Скачать или смотреть အမှတ်စဉ်-၁ စိတ်ပိုင်း-၁ (ပါဠိစာလုံးဆင့် ဖတ်နည်း နှင့် ရတနာသုံးပါး ရှိခိုးခြင်း)

ပါဠိစာလုံးဆင့် ဖတ်နည်း

၁။ နှစ်လုံးဆင့်မှာ၊ အထက်သာ၊ သတ်ပါမြဲဧကန်။
၂။ သဝေလည်းထိုး၊ တ-သတ်မျိုး၊ ဖတ်ရိုး စ-သတ်သံ။
၃။ သဝေလည်းထိုး၊ န-သတ်မျိုး၊ ဖတ်ရိုး င-သတ်သံ။
၄။ သဝေရေးချ၊ သတ်မြင်က၊ မှတ်ကြ ၀-ဆွဲသံ။
၅။ ဟ-ထိုး ၀ဆွဲ၊ ရရစ် ယပင့်၊ တွေ့လျင်းက၊ နှစ်၀တာဝန်၊ ကျေပွန်စေရန်၊ အသံအသတ်၊ ယူမြဲမှတ်။

၁။ နှစ်လုံးဆင့်မှာ၊ အထက်သာ၊ သတ်ပါမြဲဧကန်။
အက္ခရာနှစ်လုံးဆင့်တွေ့လျှင် အပေါ်တွင်ရှိသော အထက်အက္ခရာကို အသတ်တင်၍ ဖတ်ရမည်။
ဥပမာ = သောမနဿ = သောမနသ်သ (သောမနတ်သ)
ဒုက္ခ = ဒုက်ခ
သင်္ခါရ = သင်ခါရ
သမန္တာ = သမန်တာ
စက္ကဝါဠေသု = စက်ကဝါဠေသု
ဂစ္ဆန္တု = ဂစ်ဆန်တု
အညမည = အဉ်ညမဉ်ည (အင်ညမင်ည)

၂။ သဝေလည်းထိုး၊ တ-သတ်မျိုး၊ ဖတ်ရိုး စ-သတ်သံ။
သဝေထိုးနှင့်တွဲသော တ-သတ်ကို စ-သတ် အသံထွက်၍ ဖတ်ရမည်။
(က, ဂ, ပ-သတ်များလည်း နည်းတူပင်)
ဥပမာ = မေတ္တာ = မေတ်တာ (မစ်တာ)
ခေတ္တ = ခေတ်တ (ခစ်တ)
ဩဘာသေတွာ = ဩဘာသေတ်တွာ (အောဘာသစ်တွာ)
လောကဇေဋ္ဌံ = လောကဇေဋ်ဌံ (လောကဇစ်ထံ)
ဥပေက္ခာ = ဥပေက်ခါ (ဥပစ်ခါ)
သေက္ခ = သေက်ခ (သစ်ခ)
ဖေဂ္ဂု = ဖေဂ်ဂု (ဖစ်ဂု)

၃။ သဝေလည်းထိုး၊ န-သတ်မျိုး၊ ဖတ်ရိုး င-သတ်သံ။
သဝေထိုးနှင့်တွဲသော န-သတ်ကို င-သတ် အသံထွက်၍ ဖတ်ရမည်။
ဥပမာ = ပူရေန္တံ = ပူရေန်တံ (ပူရင်တံ)
ဝိနာသမေန္တု = ဝိနာသမေန်တု (ဝိနာသမင်တု)

၄။ သဝေ ရေးချ၊ သတ်မြင်က၊ မှတ်ကြ ၀-ဆွဲသံ။
သဝေထိုးရေးချကို ၀-ဆွဲ အသံထွက်၍ ဖတ်ရမည်။
ဥပမာ = ဟောန္တု = ဟောန်တု (ဟွန်တု)
သောတ္ထိ = သောတ်ထိ (သွတ်ထိ)
ပေါဋ္ဌိလ = ပေါဋ်ဌိလ (ပွတ်ဌိလ)

