Скачать или смотреть 01 Saya Dr. Soe Lwin "သဘာ၀ရဲ့ သဘောတရားတွေကို သဘောပေါက်ရမယ်" ရန်ကုန် သုံးရက်သင်တန်း ပထမနေ့ (၃၊၂၊၂၃)

သင်တန်းကေက်နုတ်ချက်စာရွက်ကို https://bit.ly/3Yj7XSr မှ ဒေါင်းလုပ်ချဖတ်ရှုနိုင်ပါသည်။

“ဓမ္မလမ်း” (ရန်ကုန်စင်တာ) day (1), February 2023
“သဘာဝရဲ့ သဘောတရားတွေကို သဘောပေါက်ရမယ်။”
“သဘာဝဆိုတာ ဘာလဲ” (What's Nature?)

သဘာဝဆိုတာ သ - ထင်ရှား၊ ဘာဝ - အရှိတရား။ သဘာဝ - ထင်ရှားတဲ့ အရှိတရား (Reality) တစ်လောကလုံးမှာ ထင်ရှားတဲ့အရှိတရားက မသိတတ်တဲ့သဘာဝ (ရုပ်)နဲ့ သိတတ်တဲ့သဘာဝ (နာမ်)တို့ပါပဲ။ ရုပ်နဲ့နာမ် အစုအပေါင်းကို “လူ၊ နတ်၊ ဗြဟ္မာ၊ ယောက်ျား၊ မိန်းမ၊ တိရိစ္ဆာန်”လို့ လောကမှာ သတ်မှတ်ထားတာပါ။

ရွှံ့အစုအပေါင်းကိုပဲ ခွေးပုံလုပ်ရင် ခွေး၊ နွားပုံလုပ်ရင် နွား၊ ယောက်ျားပိုလုပ်ရင် ယောက်ျား၊ မိန်းမပိုလုပ်ရင် မိန်းမ ဖြစ်သွားတာပါ။ “ပုံသဏ္ဌာန်လိုက်ပြီး အမည်ပြောင်း”တာပါ။ အမှန်က အာလုံး ရွှံ့နဲ့ပဲ လုပ်ထားတာပါ။

“သေသွားရင်”
မျက်စိရှိပေမဲ့ မမြင်တော့ဘူး။ မျက်စိကရုပ်၊ မြင်တာက နာမ်ပါ။
နားရှိပေမဲ့ မကြားတော့ဘူး။ နားကရုပ်၊ ကြားတာက နာမ်ပါ။
နှာခေါင်းရှိပေမဲ့ မနံတော့ဘူး။ နှာခေါင်းကရုပ်၊ နံတာက နာမ်ပါ။
လျှာရှိပေမဲ့ အရသာမသိတော့ဘူး။ လျှာကရုပ်၊ အရသာသိတာက နာမ်ပါ။
ကိုယ်ရှိပေမဲ့ ထိတာမသိတော့ဘူး။ ကိုယ်ကရုပ်၊ သိတာက နာမ်ပါ။
သိစိတ်၊ တွေးစိတ်ဆိုတဲ့ မနောက မရှိတော့ဘူး။ ဝိညာဏ်-သိစိတ်တွေ ချုပ်သွားတာကို သေတယ်လို့ ဆိုပါတယ်။

“ရှုထောင့်သစ်” (New Dimension)

လူဆိုတာ “မျက်စိ၊ နား၊ နှာ၊ လျှာ၊ ကိုယ်ဆိုတဲ့ (ရုပ်)နဲ့ သိစိတ် (နာမ်)တို့ (၆)မျိုး အစုအပေါင်း”ပါပဲ။ “ရုပ်နာမ်ရှုထောင့်”ကမမြင်ပဲ ငါ၊ သူ၊ ယောက်ျား၊ မိန်းမဆိုတဲ့ “ပုံသဏ္ဌာန်ရှူထောင့်”က အမှန်လို့ စွဲယူနေတာပါ။

“လောကနဲ့ဓမ္မ” (Identity and Reality)

လူ၊ ယောက်ျား၊ မိန်းမ၊ ခွေး၊ ကြောင်၊ ကျွဲ၊ နွားလို့ ဆိုပေမဲ့ “သဘာဝ ရုပ်တွေ နာမ်တွေ”ပဲ အလုပ်လုပ်နေတာပါ။ ကားတွေ အမျိုးအစား အမျိုးမျိုးရှိပေမဲ့ အင်္ဂျင်နဲ့ ဘီးတွေပဲ အလုပ်လုပ်ပြီး သွားနေကြတာပါ။
အသွင်ပုံသဏ္ဌာန်ရဲ့ နောက်ကွယ်က အရှိတရား (behind the scene)ကို မမြင်နိုင်ဘူးဖြစ်နေတယ်။

မြတ်စွားဘုရား ကျေးဇူးကြောင့် “အမှန်တရားကို (၃)ဆင့်”နဲ့ သင်ကြားမှုစနစ်တစ်ခုကို သိခွင့်ရခဲ့ပါတယ်။ ကာလ-ဒေသအလိုက် အမှန်တရား၊ ကာလမရွေး-ဒေသမရွေး အမှန်တရား၊ ကာလလွန်-ဒေသလွန် အမှန်တရား။

ကားတွေ မော်ဒယ်အမျိုးမျိုးက ကာလ-ဒေသအလိုက် အမှန်တရား၊ (within time and place)
ကားဆိုတာ အင်္ဂျင်နဲ့ဘီးတွေပဲဆိုတာက ကာလမရွေး ဒေသမရွေး အမှန်တရား၊ (any time and place) ကားဆိုတာ သယ်ယူပို့ဆောင်ရေးပဲဆိုတာက ကာလလွန် ဒေသလွန် အမှန်တရား၊ (beyond time and place)

