Скачать или смотреть บทสู่ขวัญนักเรียนชั้น ป.6 จบการศึกษา โดยพ่อพราหมณ์เอกราช บุญอาจ

บทสู่ขวัญนักเรียนจบชั้นป.6 #เอกราช บุญอาจ
ศรี ๆ มื้อนี้แม่นวันดี วันดิถีอมุตโชค โตกนี้หากแม่นโตกไม้จันทน์ ขันใบนี้หากแม่นขันไม้แก้ว ครูอาจารย์ตกแต่งแล้วจึงยอมา ด้วยศรัทธาในมื้อนี้ เพื่อบายศรีมงคลดีศรีวิเศษ ปรารภเหตุแห่งลูกศิษย์ชั้นประถมศึกษาปีที่ ๖ ขอยอยกเอาคุณพระศรีรัตนตรัยและสิ่งศักดิ์สิทธิ์ทั้งหลาย ที่ปวงชนได้กราบไหว้ ขอจงได้เสด็จด่วนลงมา ขออาราธนาบูชาฤกษ์เบิกชัยมงคล ลาภผลอันประเสริฐ เปิดทั้ง๔ทิศ โปรดประสิทธิชัย ให้ลูกศิษย์ของครูทั้งหลายเหล่านี้ ขอจงได้สมดังปรารถนา ความเมตตา กรุณาให้ตั้งต่อ ให้น้อยหน่อกัลยาณี เปรียบบุตราบุตรตรีของครูในมื้อนี้ ขอจงสวัสดีมีชัยไปหน้า ให้ล้ำค่าแห่งสาธุชน จงเป็นผลแผ่สร้าง ได้กล่าวอ้างเป็นศิษย์มีครู เป็นฤดูจบการศึกษา.มาบัดนี้เพิ่นจึงไปอาราธนาอาจารย์เจ้าผู้ฉลาด มานั่งอาสน์เอิ้นเชิญขวัญ เชิญขวัญขึ้นเสมอจอมปราสาท เชิญขวัญขึ้นเสมอธาตุศรีจันทน์ มื้อนี้แม่นมื้อสันต์ วันนี้แม่นวันดี วันดิถีอมุตโชค สิทธิโชคพร้อมลัคณา ตามตำรากล่าวไว้ ว่าแม่นมื้อมหาชัย ทำสิ่งใด๋กะลุลาภได้สมดังใจปอง มื้อฉลองความสำเร็จยินดี ให้แก่ลูกศิษย์ทั้งหลาย วันนี้แม่นวันดีข่อยจักเชิญเอาศรีน้อยอ่อน ว่อน ๆเว้าเอาเจ้าเข้าสู่คีง เจ้าอย่าตีงอย่าตื่นอย่าท้วง อย่าได้ไปป่วงทางไกล ให้เจ้ามาเร็วไววันนี้อย่าช้า..เจ้าอย่าได้เมื่อยล้าลี้ซ่อนทางใด๋ มื้อนี้แม่นมื้อมหาชัย มื้อสดใสนักเรียนแล้วหนา มื้อคองท่าความสำเร็จ ได้เบ็ดเสร็จทุกกระบวนท่า จบประถมศึกษาปีที่ ๖ ยกมาเด้อทุกห้อง ได้สมปองทุกฝ่าย ทั้งหญิงชายแล้วบัดนี้สำเร็จแล้วว่าทุกคน ได้มรรคผลมาแล้วทุกวิชาปัญญายิ่ง ภาษาไทยกะยอดยิ่ง ประวิงไว้แม่นบ่ลืม วัฒนธรรมปลาบปลื้ม สังคมนิยมซ่า ศาสนากะว่านั้นสำคัญแท้ได้แน่ใจ คณิตศาสตร์นั้นกะได้หลักคิดตรรกะ บวกลบคูณหารบ่ลดละ ทุกประเด็นได้เรียนรู้ ทั้งได้ดู ทั้งได้เล่น ทั้งได้เห็นทั้งได้คิด