Скачать или смотреть نهێنییەکانی چارەسەری بەردی زراو، کەی نەشتەرگەری پێویستە؟

نهێنییەکانی چارەسەری بەردی زراو، کەی نەشتەرگەری پێویستە؟

بەرنامەیەکی نوێی دکتۆر ئاراسە، لەم بەرنامەیەدا دکتۆر ئاراس میوانداریی پڕۆفیسۆری ناوداری کورد، د. قەلەندەر کەسنەزانی، راوێژکاری نەشتەرگەرییەکانی چاندنی ئەندامەکانی جگەر و پەنکریاسی کرد، ئەمەش دوای ئەوەی دکتۆر قەلەندەر کەسنەزانی توانی پەرتووکێکی نێودەوڵەتیی پزیشکی لەبارەی برینداربوونەکانی رێڕەوی زراو لەدوای نەشتەرگەریی و هەناوبینییەکانی زراو بنووسێت، ئەم پەرتووکە پزیشکییە دەبێتە سەرچاوەیەکی زانستیی باوەڕپێکراو بۆ خوێندکاران و پزیشکانی جیهان، دەروازەیەکی نوێی بە ڕووی پزیشکیی کوردیدا کردەوە.

یەکێک لە مژارە سەرەکییەکانی ئەم بەرنامەیە، کە بەشێکی گرنگی پەرتووکە پزیشکییەکەش هەر لەبارەی ئەم مژارەیە، "بەردی زراو"ە. پڕۆفیسۆر کەسنەزانی بە شێوازێکی زانستی و ڕوون، تیشکی خستە سەر ئەوەی کە زۆرینەی تووشبووان (نزیکەی ٨٥٪) هیچ نیشانەیەکیان نییە و بەردەکان بە ڕێکەوت دەدۆزرێنەوە. لە بەرامبەردا، ئەو کەمینەیەی کە نیشانەیان هەیە، ڕووبەڕووی ئازارێکی توندی لەناکاو لە بەشی سەرەوەی سک دەبنەوە، کە دەکرێت ئاڵۆزیی مەترسیداری وەک زەردوویی، هەوکردنی توورەکەی زراو و هەوکردنی پەنکریاسی لێبکەوێتەوە.

د. قەلەندەر ئەوەشی خستەڕوو یەکێک لە هۆکارەکانی زوو دەستنیشانکردنی بەردەکانی زراو لە جیهانی ئەمڕۆدا ئەوەیە ئێستا نەخۆش خۆی داوای سۆنار دەکات و ئەمەش دەستنیشانکردنی بەردەکانی ئاسانکردووە.

لە بەشێکی دیکەی بەرنامەکەدا پرۆفیسۆر کەسنەزانی پێوەرەکانی نەشتەرگەری روونکردنەوە. د. قەلەندەر جەختی لەوە کردەوە کە هەموو کەسێک پێویستی بە لابردنی زراوی نییە. نەشتەرگەری تەنها لە چەند حاڵەتێکی دیاریکراودا پێویستە، لەوانەش: گەورەبوونی قەبارەی بەردەکە بۆ زیاتر لە ٣ سانتیمەتر، بوونی ئازارێکی توند و دووبارەبووەوە، یان دەرکەوتنی ئاڵۆزییە تەندروستییەکان.

سەبارەت بە ژیانی دوای نەشتەرگەری، کە زۆربەی کات بە ڕێگەی هەناوبینی (نازوور) ئەنجام دەدرێت، پرۆفیسۆر قەلەندەر کەسنەزانی دەڵێت مرۆڤ دەتوانێت بە شێوەیەکی تەواو ئاسایی بژی و هیچ گۆڕانکارییەکی گەورە لە سیستمی خۆراکیدا پێویست نییە. هەروەها ئاماژە بە مەترسیدارترین کێشەی کاتی نەشتەرگەری کرا، کە برینداربوونی بۆریی زراوە، و هۆشیاریش دەدات کە ئەمە ڕووداوێکە لە باشترین سەنتەرەکانی جیهانیشدا ڕوودەدات و نابێت هەمیشە وەک هەڵەی پزیشک لێکبدرێتەوە.

بۆ بینینی زانیارییە وردەکان، بینەری ئەم بەرنامەیە بن..