Скачать или смотреть Tamashacha khadak | तमाशाचा खडक बारमाही धबधबा | रहस्यमय ठिकाण | Kolhapur tourism |कोल्हापूर पर्यटन

location📍
तमाशाचा खडक व धबधबा
(Tamashacha khadak waterfall)

Description:


#तमाशाचा_खडक

तमाशाचा खडक हे रहस्यमय ठिकाण कोल्हापूर जिल्ह्यातील भुदरगड (गारगोटी) तालुक्यात घनदाट अरण्यात, दोन डोंगरांच्या मध्ये वसलेलं आहे. या ठिकाणी जाण्यासाठी गारगोटी - पाटगाव रोडवर असलेल्या आकुर्डे गावातून वरच्या बाजूला जावे लागते. देवकेवाडी मार्गे गिरगावला जाताना गिरगाव मध्ये प्रवेश करायच्या आधीच डाव्या बाजूला एक अरुंद रस्ता जातो. या रस्त्याने थोडं अंतर पार केलं की एक छोटा पूल लागतो. या पुलावरून पुढे गेल्यावर तीव्र उतार लागतो, हा उतार उतरल्यावर आणखी थोडं पुढे गेल्यास तिथे मोकळी जागा आहे येथे आपली वाहने पार्क करावी लागतात. आणि खऱ्या प्रवासाला सुरवात होते ती आपली वाहने पार्क केल्यानंतर...!

दाट झाडी, घनदाट जंगल, अरुंद व चिखलाने माखलेली पायवाट, वाटेच्या दोन्ही बाजूने उगवलेलं उंचच उंच गवत, लहान-मोठे ओढे, वरून पावसाची रिपरिप, अनोळखी रस्ता आणि संपर्क क्षेत्राच्या बाहेर असलेला मोबाईल..!

आम्ही वाट चालायला सुरुवात केली. दाट झाडीतून मार्ग काढत आम्ही अंतर कापू लागलो. तमाशाच्या खडकाकडे जाणारी ही वाट खूप अरुंद व चिखलाने माखलेली होती. त्या अरुंद वाटेने चिखलातून मार्गक्रमण करत आम्ही ही रहस्यमय जागा जवळ करत होतो. (रहस्यमय जागा याचा उलगडा समोर केलेला आहे.) मजल दरमजल करत आम्ही एका छोट्या ओढ्याजवळ जाऊन पोहोचलो. हा ओढा पार केल्यानंतर काही अंतरावर पायवाट खचलेली आहे आणि त्या ठिकाणी एक मोठा चपट्या आकाराचा दगड आहे त्या दगडावरून पुढे जावे लागते. या दगडावरून जाणे म्हणजे एक एडवेंचरच...! असे एडवेंचर आणि अडथळे पार करत पुढे पुढे चालत राहिल्यास एक मोठा ओढा लागतो. ओढ्याच्या दोन्ही बाजूला उंचच उंच हिरवीगार झाडे, उंच झाडांच्या पानांवरून पडणारे पाण्याचे मोत्यांसारखे टपोरे थेंब, ओढ्याच्या प्रवाहातील मोठमोठे दगड आणि या दगडावरून उड्या मारून वाहणारं खळाळतं पाणी म्हणजे निसर्गाने निर्मिलेलं अप्रतिम आणि अद्भुत सौंदर्यच म्हणावे लागेल. आपण कितीही नाही म्हटलं तरी या ठिकाणी आपण स्वतःला कॅमेऱ्यात कैद केल्यावाचून राहू शकणार नाही. आम्ही या ओढ्याचा मनसोक्त आस्वाद घेतला आणि ओढा पार करून पुढे चालू लागलो. आणि... आणि काही क्षणातच आम्ही शेवटी इच्छित स्थळी पोहोचलो. आणि ते ठिकाण म्हणजे #तमाशाचा_खडक..!

बऱ्याच वर्षांपूर्वीची एक प्राचीन आख्यायिका सांगितली जाते. प्राचीन काळी या भागात घनदाट झाडी होती. त्या भागात राहणारे लोक या खडकाच्या आजूबाजूला शेती करायचे. तेथील जंगलातील पालापाचोळा गोळा करून या ठिकाणी जाळत असत व जळालेल्या राखेचा उपयोग ते नाचणीच्या शेतीसाठी करत असत. शेतात नाचणीचे पीक असताना तेथील लोक शेतीची राखण करत असत. शेतीची राखण करत असताना पूर्वीचे लोक मनोरंजनासाठी गाणी म्हणत असत व लोकनृत्य करत असत. गाणी म्हणण्यासाठी व नृत्य करण्यासाठी ते लोक तिथे असणाऱ्या भल्या मोठ्या खडकाचा उपयोग स्टेज म्हणून करत असत. व इतर लोक ते नृत्य पाहण्यासाठी खडकासमोरील मोकळ्या जागेचा उपयोग करत असत.एके दिवशी या खडकावर नृत्य करत असताना सर्वजण अचानक रहस्यमय रित्या अदृश्य झाले आणि तेव्हापासून या खडकाला तमाशाचा खडक असे नाव पडले.

पाऊस जास्त असल्याने या खडकावरून मोठ्या प्रमाणात पाणी वाहत होते. त्यामुळे आम्ही त्या खडकावर प्रत्यक्षात पोहोचू शकलो नाही पण या रहस्यमय जागेचे दर्शन झाले याचा आनंद अवर्णनीय आहे. तेथील क्षण आम्ही मोबाईलच्या कॅमेऱ्यात कैद केले आणि परतीच्या प्रवासाला लागलो. परतीचा प्रवास पण तितकाच अद्भुत व रोमांचकारी होता. मौज-मजा-मस्ती-मस्ती करत आम्ही आमची वाहने पार्क केली होती त्या ठिकाणी पोहोचलो. आणि त्यावर स्वार होऊन घर जवळ केले.

अशाप्रकारे आमचा रहस्यमय खडकाचा रोमांचकारी प्रवास पूर्णत्वास गेला.

‪@Vnradke‬




#tamashachakhadak #tamashachakhadakwaterfall #kapforest #trekking #trekkingvlogs #kolhapur #gargoti #bhudargad #hiddenplaces #forest #waterfall #nature #sahyadri #mountains #river #mysterious #mysteriousfacts #travel #travelvlog #youtube #maharastra #kolhapurtouristplace #तमाशाचा_खडक #तमाशाचा_खडक_धबधबा #कोल्हापूर

‪@Vnradke‬