วิทยาศาสตร์นั้นกะได้สอนให้เกิดผล ศิลปะมากล้น สอนคนให้ฮู้ฮ่อม ครูถนอมกล่อมเจ้า แลงเช้าอยู่บ่วาย มีทั้งฮ้ายทั้งจ่มคอยแนะ บ่อยากแตะดอกเด้อคำหากแม่นทำดีแล้ว แต่มีแนวบางครั้ง การกระทำมันบ่แม่น ครูหนักใจเหลือแสน ลูกศิษย์เอ้ยยามเจ้ารั้น พลันฟ้าวค่อยติง ความเป็นครูบ่อาจนิ่งเหลียวหลิ่งดูดาย เปรียบคือลูกหญิงชายบ่ให้สายเกินแก้ ต้องดูแลกันเอาไว้ลูกนักเรียนเข้าใจบ่ ครูเปรียบพ่อแม่เจ้า จาเว้าอย่าลื่นความ รวม ๖ ปีแล้วได้ลูกศิษย์ใหญ่โตมา จบตำราบทเรียนแห่งประถมแล้วเด้อเจ้า เฮาอย่าเผลอเด้อหล่า เอิ้นขวัญมาอย่าช้าอยู่ เจ้าอย่าได้อูดอู้หาเล่นอยู่หว่างใด๋ ถ้าได้ยินเสียงนี้ให้เร็วไวได้มาสู่ มาทุกหมู่ ทุกคน ทุกตนเด้อลูกหล่า ครานี้ให้ด่วนมา.ว่ามาเยอขวัญเอย.
ขวัญเจ้าไปอยู่ก้ำหนแห่งทางใด๋ ขวัญเจ้าไปทัศนศึกษา ให้ด่วนมาอย่าช้า ขวัญเจ้าเป็นคนกล้า แข่งกีฬาอยู่ใสแหน่ เจ้าอย่ายืนแท้แล้มาแม้อย่าอยู่นาน..ว่ามาเยอขวัญเอย.
ขวัญเจ้าไปเที่ยวเล่นยามเว็นพักเที่ยง ไปนอนเถียงท่งข้าว ไวฟ้าวให้ด่วนมา เชียร์กีฬาวันนั้นบนอัฒจันทร์เจ้าได้ม่วน เชิญเอาขวัญหมู่เจ้า ให้มาเข้าสู่คีง..ว่ามาเยอขวัญเอย..แข่งทักษะมื้อนั้นคนสำคัญจำได้บ่ ทำสุดฝีมือนั้นก็กะขอให้แม่นต่าวมา ขวัญแข้งให้เจ้ามาอยู่แข้งลีลา ขวัญขาให้เจ้ามาอยู่ขาลีล่าย ขวัญแขนขวาแขนซ้ายกะให้มาเต้ามาโฮม ทั้งขวัญนมและขวัญคาง ขวัญเอวบางกลมกิ่ว ขวัญท้องน้อยและฮาวนม ขวัญผมดำดูอาจ ขวัญปากต้านเจรจา ทั้งขวัญตาและขวัญคิ้ว ขวัญนิ้วและขวัญแขน ขวัญขาแพนหลังไหล่ ละใหม่นั้นแม่นขวัญหู ก็ให้มาสามื้อนี้วันนี้..ว่ามาเยอขวัญเอย.มานำทางคนท่อง มานำป่องคนเทียวมากินข้าวต้มและของหวาน มากินน้ำตาลและน้ำอ้อย หมอเฒ่าเอิ้นจ้อย ๆ ขวัญน้อยให้ต่าวมา ว่ามาเยอขวัญเอย..ศรี ๆ มื้อนี้แม่นมื้อดี ศรี ๆ มื้อนี้แม่นมื้อมั่น มั่นให้เจ้ามั่นยิ่งกว่าก้อนผาแอ่น มั่นให้เจ้ามั่นยิ่งกว่าแท่นพระจวงพระจันทร์ มั่นให้เจ้ามั่นยิ่งกว่าเครือเขาหลวงไกรลาศ มั่นให้เจ้ามั่นยิ่งกว่าอากาศและตะวัน มั่นให้เจ้ามั่นยิ่งกว่าพระจันทร์ใสส่องแจ้ง มั่นให้เจ้ามั่นยิ่งกว่าเขากวางยามเดือนสี่ มั่นให้เจ้ามั่นยิ่งกว่าเสากี่ลูกสาวพญาแถน พญาพรหมฟากฟ้า.