Скачать или смотреть Ei HNAM MAWINA CHU | Leisen Khuo

#hmarhla #hmarhlasakthiem

Phuoktu : Rev. G. B Niropui, August 1, 1999

Lyrics

Ei ram le hnam, mawina ding chun,
Nunghâk tlangvâl hai, ei pawimaw ;
Ei chetdân le ei țawng dân hai, a mawi a zâng a ni chun aw,
Ei Hmar ram mawi ei lêngna hi, la pâr a tih mi hai tawnah;
Nang le kei a innghat a nih.

Ei hnam mawina chu nang le kei a innghat,
Ei hnam mawina chu nang le kei a innghat;
Siemtu Pathien hre zingin,
Tlawmna felna chel zing rawh

Aw nang tleitîr hmêlțha pieng nal,
I mawi chun aw ei Hmar hnam hi;
La pâr a tih, thiemna insângna le mawina'n, hmuntin rêng a,
Aw nang vâl a, hmêlțha mengmawi, I mawi chun aw ei Hmar hnam hi;
La pâr a tih, khawvel ramah.

Ei Hmar lâm le ei hnam dân hai,
Pi le Pu ha'n an lo fe pui;
Suokpui ei tiu, chawimawi zing in ei ram, ei hnam suklien na di'n,
Ei Hmar dress le, ei hnam puon hai, ngaina tak in mi hai tawnah;
Chawisâng ei tiu, lungruol tak in.
_____________________________________________
Phuokna san:

Hi hla hi August 1, 1999 kum a Nagaland Bible College, Mokokchung Nagaland a lecturer sin thaw a ka um lai a ka phuok a nih.
Thil iengkim vânkhuphnuoia um po po hi Pathien thil siem vawng an nih a, Hnam (Tribe) khawm hi Pathien thil siem an ni a. Chuong ang bawk in țawng (language) khawm hi Pathien in um dinga a siem a nih. Chu lei chun, khawvel hnam tam tak, țawng tam tak lai hin Pathien chun Hmar hnam khawm hi hnam pakhat ni ve ding le Hmar țawng khawm hi khawvêl a țawng pakhat ni ve dinga a siem a nih.
Chuong ani chun iengtin am a ma'n ân din Hmar hnam hai chu Pathien ropuina târlang ve tâng ei ta? tia ka ngaituo lai chun hnam rohluo ni ve dinga hla mawi tak el, 'Ei Hnam Mawina Chu' ti hi Pathien in a mi pêk a nih. Ei chêt dân, ei țawng dân a mawi a, Krista chanchințha leh an mil a ni chun ei Hmar hnam, Pathien in a siem ngei hi khawvel mi hai hriet khawp lo ni in la khawm khawvêl hmuntin rêngah pâr suok thei ngei ei tih ti ka ngaituona'n ka ziek a nih.

Nunghâk le tlangvâl, lungril hrât lai ngaituona tam tak sêng a mani future ding le hnam ang a țhahnem ngai na tienga fe mêk hai chona pe in, nunghâk, tlangvâl hai ei pawimaw ti biek in la khawm hnam țhatna ding le chawisângna ding chun nunghâk le tlangvâl hai cho ni lovin, hnam pumpui kha ei pawimaw seng a. Pathien hrietna le ți na chun Pathien ropuina'n hnam ang in a puong suok thei hlak ding a nih.
Ei hnam mawina chu nang le kei a innghat, khawlaidung a chapo tak in inrui (drugs) pumin, rûk inru in, châng dân mawi naw le mi dang hmu pei naw zawng a ei um chun nang le kei chu ei mimal el ni lovin, a hnam pumpui suk hmingsie tu ei ni ding a ni chu. Lal Isu Krista chanchințha le inhme a ei nun ei hmang chun khawlai hmun a khawm hnam sukmawitu ei ni ding a ni leiin, ei hnam mawina chu nang le kei a innghat, siemtu Pathien hrie zing in tiin ei inzâwt a nih.

Tiena Pi le Pu ha'n ngaituona mâwl tak le an lo fepui hnam lâm, hnam puon le rothil an mi sie pek hai hi lawm a um in inza thlâk a va ni ngei de aw. An mâwl lai hun a an lo suokpui hi a mawi in lungril khawm a hne em em a nih. Țhangthar hai in suk danglam met a ei thaw hin, a mawina chin lo um ve tho sien khawm hnam lâm, hnam puon hai lo hmu suok a țhang le thar la hung um pei ding ha'n ei fepui pei dinga an mi sie pêk ei sawi danglam met met hin Pi le Pu hai hi hung tho nawk ding ni hai sien an lung a awi dîm aw tia ka ngaituonaa Pi le Pu hai lo hmu suok hi inza a um a. Hnam lam, hnam puon țhangthar hai in hmu suok pei in a dang dang hung suok mêk lai zing hin Pi le Pu haiin an lo suokpui ngei hi chu an thlarau inzana ni bawk in tia ngatuonain, an ni hai inzana ni bawk leh, puon khawm an lo hmang hlak ang khan suk danglam met ti khawm um chuong lovin vawng țha zing in. Vawngțhatna leia hnam pumpuiin Pi le Pu haiin an lo fepui le an lo hlimpui ang ang a ngaina a, chawisâng zinga fepui hin malsawmna ei dawng ngei beiseina nei zing in Pi le Pu ha'n an lo fepui suokpui ei tiu. Chawimawi zing in, ei ram ei hnam suklien na di'n hla hmang in ei inzâwt a nih.

A tawpna tak a dingin; hnam in hnena a puongna ding le hnam mi ha'n an ngaisâng theina chun khawvêla hin hmangruo dang hrim hrim a um nawh. Pathien ți na le a ma thuneina hnuoia intuklût char hmangruo umsun chu a nih. Ei ni khawm ei hnam hi Pathien ropuina a tarlang theina dingin siemtu Pathien hrie zing in 'tlawmna, felna chel zing rawh' tiin ei khêk suok a lo nih.