Скачать или смотреть តើលោក បេនចាមីន នេតាន់យ៉ាហ៊ូ ជាជនបង្ករសង្រ្គាមឬយ៉ាងណា? | Benjamin Netanyahu

លោក បេនចាមីន នេតាន់យ៉ាហូ មានរហស្សនាមថា "Bibi" គឺជាបុគ្គលដ៏មានឥទ្ធិពលបំផុតក្នុងប្រវត្តិសាស្ត្រនយោបាយអ៊ីស្រាអែលសម័យទំនើប និងជាអ្នកដែលកាន់តំណែងជានាយករដ្ឋមន្ត្រីបានយូរជាងគេបំផុតរបស់ប្រទេសនេះ។ លោកត្រូវបានគេចាត់ទុកថាជាអ្ននយោបាយជើងចាស់ដែលមិនចេះស្លាប់ (The Survivor) ព្រោះលោកអាចយកឈ្នះវិបត្តិនយោបាយធំៗបានជារឿយៗ។ លោកមានវោហារសាស្ត្រពូកែ និងប្រកាន់ជំហរមិនរអាក់រអួលលើបញ្ហាអធិបតេយ្យភាពអ៊ីស្រាអែល។

នៅក្នុងយុទ្ធសាស្ត្រយោធារបស់លោក បេនចាមីន នេតាន់យ៉ាហូ ក្នុងសមរភូមិបច្ចុប្បន្ន នាដើមឆ្នាំ ២០២៦ មានលក្ខណៈ សកម្មខ្លាំង (Proactive) និង មិនថយក្រោយ ដែលខុសប្លែកពីយុទ្ធសាស្ត្រការពារពីមុនៗ។ លោកបានប្តូរពីការ "ទប់ទល់" មកជាការ "កម្ចាត់ឱ្យអស់ជម្រក"។ ផ្ទុយពីការវាយប្រហារត្រឹមតែក្រុមតំណាង (Proxy) ដូចជា ហាម៉ាស ឬ ហេសប៊ូឡា លោក នេតាន់យ៉ាហូ បានសម្រេចចិត្តវាយប្រហារចំអ៊ីរ៉ង់តែម្តង។ លោកជឿថា ដរាបណាអ៊ីរ៉ង់នៅតែមានសមត្ថភាពនុយក្លេអ៊ែរ និងហិរញ្ញវត្ថុ នោះសន្តិសុខអ៊ីស្រាអែលមិនអាចកើតមានឡើយ។ លោកបានប្រកាសថា នេះគឺជាបំណងប្រាថ្នារបស់លោកជាង៤០ ឆ្នាំមកហើយ ក្នុងការបោសម្អាតរបបដឹកនាំអ៊ីរ៉ង់ ដែលលោកចោទប្រកាន់ថា ជាអ្នកគាំទ្រក្រុមភេរវករក្នុងតំបន់។

ក្រោយពីសម្លាប់មេដឹកនាំកំពូលរបស់អ៊ីរ៉ង់លោក Ayatollah Ali Khamenei និងមន្ត្រីជាន់ខ្ពស់យោធាជាច្រើនរូបទៀតបានសម្រេច អ៊ីស្រាអែល ក្រោមការដឹកនាំរបស់លោកនេតាន់យ៉ាហ៊ូ ដាក់គោលដៅវាយកម្ទេចរាល់មេដឹកនាំថ្មីរបស់អ៊ីរ៉ង់ឱ្យរាបដល់ដី នៅក្នុងចេតនាដែលគេហៅថា «វាយឱ្យស្លាប់ រួចដុតផ្ទះចោល»។

យុទ្ធសាស្រ្ដនេះ លោកក៏ធ្លាប់ប្រើដើម្បីកម្ទេចក្រុមប៉ាឡេស្ទីនផងដែរ។ លោកធ្លាប់បានប្រកាសជាចំហថា "គ្មានថ្ងៃដែលរដ្ឋប៉ាឡេស្ទីនអាចនឹងកកើតឡើងបានជាដាច់ខាត"។ លោកយល់ថាការបង្កើតរដ្ឋប៉ាឡេស្ទីននឹងក្លាយជាការគំរាមកំហែងដល់សន្តិសុខរបស់អ៊ីស្រាអែល។ រដ្ឋាភិបាលរបស់លោកបានអនុម័តផែនការ ពង្រីកតំបន់តាំងទីលំនៅ របស់ជនជាតិជ្វីហ្វនៅក្នុងទឹកដីប៉ាឡេស្ទីនដែលលោកចង់បាននាពេលអនាគត។ លោកបានរិះគន់ប្រទេសណាដែលអាណិតអាសូរដល់ប៉ាឡេស្ទីន ដោយលោកលើកឡើងថា ប្រទេសទាំងនោះគួរតែ ទទួលយកជនភៀសខ្លួន ប៉ាឡេស្ទីនទៅ ជាជាងមកអង្គុយរិះគន់យុទ្ធនាការយោធារបស់អ៊ីស្រាអែល។