ကလေး၊ လူငယ်၊ လူကြီး၊ လူအိုဆိုတာက ကာလ ဒေသအလိုက် အမှန်တရား၊
အာလုံးက ရုပ်နာမ်ဆိုတာက ကာလမရွေး ဒေသမရွေး အမှန်တရား၊
ရုပ်နာမ်အာလုံးက ဆင်းရဲအမှန်တရား “ဒုက္ခသစ္စာ”ဆိုတာက ကာလလွန် ဒေသလွန် အမှန်တရား၊
အသိတစ်ခုကို အဆင့်(၃)မျိုးနဲ့မြင်တတ်လာရင် ပြည့်စုံတဲ့ခံစားမှုတစ်ခု ဖြစ်ပေါ်လာပါတယ်။(full confidence)

“ငါဆိုတာဘာလဲ” (What am I? or Who am I?)

လောကရှုထောင့်က အမည်၊ အသက်၊ ကျား-မ၊ လူမျိုး၊ ဘာသာ၊ ပညာ၊ ရာထူး၊ အလုပ်တွေနဲ့ သတ်မှတ်တာပါ။ ဓမ္မရှုထောင့် အမြင်ကတော့ သဘာဝတရားဖြစ်တဲ့ “ရုပ်နာမ်နဲ့ကိလေသာ” အစုအပေါင်းပဲ ဖြစ်ပါတယ်။

အပြစ်လုပ်တာ ကိလေသာ၊ ခံရတာက ရုပ်နဲ့နာမ်။
မတည့်တာစားချင်တာ ကိလေသာ၊ ရောဂါဖြစ်တာက ရုပ်နဲ့နာမ်။
သင်္ကြန်ပျော်ချင်တာ ကိလေသာ၊ ပင်ပန်းတာက ရုပ်နဲ့နာမ်။
ရန်ဖြစ်ချင်တာ ကိလေသာ၊ ရိုက်ကြတာက ရုပ်နဲ့နာမ်။

face book ကြည့်ချင်တာ ကိလေသာ၊ မျက်စိညောင်းတာက ရုပ်နဲ့နာမ်။
လှချင်တာက ကိလေသာ၊ အိုနေတာက ရုပ်နဲ့နာမ်။
စားချင်တာက ကိလေသာ၊ ဝနေတာက ရုပ်နဲ့နာမ်။

“ကိလေသာဝိတ်ချမှ ဘော်ဒီဝိတ်ကျမည်။”
“သေရမှာက ကိလေသာ၊ သေကြတာက ရုပ်နဲ့နာမ်”

“သေချင်လား”လို့မေးရင် ရုပ်နာမ်သေမှာကိုသာ အများအားဖြင့် သိကြပါတယ်။
ကိလေသာသေရမှာကို စဉ်းစားတတ်ပြီး “ကိလေသာသေချင်ပါတယ်”လို့ ရဲရဲပြောဝံ့သူက ရှားပါတယ်။ ကိလေသာမသေပဲ ရုပ်နာမ်တွေသာ သေနေကြလို့ မွေးလိုက် သေလိုက်နဲ့ “အသေသံသရာ မဆုံးနိုင်”တာပါ။

“ရုပ်နာမ်လည်း သဘာဝ၊ ကိလေသာလည်း သဘာဝ”

ကံနဲ့ကံ၏အကျိုးကိုယုံကြည်ပြီး ရုပ်နာမ်ကို ကံရဲ့ အကျိုးပေးတစ်ခုအနေနဲ့ သဘာဝတရားလို့ လက်ခံနိုင်ပါတယ်။ ကိလေသာဖြစ်ရင် မိမိမှာ အပြစ်ရှိသလိုမျိုး ခံစားရတယ်။ သူလည်း သဘာဝလို့ စိတ်က လက်မခံတတ်ပါဘူး။

လောကမှာ လေပြေလေညှင်းကို သာယာဖွယ်လို့လက်ခံပြီး မုန်တိုင်းကို အပြစ်မြင်တတ်ပါတယ်။ အမှန်က လေပြေလေညှင်းလည်း သဘာဝဖြစ်သလို မုန်တိုင်းလည်း သဘာဝတရားလို့ လက်ခံလာနိုင်ပါတယ်။

ဒီလိုပဲ ရုပ်နာမ်လည်း သဘာဝဖြစ်သလို ကိလေသာကလည်း သဘာဝပါပဲ။ ဒီအသိက “အမှန်မြင်”လာတာပါ။ ကိလေသာကြောင့် သတ္တဝါအာလုံး ဆင်းရဲဒုက္ခရောက်လို့ ကိလေသာကို ပယ်သင့်လို့ပယ်တာက ဉာဏ်အရာပါ။

“ပိုင်းခြားသိရမှာက ရုပ်နာမ်၊ ပယ်ရမှာက ကိလေသာ”

သဘာဝတရားဖြစ်တဲ့ “ရုပ်နာမ်နဲ့ကိလေသာ”ကို သတိထားပြီး အမြင်မှန် (သစ္စာသိတဲ့ဉာဏ်)ဖြစ်သွားတာပါ။ “သစ္စာသိတဲ့ဉာဏ်”က ကိလေသာအားလုံးကို အမြစ်ပါမကျန် အပြီးပယ်သတ်နိုင်ပါတယ်။ ကိလေသာအပြီးသေရင် အသေသံသရာဆုံးတဲ့ “ဆင်းရဲအာလုံးငြိမ်းရာ နိဗ္ဗာန်”ရောက်ပါတယ်။