Скачать или смотреть MS Prevee Adisionál Millaun $37, Atu Valoriza Servisu Profesionál Saúde iha 2026

Ministériu Saúde (MS) hamutuk ho Instituisaun tutelada sira aprezenta Proposta Planeamentu no Orsamentu tinan 2026 bá Komité Revizaun Orsamentu (KRO), ne’ebé lidera hosi Primeiru-Ministru (PM), Kay Rala Xanana Gusmão, kuarta (06/07/2025).

Instituisaun Tutelada sira mak hanesan, Hospitál Nasionál Guido Valadares (HNGV), Instituto Nacional de Saúde Pública de Timor-Leste, Instituto Público (INSPTL,I.P), Instituto Nacional de Farmácia e Produtos Médicos (FPM) no Servisu Nasionál Ambulánsia no Emerjénsia Médika (SNAEM IP).

Hafoin aprezentasaun, Ministra Saúde, Elia A. A. dos Reis Amaral hateten, Ministériu Saúde Ezekuta ona Orsamentu Jerál Estadu (OJE) tinan 2025 ho atinjimentu persentajen 48%.

Tanba ne’e, MS simu envelope fiskál bá tinan 2026 hamutuk millaun $69, signifika MS hetan redusaun millaun $2-resin no situasaun ne’e ezije atu halo melloramentu bá prestasaun servisu.

MS mós prevee Orsamentu Adisonál millaun $37 ne’ebé ho nia kategoria Saláriu no Vensimentu, Bens no Servisu, Kapitál Menór no Kapitál Dezenvolvimentu.

Programa esensiál MS nian bá tinan 2026 iha haat mak hanesan, Fortalesimentu Dezenvolvimentu Institusionál, Kuidadu Saúde Primária, Kuidadu Saúda Sekundária no Kuidadu Saúde Tersiária.

“Adisionál bá Fortalesimentu Dezenvolvimentu Institusionál tanba MS hakarak atu fó valorizasaun bá servisu profisionál saúde sira ne’ebé tinan barak nia laran seidauk iha oportunidade atu hasa’e sira-nia karreira,” Ministra Élia hateten.

Tanba ne’e, enkuadramentu bá progressaun ne’e hahú iha tinan 2026 ho persentajen akumuladu hamutuk 3.000-resin bá rejime espesiál Pessoál Saúde hotu-hotu.

“Sira ne’ebé mak servisu kleur ona iha MS sei hetan enkuadramentu progressaun. MS sei servisu hamutuk ho Komisaun Funsaun Públika atu haree asuntu ne’e,” nia informa.

Reuniaun KRO ne’e hala’o iha salaun Ministériu Finansas (MF) Aitarak-Laran hahú iha tersa (05/08/2025) no tuir Kalendáriu bá reuniaun Komité Revizaun Orsamentu 2026 sei remata iha sábadu (23/08/2025).

Partisipa hodi akompaña Ministra Saúde, Elia A. A. dos Reis Amaral iha aprezentasaun ne’e mak hanesan Vise-Ministru ba Fortalesimentu Institusionál Saúde, José dos Reis Magno, Vise-Ministru ba Opersionalizasaun Ospitais, Flávio Brandão no Dirijente másimu hosi Instituisaun tutelada sira.

(Média-GPM)