Скачать или смотреть Nishka pita | Hrana i Vino MKD

НИШКА ПИТА

1 кг брашно
9 јајца
500 г сирење
500 мл млеко
250 г маргарин
50 г сусам
1 свеж квасец
масло за јадење
Хималајска сол

Потребно време за подготовка на ова предјадење е 80– минути, не сметајќи го времето за стасување.

Во тенџере на оган го ставаме млекото. Откако ќе се смлачи го тргаме тенџерето од оган. Квасецот го рониме со рака, го додаваме во тенџерето и мешаме со жица додека не се растопи. Кршиме 3 јајца, ги додаваме во тенџерето и промешуваме. Брашното во длабок сад го посолуваме. Постепено ја додаваме содржината од тенџерето и со рака замесуваме тесто. Продолжуваме да го месиме тестото на работна маса, додека не стане мазно. Го враќаме во садот, го наросуваме со брашно и оставаме да стасува 30-тина минути на топло место.
Во друг длабок сад кршиме 5 јајца и ги матиме со жица. Го додаваме сирењето, го дробиме со виљушка и го мешаме филот додека не се соедини.
Во сад за матење го ставаме маргаринот. Го посолуваме и го матиме со миксер додека не стане пенест.
Стасаното тесто го вадиме од садот и на работната маса го сечеме на 4 еднакви делови. Првиот дел го сечеме на 6 парчиња и формираме топчиња. Од секое топче тесто со сукалка развлекуваме кора. Првата кора ја премачкуваме со изматен маргарин. Една врз друга редиме уште 4 кори премачкани со маргарин. Прекриваме со шестата кора, која не ја премачкуваме. Со сукалката развлекуваме голема кора и на двата краја нанесуваме од подготвениот фил. Од двата филувани краја на кората виткаме ролати кои се соединуваат на средината. Вака формираниот ролат го ставаме во тава од рерна, намрсена со масло. На истиот начин ги подготвуваме сите ролати и ги редиме во тавата.
Преостанатото јајце го кршиме и ја делиме белката од жолчката. Во садот со жолчката додаваме една лажица масло и мешаме со готварска четка. Потоа со четката со изматена жолчка ги премачкуваме ролатите во тавата. Ги наросуваме со сусамот и ја ставаме тавата во рерна. Печеме 45 минути на 180 степени и ја вадиме од рерна. Подизладената Нишка пита ја сечеме на парчиња и скалесто ги редиме на чинија за сервирање.

Со ова предјадење ви предлагаме да се напиете квалитетно суво бело вино. Се служи на температура од 10-12 степени.

Добар апетит.

www.hranaivino.com.mk
www.hranaivino.tv