LYRICS | Heestii waayeelka jaqafsada | Maxammed Mooge Liibaan

Heestii: Waayeelka jaqafsada
Ereyadii: Axmed Saleebaan Bidde
Laxankii: Axmed Gacayte
Codka: Maxammed Mooge Liibaan

Jooflaha libaaxiyo
jaandheerta doobkiyo
Waayeelka jaqafsada
Jirridaha habeenkii
Wixii jiidha waagaa
jeenigu xanuunaa
Allaylehe jaceylkii
jid iyo ceel umaad bixin
Anigana ka joog iyo
Ha ku jabin imaad odhan
Waxba se jeerba yaan hiban
jirrabkan aad i marisaye
Ilaahii joogay baa jira
Allihi joogay baa jira

Wadiiqada jirjiirsani
Jid san bay ku geysaa
Ama jar iyo buur dheer
Khalqigana badh baa jira
Intey ku hor jalweystaan
Waaq la' kugu jarwiciyee
Allaylehe sidii jagi
dhallini isku jiidheen
wacadkeenni jeexnaa
Adigi baa ku joogsaday
Waxba se jeerba yaan hiban
jirrabkan aad i marisaye
Ilaahii joogay baa jira
Allihi joogay baa jira

Ifka waxaad la joogtaa
Jannaduu ku geeyaa
Ama se naarta jahannama
Jaceylkuna sidoo kale
Nimcuu kuu jiheeyaa
Ama se laamo kula jaba
Anna jamashadaydii
Iyo jololo'daadii
Sida rimayda jiilaal
Jalwis baaban ka qaadee
Waxba se jeerba yaan hiban
jirrabkan aad i marisaye
Ilaahii joogay baa jira
Allihi joogay baa jira