Скачать или смотреть Playing Chess with Thiha

သီဟ တစ်ယောက် စစ်တုရင်ကို အထိုက်အသင့် ကစားတတ်နေပါပြီ။ စစ်သားဆိုတဲ့ ပွန်းက ဘယ်လိုပဲ သွားလို့ရတယ်။ ဘုရင်က တစ်ကွက်ချင်းပဲ သွားလို့ရတယ် စတာတွေ သိနေပါပြီ။ နိုင်ပွဲကတော့ ၃ ပွဲ ၄ ပွဲ ရှိနေပါပြီ။ နိုင်သွားရင်တော့ ပျော်လွန်းလို့ နေပါတယ်။ ရှုံးပြီဆိုရင်တော့ မျက်ရည်ဝဲခဲ့ရတာ မနည်းတော့ပါဘူး။ ဒါပေမယ့် ဒီပွဲ ၂ ပွဲ ကစားတဲ့အခါမှာတော့ အရှုံးကို ကျေကျေနပ်နပ် လက်ခံပြီး ငိုတာလည်း မတွေ့ရတော့ပါဘူး။ စိတ်ထဲမှာတော့ တစ်ခုခု ရှိနေအုံးမယ်ထင်ပါတယ်။

ကိုယ်တွေ ငယ်ငယ်တုန်းကတော့ ဒီလိုတွေ ကစားဖို့ အခွင့်အရေးလည်း မရှိခဲ့ပါဘူး။ ရှိခဲ့ရင်လည်း အူတူတူ၊​အတတနဲ့ ဖြစ်နေမှာ အသေအချာပါပဲ။ အခုခေတ် ကလေးငယ်တွေကတော့ ကိုယ်တွေခေတ်တုန်းကလို မဟုတ်တာ အသေအချာပါပဲ။ ခေတ်နဲ့ အညီ လိုက်ပြီး မွေးဖွားလေသလား ဆိုရမှာပါ။ ဒီတော့ ကလေးငယ်တစ်ယောက်အတွက် ငယ်ဘဝဟာ အရေးကြီးတယ်လို့ ဖတ်ဖူးကြားဖူးပါတယ်။ ဒီတော့ ကိုယ်ဘာလုပ်ပေးနိုင်မလဲ ဆန်းစစ်ကြည့်တဲ့အခါ သူနဲ့ ကစားပေးဖို့ကလည်း လိုအပ်တယ်လို့ ခံစားရပါတယ်။ ဒါကြောင့် သားနဲ့ ကျားကွက် ကစားတယ်၊ ကျားကွက်နဲ့ ဂျနိုင် ကစားတယ်၊ ကျားကွက်နဲ့ပဲ ဂျဂုန် ကစားတယ်။ အခုတခါ စစ်တုရင်ပေါ့။

သူ့ဆရာနဲ့ သူ့အစ်မ ဝမ်းကွဲနဲ့ စပြီး ကစားရာက ဖေဖေ စစ်တုရင်၊ ချက်စ် ကစားတတ်လားလို့ မေးလာပါတယ်။ ဒီတော့ ကိုယ်ကလည်း ကစားတတ်တာပေါ့လို့ ပြောတော့ သူက သူလည်း ကစားချင်တယ်လို့ ဆိုတဲ့အခါက စဖြစ်ခဲ့ကြတာပါ။ စစ်တုရင် ကစားနည်းကို ကိုယ်ကလည်း ဒီလိုပဲ ကစားရင်နဲ့ တတ်ခဲ့တယ်ဆိုတော့ သူ့ကိုလည်း စည်းမျဉ်းစည်းကမ်းတွေကို လက်တွေ့ ကစားရင်ကနေပဲ တစ်ခုချင်း ပြောပေး၊ အမှားပြင်ပေးရင် သင်ပေးခဲ့တာပါ။ ကလေးရဲ့ စိတ်ဝင်စားမှုက များနေတော့ အချိန်တော်တော်ကြာကြာလေး အစပိုင်းမှာ သင်ပေးရတာ အဆင်ပြေခဲ့ပါတယ်။

နောက်ပိုင်းတော့ ဆော့ရင်း ကစားရင်း သင်ရင်းနဲ့ပါ။ တချို့ကစားပွဲတွေကတော့ သင်တာ မရှိဘဲ ဘယ်လောက်ထိ တိုးနိုင်လည်း လေ့လာကြည့်တာပဲ ရှိပါတယ်။ လွယ်လွယ်နဲ့တော့ သီဟကို အနိုင်ပေးတာ မရှိပါဘူး။ ဘာလို့လဲဆိုတော့ အခက်အခဲတွေကသာ သူ့ဆရာပါ။ ဘဝမှာ စာတွေ ဖတ်ပြီး အလွယ်တကူ နားမဝင်တဲ့ ကလေးသူငယ်တွေ အများကြီးဆိုတာ သိခဲ့ရပါတယ်။ ဒါကြောင့် စာတွေထက် အခက်အခဲတွေ၊ အတွေ့အကြုံတွေကသာ သူတို့အတွက် ဆရာကောင်းလို့ မြင်မိပါတယ်။ စာတွေဖတ်တတ်အောင်လည်း လုပ်ရမှာပါ။ တချို့အရာတွေဟာ ကိုယ့်ဘဝမှာ ကြုံတွေ့စရာမလိုဘဲ စာတွေကတဆင့်ပဲ နားလည်သွားတာ အကောင်းဆုံးပါ။

#chessgame