၅။ ဟ-ထိုး ၀ဆွဲ၊ ရရစ် ယပင့်၊ တွေ့လျင်းက၊ နှစ်၀တာဝန်၊ ကျေပွန်စေရန်၊ အသံ-အသတ်၊ ယူမြဲမှတ်။
ဟထိုးနှင့်တွဲသော မ-အက္ခရာသည် အသတ်တာဝန်ကိုလည်း ယူရသည်၊ မိမိ၏ မူလဗျည်း အသံလည်း ထွက်ရသည်။ အသတ်နှင့် အသံတာဝန်နှစ်မျိုးကို ယူရသည်။
ဥပမာ = အမှ = အမ်မှ
တုမှ = တုမ်မှ

၀ဆွဲနှင့်တွဲသော တ-အက္ခရာသည် အသတ်တာဝန်ကိုလည်း ယူရသည်၊ မိမိ၏ မူလဗျည်းအသံလည်း ထွက်ရသည်။ အသတ်နှင့် အသံတာဝန်နှစ်မျိုးကို ယူရသည်။
ဥပမာ = ကတွာ = ကတ်တွာ
ဟုတွာ = ဟုတ်တွာ

ရရင့်ပုံစံ = အတြ = အတ်တရ
တတြ = တတ်တရ

ယပင့်ပုံစံ = သကျ = သက်ကျ
နိယျာနိကံ = နိန်ယာနိကံ

မှတ်ချက်။ ။“ဥပ္ပဇ္ဇေယျ”စသော ကြိယာပုဒ်များကို အထက်ပါအတိုင်း အသံမထွက်ရပါ။ “ဥပ္ပဇ္ဇေယျ = ဥပ်ပစ်ဇေယျ”ဟုသာ အသံထွက်ရမည်။

ကျမ်းပြုဆရာတော် အရှင်အနုရုဒ္ဓါမထေရ်၏ ရတနတ္တယ ပဏာမနှင့် ပဋိညာဉ်

သမ္မာသမ္ဗုဒ္ဓမတုလံ၊ သသဒ္ဓမ္မဂဏုတ္တမံ။
အဘိဝါဒိယ ဘာသိဿံ၊ အဘိဓမ္မတ္ထသင်္ဂဟံ။

အဘိဓမ္မတ္ထသင်္ဂဟကျမ်းဟူသည် -
အဘိဓမ္မာဒေသနာတော်၏ အလွန်ကျယ်ဝန်းသော အနက်အဓိပ္ပာယ်တို့ကို အကျဉ်းချုံး၍ (အနှစ်ချုပ်၍) ပြသောကျမ်း ဖြစ်သည်။
အဘိဓမ္မတ္ထသင်္ဂဟံ-၌
အဘိဓမ္မအရ- ဓမ္မသင်္ဂဏီစသော အဘိဓမ္မာ(၇)ကျမ်းကို ရ၏။
အဘိဓမ္မတ္ထအရ- စိတ်+စေတသိက်+ရုပ်+နိဗ္ဗာန်+ပညတ်တရားတို့ကို ရ၏။
အဘိဓမ္မတ္ထသင်္ဂဟအရ- အဘိဓမ္မတ္ထသင်္ဂဟကျမ်း (သင်္ဂြိုဟ်ကျမ်း)ကို ရ၏။
အဘိဓမ္မာဟူသည် -
သုတ္တန်တရားထက် သာလွန် ထူးခြားသည့် တရားဖြစ်သောကြောင့် အဘိဓမ္မာ(ဓမ္မထူး, ဓမ္မလွန်)ဟုခေါ်သည်။

အဘိဓမ္မာ (၇)ကျမ်း -
၁။ ဓမ္မသင်္ဂဏီကျမ်း၊
၂။ ဝိဘင်းကျမ်း၊
၃။ ဓာတုကထာကျမ်း၊
၄။ ပုဂ္ဂလပညတ်ကျမ်း၊
၅။ ကထာ၀တ္ထုကျမ်း၊
၆။ ယမိုက်ကျမ်း၊
၇။ ပဋ္ဌာန်းကျမ်း။