្តទុកដាក់ គិតគូរពីសុខទុក្ខរបស់ប្រជាពលរដ្ឋ ពីសុខុមាលភាពរបស់ព្រះសង្ឃ និងតែងតែលើកទឹកចិត្ត ចូលរួមចំណែកលើកស្ទួយវិស័យព្រះពុទ្ធសាសនាឱ្យមានការរីកចម្រើន ហើយជាពិសេសតែងតែជួយសម្រាលការលំបាកដល់ព្រះសង្ឃដែលគង់នៅក្នុងវត្ត ក៏ដូចជាព្រះសង្ឃកំពុងបំពេញវិជ្ជានៅពុទ្ធិកបឋមសិក្សា ប៊ុន ស៊ាងលី និងពុទ្ធិកវិទ្យាល័យប៊ុន រ៉ានី ហ៊ុនសែន ក្រពើហា។

ព្រះចៅអធិការវត្ដប្រពើហារ បានមានសង្ឃថេរដីកាថា «ដោយនៅវត្ដយើងនេះមានព្រះសង្ឃរហូតដល់ទៅ ២៣១អង្គ គឺងាយប្រឈមនឹងការខ្វះខាតខ្លាំងណាស់ ហើយស្របស្ថានភាពបច្ចុប្បន្ននេះ សេដ្ឋកិច្ចមានការថយចុះទៀត ពុទ្ធបរិស័ទ ក៏ថមថយទៅតាមនឹង ដែលធ្វើឱ្យវត្ដអារាមយើងមានការពិបាកច្រើន ដោយគ្រាន់តែចង្ហាន់ក្នុងមួយថ្ងៃ ចំណាយអស់១លានរៀល (ក្នុងខែ៣០លានរៀល) ថ្លៃអគ្គិសនីសម្រាប់ប្រើប្រាស់ពេលសាមណសង្ឃសិក្សារៀនសូត្រ ក្នុងមួយខែ៨លានរៀល ដូច្នេះត្រូវការចំណាយប្រមាណ ១ម៉ឺនដុល្លារ ក្នុងមួយខែ។ ស្របពេលខ្វះខាតនេះ វត្ដមានរបស់សម្ដេចកិត្ដិព្រឹទ្ធបណ្ឌិត ប៊ុន​ រ៉ានី ហ៊ុនសែន ដែលមានទឹកចិត្ដជ្រះថ្លា និងបានលះបង់ទ្រព្យធនជាច្រើន ចិញ្ចឹមដល់ព្រះសង្ឃជួយឧបត្ថម្ភផ្គត់ផ្គង់បន្ថែមក្នុងមួយឆ្នាំ៣ដង អាត្មាពិតជាត្រេកអរសប្បាយចិត្ដណាស់ កាយវិការមនុស្សធម៌របស់សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន ពិតជាបានជួយដល់ព្រះសង្ឃមែនប្រាកដ ពិសេសសម្រាប់សាមណសង្ឃដែលគង់សិក្សារៀនសូត្រ»។

ជាមួយគ្នានេះ ព្រះសិរីវិសុទ្ធិ បណ្ឌិត វ័ន្ត វណ្ណោ ក៏បានជូនពរសព្ទសាធុការដល់ សម្តេចកិត្តិព្រឹទ្ធបណ្ឌិត និងសម្តេចតេជោ ហ៊ុន សែន ព្រមទាំងបុត្រាបុត្រី ចៅប្រុស ចៅស្រី សូមជួបប្រទះតែនឹងព្រះពុទ្ធពរទាំងបួនប្រការ គឺ អាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ។

ទន្ទឹមនឹងនេះ ព្រះសិរីវិសុទ្ធិ បណ្ឌិត វ័ន្ត វណ្ណោ សូមឧទ្ទិសមហាកុសលផលបុណ្យនាថ្ងៃនេះ ជូនចំពោះដួងវិញ្ញាណក្ខន្ធលោកមហាឧបាសក លីន គ្រី និងអ្នកឧកញ៉ា ព្រឹទ្ធមហាឧបាសិកា ធម្មញ្ញាណវិវឌ្ឍនា ប៊ុន ស៊ាងលី ដែលជាបិតា មាតាបង្កើតរបស់សម្ដេចកិត្តិព្រឹទ្ធបណ្ឌិត ប៊ុន រ៉ានី ព្រមទាំង វិញ្ញាណក្ខន្ធអ្នកឧកញ៉ាមហាភក្តី សប្បុរិសភោគាធិបតី ហ៊ុន នាង និងលោកយាយមហាឧបាសិកា ឌី ប៉ុក ដែលជាបិតា មាតាបង្កើតរបស់សម្តេចតេជោ ហ៊ុនសែន...