عطوك عين وخذا الله ياكريمه منك عينين - سلطان الوسمي - شاعر المليون الموسم العاشر مرحلة 48

(سمية) الغيم يشبهك المطر ساعة تمرّين
غزير بالماء ، مثل ما انتي بطهر الماء غزيره

اكتبك بالشعر وافخر واتعزوى وارتفع لين
اطاول النجم والارض تغدي تحتي صغيره

من اربع سنين كل الناس بعيونك مساجين
حتى المدى بعد شوفك مالقى احدٍ يستثيره

من كثر ماردد لسانك على الراس وعلى العين
طال المرض راسك ، وعينك غدت عقبه ضريره

عطوك عين ، وخذا الله ياكريمه منك عينين
ما كنك الا تغضين البصر حشمه و غِيره

من (مسني الضُر) لين ( اذا مرضت فهوَ يشفين)
يغشاك الايمان بالله والقدر شره و خيره

لازالت مرايتك تحفظ بهاك و تعرفك زين
لو مرت وجيه ، وجهك عندها مافيه غيره

حفظتي المصحف بقلبك لو انك ما تشوفين
وهذا هو الفرق بين اعمى البصر .. واعمى البصيره

ماكان وقتك (فراغ) ولا حياتك (بين قوسين)
ابعدتي الشوف .. يوم الناس نظرتهم قصيرة

على صراط الصبر كنتي سريعه يوم تمشين
حتى وصلتي لفردوس الرضا عن زمهريره

في جنة عيونك الناس آمنين و مطمئنين
لا خوف فيها ولا حسره ولا للحِسْد سيره

ما تعلم النفس ما اخفي لها من قرة العين
ارتاحي لحكم ربك .. و اهني و نامي قريره