Скачать или смотреть TUME YAHIMIZA UTUNZAJI WA FARAGHA ZA MTU BINAFSI

Tume ya Ulinzi wa Taarifa Binafsi imewahimiza wananchi, taasisi za umma na binafsi kuzingatia kwa dhati utunzaji wa faragha za watu binafsi, kufuatia kuongezeka kwa matumizi ya teknolojia ya kidijitali na mitandao ya kijamii.

Akizungumza na waandishi wa habari jijini Mbeya, Mkurugenzi mkuu wa Tume hiyo Dkt.Emmanuel Mkilia amesema kuwa kumekuwa na ongezeko la matukio ya uvujaji wa taarifa binafsi, jambo linaloweza kuhatarisha usalama, heshima na haki za msingi za wananchi.

Amesisitiza kuwa taarifa binafsi kama vile majina kamili, anuani, namba za simu, taarifa za benki na nyaraka za utambulisho zinapaswa kulindwa kwa mujibu wa sheria na taratibu zilizowekwa. Aidha, taasisi zote zinazokusanya na kuhifadhi taarifa za watu zinatakiwa kuhakikisha zinaweka mifumo madhubuti ya usalama wa taarifa hizo.

“Tunaikumbusha umma kuwa faragha ni haki ya kikatiba. Ni wajibu wa kila mmoja kuhakikisha taarifa za watu wengine hazitolewi au kusambazwa bila ridhaa yao,” amesema Mkurugenzi huyo.

Tume pia imewataka wananchi kuwa waangalifu wanaposhiriki taarifa zao mtandaoni, hasa katika majukwaa ya kijamii, ili kuepuka madhara yanayoweza kujitokeza ikiwemo wizi wa utambulisho na udanganyifu wa kimtandao.

Kwa upande wake, Mkurugenzi wa Utekelezaji wa Sheria wa Tume hiyo ameeleza kuwa hatua kali zitachukuliwa dhidi ya mtu au taasisi yoyote itakayobainika kukiuka sheria za ulinzi wa taarifa binafsi.