Hallabca/ Syamend Hawrami

سڵام هەڵەبجە
شاری سەربەرزی گرد لێۉۆ دیارم
شاری شؤرە و پەڕ جە ئازارم
ئارؤ ساڵرؤ هەشتا و هەشتیتا
سؤتەو سارایا چون بەهەشتیتا
چېشت پەی ۉاچو هەڵبجەکەم
شاری پەر داخ و پەڕ ڕەنجەکەم
تا بیەن هەر پېسە بیەن
تارېخی فرەش بە چەم دیەن
هەر یؤ بە جؤرېۉ یاۉان پەنە
یؤ بە زؤر
یؤ زەڕ
یؤ بە فەرتەنە
تؤیچ هەر ۉېنەو وېت
هەر بە زامەتېت
مزانو چېشت دیەن و چېشت سەر ئامان
ئەژنیەنم و وەنەنمۆ جە سەر تا دامان
کتېبې پەڕېنې جە داستانا تؤ
جە داستانې مدرامانا تؤ
بەفری میری شنرۉې
قەمان ئەشکەهؤڵ
وەزگېڵ
تاۉېرە
گرد شێدېنې چېشت ئامان ملەرە
کەچی قەت نامانی چؤکەرە
ئافەرین
ئا گردە تیرې کە شنیێت ۉەنە
گرد سەرو مەیل بە سەر فەرازیت بیېنې
سەرو ئازادی و ئازادی وازیت بیېنې
تارېخ باس کەرؤ
هەر کەی نائینسانې
گیرشا واردە بؤ دەسو سەر بەرزاتۆ
سەراسیمە و
بە قەپ و قەمې
نیشتېنې گؤراڵا پا دەشتاتۆ
چواردە سەدې چێۉەڵیچ
هەر پېسە ئارؤی ۉەهار بې
کە سیاۉ لەشکەرو سیاو دەرونا
شادی لا کانیە بەهارېشا پرونا
چا وەختۆ تا بە ئارۆ کەمتەر ساڵېۉ بیەن کە تؤ
سەرو وې بیەیت رەنجت نەبؤ
بە سەرە نەگېڵیەی و
نەدریەی دەردیسەر
بەڵام تؤ هەر مەنی
چون وېت مەنی تا سەر
هەڵەبجە شارو هانە ئاشقانیم
شارو کانیە قوڵکەی و
لابلای تەقتەقانیم
هەڵەبجە شارەکەم
ۉېنې و داستانې ڕەنجات
ئینێ ۉەرەچەموچەما
زەڵم و سیرۉانیۆ
سینې داڵانی و تەختو سانیۆ
سەبتېنې و مەشاۉە
چەنی ئانەیچە
نۆرؤزت ئینا راۉە و
بە تەمان گردما پېۉە
چەم ئۆ سەۉای
سڵؤۉەو دڵسەردی دەیمێ لاۉە
نۆرؤزت پیرؤز بؤ
هەڵەبجەکەم
بە هەمېدو ئا رؤی مانیێت بسیاۉە
سیامەند هۆرامی