Скачать или смотреть ស្ពានបេតុងឆ្លងស្ទឹងជីក្រែង ខេត្ដសៀមរាប ប្រវែងជាង៤០ម៉ែត្រ ត្រូវបានបើកការដ្ឋានសាងសង់

ស្ពានបេតុងឆ្លងស្ទឹងជីក្រែង ខេត្ដសៀមរាប ប្រវែងជាង៤០ម៉ែត្រ ត្រូវបានបើកការដ្ឋានសាងសង់ដើម្បីបម្រើការធ្វើចរាចរណ៍ដល់ប្រជាពលរដ្ឋ

ក្រសួងអភិវឌ្ឍន៍ជនបទ និងអាជ្ញាធរខេត្ដសៀមរាប នៅថ្ងៃទី២៤ ខែកុម្ភៈ ឆ្នាំ២០២៦នេះ បានចាប់ផ្ដើមរៀបចំបើកការដ្ឋានសាងសង់ស្ពានបេតុងឆ្លងស្ទឹងមួយកន្លែង ប្រវែងជា៤០ម៉ែត្រ ស្ថិតឃុំជីក្រែង ស្រុកជីក្រែង ខេត្ដសៀមរាប ដើម្បីងាយស្រួលឱ្យប្រជាពលរដ្ឋធ្វើចរាចរណ៍និងដឹកជញ្ជូនទំនិញកសិផលផ្សេងៗ បន្ទាប់ពីបានរងការខូចខាត ដែលការបើកការដ្ឋាននេះ អនុវត្តដោយនាយកដ្ឋានវិស្វកម្មក្រសួងការពារជាតិ ប្រើប្រាសថវិកាជាតិ។

ឯកឧត្ដម ជី ស៊ីថា រដ្ឋលេខាធិការក្រសួងអភិវឌ្ឍន៍ជនបទ មានប្រសាសន៍ថា ការបើកការដ្ឋាននេះ ដើម្បីសាងសង់ស្ពានបេតុង១កន្លែងនេះ មានប្រវែង៤៥ម៉ែត្រ ទទឹង ៨ម៉ែត្រ ផ្លូវបេតុងសងខាង ក្បាលស្ពានម្ខាងៗប្រវែង ៣០ម៉ែត្រ និងស្ថាបនាផ្លូវបេតុងចំនួន១ខ្សែ ប្រវែង ៦០០ម៉ែត្រ ទទឹង៥ម៉ែត្រ ភ្ជាប់ពីភូមិព្រីង ទៅភូមិតារាម ឃុំជីក្រែង ស្រុកជីក្រែង ខេត្តសៀមរាប ក្នុងគម្រោងលេខ DRR-NC-2026-No.047។

ឯកឧត្ដមមានប្រសាសន៍បន្តថា ដើម្បីរួមចំណែកអនុវត្តយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលកម្ពុជា ក្រសួងអភិវឌ្ឍន៍ជនបទបានដាក់ចេញនូវគោលនយោបាយជាតិ ស្តីពីការអភិវឌ្ឍជនបទ ឆ្នាំ២០២៥-២០៣៥ ដោយបានកំណត់ចក្ខុវិស័យ «កសាងសង្គមជនបទកម្ពុជាឱ្យមាន វិបុលភាពប្រកបដោយបរិយាបន្ន និងចីរភាព ទាំងផ្នែកសេដ្ឋកិច្ច សង្គមកិច្ច និងវប្បធម៌» ដែលមានគោលដៅចម្បងចំនួន៥ គឺប្រជាជនមានជីវភាពរស់នៅសមរម្យ មានសុខភាពមាំមួន រស់នៅក្នុងភាពថ្លៃថ្នូរ និងគ្រប់ភូមិឋានទាំងអស់នៅតំបន់ជនបទមានហេដ្ឋារចនាសម្ព័ន្ធខ្វាត់ខ្វែងប្រកបដោយភាពធន់ និងគ្រប់ភូមិឋានទាំងអស់នៅជនបទមានអភិបាលកិច្ចល្អ។ ជាពិសេសយុទ្ធសាស្រ្តគន្លឹះចំនួន៥ គឺយុទ្ធសាស្ត្រការអភិវឌ្ឍហេដ្ឋារចនាសម្ព័ន្ធរូបវន្ត និងគមនាគមន៍ជនបទប្រកបដោយភាពធន់, ការកែលម្អលក្ខខណ្ឌនៃការរស់នៅរបស់ប្រជាជននៅ តំបន់ជនបទ, ការអភិវឌ្ឍសហគមន៍ជនបទ និងចលនាភូមិគំរូ, ពិពិធកម្មសេដ្ឋកិច្ចជនបទ និងនវានុវត្តន៍ការងារ និងការពង្រឹងស្ថាប័ន។

ឯកឧត្ដមរដ្ឋលេខាធិការ ក៏បានអំពាវនាវដល់គ្រប់ស្ថាប័នពាក់ព័ន្ធ ប្រជាពលរដ្ឋសូមជួយបង្កភាពងាយស្រួលគ្រប់លក្ខណៈសម្បត្តិ ដើម្បីឱ្យការស្ថាបនាផ្លូវនិងស្ពាននេះបានប្រព្រឹត្តទៅដោយរលូន និងជោគជ័យ ហើយអធ្យាស្រ័យចំពោះរាល់ផលប៉ះពាល់ដែលកើតមានឡើងដោយសារការស្ថាបនា និងសូមចូលរួមថែរក្សាការពារ ទប់ស្កាត់ការដឹកជញ្ជូនទំនិញលើសកម្រិតកំណត់នៅពេលដែលផ្លូវ និងស្ពាននេះបានស្ថាបនារួច ដើម្បីប្រើប្រាស់បានយូរអង្វែង។

បើតាមអាជ្ញាធរមូលដ្ឋានឃុំជីក្រែង បានឱ្យដឹងថា ស្ពានឆ្លងស្ទឹងជីក្រែង កសាងឡើងជាស្ពានឈើដោយព្រះចៅអធិការវត្តស្លែង ព្រះនាម កែវ ផេង នៅឆ្នាំ១៩៧៩ ប៉ុន្ដែបានចាស់ទ្រុឌទ្រោមនៅឆ្នាំ២០០៧ និងកសាងឡើងវិញទួលទួលបានការគាំទ្រឧបត្ថម្ភរបស់ ឯកឧត្តម សៀង ណាំ តំណាងរាស្ត្រមណ្ឌលសៀមរាប បានដឹកនាំកសាងស្ពានថ្មថ្មីវិញ ដើម្បីបងប្អូនធ្វើដំណើរឆ្លងកាត់។ ប៉ុន្តែនៅក្នុងឆ្នាំ២០២២ ត្រូវបានឡានដឹកថ្មធុនធ្ងន់បានឆ្លងកាត់ក៏បណ្តាលឱ្យស្ពានបាក់ដាច់ខូចខាតទាំងស្រុង ទើបអាជ្ញាធរស្នើសុំរាជរដ្ឋាភិបាលស្ថាបនាថ្មីឡើងវិញ៕

អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