Уус-Тааттаҕа 14 улуустан ааттаах-суоллаах хапсаҕайдьыттар мустан, бастыҥы быһаарыстылар

Официальный сайт NVK-ONLINE.RU - Бу өрөбүл күннэргэ республикабыт ааттаах-суоллаах хапсаҕайдьыттара Таатта улууһун Уус-Таатта бөһүөлэгэр муһуннулар, бастыҥы быһаарыстылар. Геннадий Ананьевич Попов сырдык кэриэһигэр ыытыллар күрэхтэһии сэттис төгүлүн ыытылынна.

Геннадий Попов сырдык аатын үйэтитэр күрэхтэһии сыл ахсын таһыма үрдээн иһэр. Быйыл республикабыт 14 улууһуттан барыта 70 кыттааччы кэлбит.

Үтүө майгыҥ-көтөр кынатын диэн маны этэн эрдэхтэрэ. Кылгас, ол гынан баран чаҕылхай олоҕу олорбут Геннадий Ананьевич Попов үөрэппит оҕолоро Николай Мурзин уонна Денис Данилов бэйэлэрэ бу күрэхтэһиини иилээн-саҕалаан сэттис төгүлүн тэрийдилэр. Улахан дьоҥҥо бары ыйааһын кыайыылаахтарыгар саа бириис туруорбуттар.

Оҕолор икки ардыларыгар муҥутуур кыайыылааҕы быһаарар киирсиигэ Уус-Таатта ыччата Петя Беляев уонна Чөркөөхтөн төрүттээх Чурапчы спорт оскуолатын иитиллээччитэ Албан Аввакумов көбүөргэ таҕыстылар. Эдэр бөҕөстөр сымсалара бэрт буолан, көрүөх бэтэрээ өттүгэр бырахсыбыттарын кыайан быһаарбакка, иккистээн киириһиннэрдилэр. Бу сырыыга Албан Аввакумов эрэллээхтик кыайда.

70 киилэҕэ диэри «Аан Дархан» анал ааты Дьокуускай куораттан Ньургун Бугулов ылла. Оттон улахан ыйааһыҥҥа кыайыылааҕы быһаарар хапсыһыыга Үөһээ Бүлүү эр бэртэрэ Платон Саввинов уонна Увар Тимофеев таҕыстылар. Көрөөччүлэр бары да кэриэтэ кыайыа диэн сабаҕалаабыт бөҕөстөрө Увар Тимофеев «Аан Дархан» ааты эрэллээхтик сүктэ уонна убаһанан наҕараадаланна.