ขวัญเจ้ามาฮอดแล้วให้มาอยู่เนื้อในคีง ใหญ่เพียงอย่าได้หัก ใหญ่เพียงหลักอย่าได้โค่น อย่าได้หม่นเหมือนตอง อย่าได้หมองเหมือนเถ้า อย่าได้เฒ่าเก่าเสียศรี ให้เจ้ามีอายุมั่นขวัญยืนฮ้อยขวบพันวัสสา จำเริญหน้าอยู่สวัสดี..ว่ามาเยอขวัญเอย.เออ ครันแม่นขวัญมาแล้ว ฟังคำพราหมณ์สิสอนสั่ง ยังพิธีมื้อนี้ผองเจ้าให้จื๋อเอา..เป็นศิษย์นี้ให้มีครูมันจั่งแม่น แสนสิดีเลิศล้ำไปหน้าจั่งแม่นคอง มองเบิ่งเด้อคำเว้าคำจาภาษาม่วน สิ่งบ่ควรเจ้าอย่าได้ แถลงเว้าสิเก่าศรี กตัญญูกตเวทีเป็นที่ตั้งเครื่องหมายของคนดี ถ้าเจ้ามียามใด๋ ตอบแทนอย่ารอช้า มีศรัทธาเพียรล้ำ บำเพ็ญอย่าได้ละ วิริยะ อุตสาหะเข้าไว้ไปหน้าสิเจริญ...คนสรรเสริญยอย่องประคองสติอยู่ทุกเมื่อ เจ้าอย่าเบื่อแท้ ๆ เรียนรู้แม่นต่อไป ให้ใส่ใจเอาไว้จิตตะมันจั่งแม่น วิมังสาแข่น ๆทวนไว้อยู่บ่เซา เฮาต้องไปเรียนรู้มัธยมต้องสู้ต่อ สิอยากเป็นคุณหมอ แพทย์พยาบาล ทหารตำรวจ ครูอาจารย์ พ่อค้า ลูกหล่าอย่าได้ถอย พ่อแม่คอยอยู่บ้านคอยส่งกำลังใจ หมดท่อได๋หมดกันลูกเอ้ยบ่มีท้อ ขอแต่ลูกนี้ได้ตัดสินใจให้แน่วแน่ สายสามัญหรือสายอาชีพกะบ่แพ้ ขอให้พร่ำเพียร หน้าที่เรียนตอนยังน้อยคอยรับผลตอนเจ้าใหญ่ เจ้าสิได้สบายมีวิชาพร้อมแล้ว สิพาได้พึ่งตน สิเป็นคนสูงค่ามีปัญญาเกิดก่อ ให้เจ้าได้เรียนต่อสมกับพ่อแม่เจ้าตายายเฒ่าได้ห่วงหา..วาสนาของเจ้าลูกศิษย์เอ้ย ให้จำจื๋อ คนซ่าลือจ้น ๆ ไปหน้าสิว่าดี เอาหละน้อมื้อนี้ขวัญเอ้ยทุกหมู่เหล่า เชิญเด้อขวัญหมู่เจ้าคราวนี้ให้ต่าวมา.ว่ามาเยอขวัญเอย.เออ..คันแม่นขวัญมาแล้ว พราหมณ์สิเหล่าแถมพร ตัดเอาตอนคาถาแม่นดีเหลือล้น ขอทุกคนทุกท่านรับเอารีบด่วนประมวลพรส่งให้ผองเจ้าให้รับเอาเด้อ..สิทธิการิยะตะถาคะโต สิทธิลาโภนิรันตะรัง สิทธิเตโช ไชโยนิจจัง สิทธิปัญโญ นะโมพุทธายะ นะมะพะทะ ภะวันตุเต
โทร0918325641