Скачать или смотреть ယင်းမာပင် PDF ကို ကျပ်ဘီလီယံချီတန်ဖိုးရှိ မူးယစ်ဆေးဝါးတွေနဲ့ ဟားခါးမှာဖမ်းမိ | MAWKUN

ယင်းမာပင်ခရိုင်တပ်ရင်းမှူးလက်မှတ်နဲ့ ကျပ်ဘီလီယံချီတန်ဖိုးရှိ မူးယစ်ဆေးဝါးသယ်လာတဲ့ ယာဉ်တန်းကို ချင်းတော်လှန်ရေးတပ်ဖမ်းဆီး

ရန်ကုန်- ၂၀၂၅ ဇူလိုင် ၁၀ (မော်ကွန်း)

တော်လှန်ရေးတပ်ဖွဲ့တစ်ဖွဲ့ဖြစ်တဲ့ စစ်ကိုင်းတိုင်း၊ ယင်းမာပင်ခရိုင်၊ အမှတ်(၁၅)တပ်ရင်းမှူး ထောက်ခံစာနဲ့အတူ ရဲဘော်တချို့ လုံခြုံရေးလိုက်ပါလာတဲ့ မူးယစ်ဆေးဝါးမှောင်ခိုကားတန်းကိုဖမ်းပြီး ပစ္စည်းတွေကို မီးရှိုဖျက်ဆီးလိုက်တယ်လို့ ချင်းကာကွယ်ရေးတပ်-ဟားခါး(CDF-Hakha) က ဒီနေ့ သတင်းထုတ်ပြန်ပါတယ်။

ကာလတန်ဖိုး ကျပ်ဘီလီယံများစွာတန်ဖိုးရှိတဲ့ စိတ်ကြွဆေးပြားသုံးသန်းနဲ့ ဘိန်းဖြူ ၁၁၀ ကီလိုဂရမ် ကျော်ကို သယ်ဆောင်လာခဲ့တာဖြစ်ပြီး ဟားခါးနဲ့ ဖလမ်းမြို့နယ်စပ်က ဗားရ်တံတားအနီး ဟားခါးမြို့နယ်ထဲမှာ ဒီလ ၈ ရက်က ဖမ်းမိခဲ့တာပါ။

ဟိုင်းလတ်ကားတစ်စီး၊ တရုတ်လုပ် ဖော်လန်းအမျိုးအစားကုန်ကားတစ်စီးနဲ့အတူ မောင်းပြန်သေနတ်နှစ်လက်၊ တော်လှန်ရေး ရဲဘော်သုံးဦး၊ ယာဉ်မောင်းနဲ့ယာဉ်နောက်လိုက်တွေကို ထိန်းသိမ်းနိုင်ခဲ့ပေမယ့် သယ်ယူပို့ဆောင်ရေး တာဝန်ခံ မောင်ဇော်လတ်(ခ) ဦးဝင်းမော် နဲ့ ကိုပုတီး (ခ) ဦးကျော်မင်းဇော်တို့ နှစ်ဦးကတော့ ထွက်ပြေးလွတ်မြောက်သွားတယ်လို့ ဖော်ပြပါတယ်။

ဖမ်းမိ မူးယစ်ဆေးဝါးတွေကို မနေ့တုန်းက မီးရှို့ဖျက်ဆီးလိုက်ပြီး သူတို့ ထိန်းချုပ်ဒေသအတွင်းမှာ မူးယစ်ဆေးဝါး သယ်ဆောင်တာတွေ၊ သုံးစွဲတာတွေတွေ့ရင် ထိရောက်စွာအရေးယူမယ်လို့ CDF-Hakha က သတိပေးပါတယ်။

ဒီကိစ္စနဲ့ ပတ်သက်လို့ ယင်းမာပင်ခရိုင်၊ အမှတ်(၁၅)တပ်ရင်းဘက်က တစ်စုံတစ်ရာတုန့်ပြန်တာ မတွေ့ရသေးပါဘူး။

လတ်တလောမှာ ချင်းပြည်နယ်မြောက်ပိုင်းဒေသအတွင်း စစ်ကောင်စီတပ်နဲ့ ဖလမ်းမြို့ကို သိမ်းထားတဲ့ တော်လှန်ရေးတပ်ဖွဲ့ တွေကြား တိုက်ပွဲဖြစ်ပွားနေတဲ့ ကာလဖြစ်ပါတယ်။

ချင်းပြည်နယ်ရဲ့ ဧရိယာ အများစုကို ချင်းတော်လှန်ရေးအဖွဲ့တွေက ထိန်းချုပ်ထားတာဖြစ်ပြီး စစ်ကောင်စီတပ်တွေက မြို့တော်ဟားခါးနဲ့ တီးတိန်မြို့ တွေမှာသာ ရပ်တည်နိုင်တော့တာဖြစ်ပါတယ်။

ချင်းပြည်နယ်ဟာ မြန်မာနိုင်ငံကတစ်ဆင့် အိန္ဒိယနိုင်ငံဘက်ကို တင်ပို့တဲ့ မူးယစ်ဆေးဝါးမှောင်ခိုလမ်းကြောင်းပေါ်မှာတည်ရှိနေတယ်လို့ နိုင်ငံတကာ မူးယစ်ဆေးဝါးအစီရင်ခံစာတွေမှာ ဖော်ပြခံရပါတယ်။

ဗီဒီယို - ချင်းကာကွယ်ရေးတပ်-ဟားခါး(CDF-Hakha)က ဖမ်းဆီးလိုက်တဲ့ ယင်းမာပင်ခရိုင်တပ်ရင်းမှူးလက်မှတ်နဲ့ ကျပ်ဘီလီယံချီတန်ဖိုးရှိ မူးယစ်ဆေးဝါးသယ်လာတဲ့ အဖွဲ့

File - CDF Hakha