شيلة إقلاعييية | ازبن على الله | أداء شبل الدواسر كلمات الشاعر عبدالله الجعيداني ( حصرياً ) 2020

مهداه إلى الشيخ /
ماجد مقعد الدجراني العصيمي

كلمات الشاعر /
عبدالله الجعيداني العصيمي

المنشد /
شبل الدواسر

تصميم /
سعود

سناب المصمم ✅. ⁩

  / s3o.ii  

١___١___١___١___١___١___١___١_


الأبيات

جت تدحم بنت الافكار وتجوب الديار
تسابق اللي ترسيها جناحينها
من مده ودها تشيل عنها الخمار
من كبرياها يغار الزين من زينها
من روحي الها ثلاث ايام ليل ، ونهار
وانا اخبط النار واطير شياطينها
والفكره اللي مافيه غطرسه وابتكار
الله يفرق مابين الهاجس وبينها
قريحة الشعر مبنيّه على الانبهار
والباذخه ينصر الله ديني ودينها
وانا لا عيّنت طيب صاب راسي طيار
يا كم قصيدة غزل كسرت روتينها
لو ان قلبي من الاشواق فيه نفجار
جينات الابطال تنتش راسي بجينها
يا بري حالي بخليها على الانتظار
مثل ما خليت كبدي فوق سكينها
حق القصيده على الاعلام بس انتشار
وروس الرياجيل انا اترجم قوانينها
وجه الحقيقي حقيقي ماهو بمستعار
ماله شغل فالوجيه وفي تلاوينها
والنظره الثاقبه توخذ بعين اعتبار
تكشف لك ابعاد خلق الله وتكوينها
اهل الحلوق العريضه والعلوم الكثار
ودك تشيل الجناجر من حناحينها
مير المهم القصيده من طوال العمار
معصبٍ راسها ومكحلٍ عينها
في شيخٍ اليا زبنته من ظروفك مجار
اضربه المعضله وتصير ياهوينها
يا ماجد الصيت والمعروف اخذته جهار
المرجله من شرايينك شرايينها
ماتغبش الا على طاله ومركاض حار
مركاض جدك على نجد وسراحينها
مسرف جمايل ياماجد وفي كبار وصغار
اسمك حفرته على نجد وضلاعينها
انشهد انك بعيرٍ لا حدم فالغمار
هبدتك روس العرب ماهوم بغاوينها
دجران قلط لـ بووك المجد ، وابوك نار
عطاك حملٍ ثقيل وقمت من حينها
وابوك وخوانك اللي صيتهم فالمدار
دواسة الموت وام جنيب وقرينها
الراس يقدح سطر والعين تقدح شرار
ما فيه طالة فعول الا معدينها
اي والله انكم معازيب العلوم الكبار
الارض كورة دجر وانتم دجارينها
يا مقصرين الطوال ، مطولين القصار
يا ركن برقا ويا مركا حمارينها
مقطمين المحازم دون سهج العشار
اللي لا برقت فيها قلت يازينها
سهاف الخدود العراض منشعات الفقار
من دونها القوم طشرتوا مصارينها
من روس لابة عتيبه محتمين البكار
قبيلةٍ تصنع التاريخ بيدينها
المجد لو فيه يالعتبان بس احتكار
كان " المراجل " تخلينا سلاطينها
لكن لنا مع " طحاطيح القبايل " قرار
و اول قراراتنا نجد و ميادينها
صلنا وجلنا واخذنا نجد هاك النهار
ومن يوم هاك النهار نخامس يمينها
ابك القبيله قبيلة مرجله بختصار
ازبن على الله ثم ازبن في دواوينها

الشاعر .. عبدالله الجعيداني