លោកធ្លាប់ប្រឈមនឹងការចោទប្រកាន់ពី តុលាការព្រហ្មទណ្ឌអន្តរជាតិ (ICC) អំពីបទឧក្រិដ្ឋកម្មសង្គ្រាម ដែលធ្វើឱ្យលោកកាន់តែឯកោលើឆាកអន្តរជាតិ។ តុលាការព្រហ្មទណ្ឌអន្តរជាតិ (ICC) បានសម្រេចចេញដីកាចាប់ខ្លួនលោក បេនចាមីន ណេតាន់យ៉ាហ៊ូ និងអតីតរដ្ឋមន្ត្រីការពារជាតិលោក យូវ ហ្ហាលឡង់ (Yoav Gallant) កាលពីថ្ងៃទី ២១ ខែវិច្ឆិកា ឆ្នាំ ២០២៤។ មូលហេតុនៃការចាប់ខ្លួន ចៅក្រមយល់ឃើញថា លោក ណេតាន់យ៉ាហ៊ូ និងលោក ហ្ហាលឡង់ បានរារាំងដោយចេតនានូវការផ្តល់ជំនួយមនុស្សធម៌ រួមមាន អាហារ ទឹក ថ្នាំពេទ្យ ប្រេងឥន្ធនៈ និងអគ្គិសនី ដល់ប្រជាជនស៊ីវិលនៅតំបន់ហ្កាហ្សា។ តុលាការក៏បានបញ្ជាក់ថា សកម្មភាពទាំងនេះគឺជាផ្នែកមួយនៃការវាយប្រហារដ៏រីករាលដាល និងជាប្រព័ន្ធប្រឆាំងនឹងជនស៊ីវិល។

ក៏ប៉ុន្ដែ លោក បេនចាមីន ណេតាន់យ៉ាហ៊ូ បានប្រតិកម្មយ៉ាងខ្លាំងក្លា និងប្រើពាក្យធ្ងន់ៗដើម្បីរិះគន់តុលាការ ICC បន្ទាប់ពីការចេញដីកាចាប់ខ្លួនរូបលោក។ លោក ណេតាន់យ៉ាហ៊ូ បានហៅដីកាចាប់ខ្លួននេះថាជាវិធានការ "ប្រឆាំងជនជាតិជ្វីហ្វសម័យទំនើប"។ លោកប្រៀបធៀបព្រះរាជអាជ្ញា ICC ទៅនឹងចៅក្រមក្នុងរបបណាស៊ីអាល្លឺម៉ង់ ដោយចោទថាពួកគេមានចេតនាបង្ខូចកេរ្តិ៍ឈ្មោះរដ្ឋអ៊ីស្រាអែល។ លោកបានរិះគន់ថា ICC បានប្រែក្លាយខ្លួនពីស្ថាប័នច្បាប់ ទៅជា "ស្ថាប័ននយោបាយ" ដែលបម្រើផលប្រយោជន៍សត្រូវរបស់អ៊ីស្រាអែល។ លោកយល់ថា តុលាការគ្មានសមត្ថកិច្ច (Jurisdiction) លើអ៊ីស្រាអែលឡើយ ព្រោះអ៊ីស្រាអែលមិនមែនជាសមាជិក ICC។ ស្របពេលជាមួយគ្នា សហរដ្ឋអាមេរិក (ក្រោមរដ្ឋបាលលោក ត្រាំ) បានចេញមុខកាពារលោកណេតាន់យ៉ាហ៊ូដោយដាក់ទណ្ឌកម្មសងសឹកលើមន្ត្រីតុលាការICCទៀតផង។

***កំណត់សម្គាល់: រាល់ការបញ្ចេញមតិទៅលើខ្លឹមសារនៃវីដេអូនេះ គឺជាទំនួសខុសត្រូវរបស់អ្នកបញ្ចេញមតិផ្ទាល់។ ដូច្នេះ សូមមិត្តអ្នកគាំទ្រគ្រប់ផ្នែក ធ្វើការបញ្ចេញមតិប្រកបដោយសីលធម៌ ក្នុងន័យស្ថាបនា។ ការបញ្ចេញមតិបែបជេរប្រមាថ អុជអាល នាំដល់ការយល់ច្រឡំ ឬ ការរើសអើងជាតិសាសន៍ សាសនា ឬក៏បុគ្គលណាមួយ នាំឱ្យបាត់បង់ភាពថ្លៃថ្នូរជាមនុស្ស មិនមែនជាគោលបំណងរបស់ខ្ញុំបាទឡើយ។ ខ្លឹមសារអប់រំនៃវីដេអូនេះ ជាគោលបំណងរបស់យើងខ្ញុំ! សូមអរគុណ!

#ប្រវត្តិលោកបេនចាមីននេតាន់យ៉ាហ៊ូ #អ៊ីស្រាអែល #អត្ដចរិតនេតាន់យ៉ាហ៊ូ #benjaminnetanyahu