أولاد حاج الماحي - قالوا الشَّامِي حَادَا وَقفّا - نظم الشيخ حاج الماحي عليه رحمة الله

تسجيلات قناة سودانية 24

الشَّامِي حَادَا وَقفّا

قالُوا الشَّامِي حَادَا وقَّفَا وعبّا اليوم قدَم بي زفَّه
يامولاي عبدَك تعْفَا مُحتاج ليكَ رافعَ الكَفَّا
عرِّفو بيكَ غاية العِرفَه حُسنَ الخاتمه يوم إتوفَّا
ثنِّيت بي شفيع الوقفه يومَ الطَّامَّه يومَ الرَّجْفَه
حرَّ النَّار نَبِيكم يَطفَا جاهُو يعِم لي صَاحبَ السَّفَّه
لِيل مِيلادُو قالت الشَّفَّا مختُوناً نظيف ومُصَفَّا
بقَّ النُّور عّمَايِد رفَّا شُفنَا الصِّين بسمح الطَّرفا
فَاح من جِسمُو طِيباً يَخفَا للأرياح صِنفاً بصِنفَا
جبريل شالُو ضمَّا وحفَّ كونُو طهُور طهُور من نُطفه
طابُّو الكون وقلِبنا إندفَّا والاسلام ثَقِيلُن خفَّا
الكفَّارِ لِهفَت لهفَه حطب النَّار قُلاَل العِرفه
قلبَك بالحِلِم والرأفَه للمجرم شِفَاياً تَعف
باليَرضِيك إلهَك وفَّي سارَّه قَلِبنا نِعمَه لَسَوفا
مسَّك للمرِيض بِيَشفَا درَّر لي أمَّ معبَد عَجفَه
جَابِر جِيشُو بالصَّاع كفَّا حلَّ المالِحات بالتَّفَّه
نِعمَه اسيادِي عُوقن صفَّه سَامُوا الرُّوح وحرَتُو الكّفَّا
سيفُن بالضَّرِب ما جَفَّا الزُّول والحُصان فَدْ قَضفَة
الكَرَّار علي الماب يلفَا غَزْ في الريشَه حالِف حلفَه
الطِّير في وِلاد الغَلفَا إلَّا من الكُبود يِتكفَا
اليومَ الرجَال في زفَّه عجلَانين عَمُودُن قَفَّا
فوق دربَ الرَّسول تِتهفَّا حجُّوا وزَاروا أخذُوا الغَرفَه
حِين الدُّنيا تَلوِي الدَّفَّه رمشَه عِين تَلِفَّاك لَفَّه
شُوف يا نَاسي بعدَ العِفه ترقُد في قِبيرَك قِرفَه
ياشاربَ الخَمُر قُول تُفَّه أطرَا الهُول نَهارَ الوَقفه
من امَّك وابُوك تِتنَفَّا تهرُب من قَرِيبك تَجفا
يا سيدي الرَّسُول لي تَعفَا بِي اخوَاني لَا وَد ترفَه
السَّبَّابه وأهَل الحِرفَه فُزنَا مَبَدِّرين في الزَّفه
قالَ الماحي فيَّ الخِفَّه في حالة شَبَابِي مَغَفَّا
مَعَلُوم حالِي فُوقي السُّلفَه ألطُف بيَّ يا ذا الُّلطفَا
الصَّلا والسلام بالألفَا بِي عدَدَ الجُبَال لِلعَرفَا
تَملاَ الكُون وتَسرِف سَرفَه للمعصُوم وأمِين مزدلْفَه