တက္ကသိုလ်ဝင်စာမေးပွဲ မသန်စွမ်းဦးရေ ၁၇၀ ကျော် ဝင်ရောက်ဖြေဆို

မတ် - ၈ ၊၂၀၁၉

၂၀၁၉ခုနှစ် တက္ကသိုလ်ဝင်တန်းစာမေးပွဲမှာ တစ်နိုင်ငံလုံးအတိုင်းအတာအနေနဲ့ မသန်စွမ်းစာဖြေသူ(၁၇၁)ဦး ၀င်ရောက်ဖြေဆိုနေတယ်လို့ မြန်မာနိုင်ငံစာစစ်ဦးစီးဌာနမှ သတင်းရရှိပါတယ်။

မသန်စွမ်းစာဖြေသူတွေထဲမှာ အမြင်အာရုံမသန်စွမ်းသူ (၂၄)ဦး၊အကြားအာရုံမသန်စွမ်းသူ (၁၅)ဦးနဲ့ ကိုယ်အင်္ဂါမသန်စွမ်းသူ (၁၃၂)ဦးရှိတယ်လို့ သိရပါတယ်။

မြန်မာနိုင်ငံစာစစ်ဦးစီးဌာနက မသန်စွမ်းစာဖြေသူတွေအတွက် စာမေးပွဲဖြေဆိုချိန် သုံးနာရီအပြင် အချိန်ပို မိနစ်(၃၀)ဖြေဆိုခွင့်ပြုပေးထားပါတယ်။

ဒါ့အပြင်တက္ကသိုလ်ဝင်စာမေးပွဲမှာ အမြင်အာရုံချို့တဲ့သူနဲ့ ကိုယ်အင်္ဂါမသန်စွမ်းသူတွေအနေနဲ့ စာရေးသားဖြေဆိုဖို့အတွက် အခက်အခဲ ရှိရင် နှုတ်နဲ့ဖြေပေးလို့ရပါတယ်။

ဒီလို နှုတ်နဲ့ဖြေပေးတာကို နဝမတန်း ကျောင်းသား၊ ကျောင်းသူတွေက စာနဲ့ပြန်ရေး ပေးတာကိုတော့ သီးခြားစာဖြေခန်းအသုံးပြုကာ ဖြေဆိုခွင့်ပြုပေးထားတယ်လို့သိရပါတယ်။

အကြားအာရုံမသန်စွမ်းစာဖြေသူတွေအတွက်ကိုလည်းမေးခွန်းပုံစံကိုသဘောပေါက်နားလည်စေဖို့ လူမှုဝန်ထမ်းသင်တန်းကျောင်းမှဆရာ၊ဆရာမတွေက လက်သင်္ကေတဘာသာစကားနဲ့ (၁၅)မိနစ်ရှင်းလင်းပေးတယ်လို့ သိရပါတယ်။

၂၀၁၉ခုနှစ် တက္ကသိုလ်ဝင်တန်းစာမေးပွဲကို မတ်လ(၆)ရက်က စတင်ကျင်းပနေတာဖြစ်ပြီး ဒီနေ့ မတ်လ(၈)ရက်မှာတော့ သချာင်္ဘာသာရပ်ကို ဖြေဆိုရတာဖြစ်ပါတယ်။

၂၀၁၉ခုနှစ်တက္ကသိုလ်ဝင်တန်းစာမေးပွဲဝင်ရောက်ဖြေဆိုသူဦးရေဟာရှစ်သိန်းငါးသောင်းကျော်ရှိတယ်လို့သိရပါတယ်။

၂၀၁၈ခုနှစ်တက္ကသိုလ်ဝင်တန်းစာမေးပွဲမှာမသန်စွမ်းစာဖြေသူဦးရေ (၁၆၀)၀င်ရောက်ဖြေဆိုခဲ့ပြီး အဲ့ဒီထဲမှာ ကိုယ်လက်အင်္ဂါမသန်စွမ်းသူ(၃၂)ဦး၊အမြင်အာရုံမသန်စွမ်းသူ (၁၁)ဦးနဲ့ အကြားအာရုံမသန်စွမ်းသူ(၂)ဦး စုစုပေါင်း(၄၅)ဦးဖြေဆိုအောင်မြင်ခဲ့ပါတယ်။

ရုပ်သံသတင်းထောက် - လွင်သဲငယ်ဦး