Скачать или смотреть MATUMIZI MABAYA YA MITANDAO YA KIJAMII YANACHOCHEA CHUKI NA HUSUDA KATIKA JAMII

#Muhadhiri wa Chuo Kikuu cha Mtakatifu Augustine Tanzania (SAUT), Dkt. Dotto Bulendu, amesema moja ya sababu zinazopelekea kuongezeka kwa chuki na husuda katika jamii ni matumizi mabaya ya mitandao ya kijamii na vyombo vya habari, ambavyo vimeelekezwa zaidi katika kusambaza habari hasi badala ya habari chanya.

Akizungumza katika hafla ya chakula cha mchana kwa watoto yatima, iliyofanyika katika viwanja vya ofisi za Baraza Kuu la Waislamu Tanzania (BAKWATA), mkoa wa Mwanza, Dkt. Bulendu alisema kuwa maudhui yanayowasilishwa kwa jamii, hususan kwa watoto, mara nyingi yamekuwa na athari mbaya kwa maendeleo ya kijamii na uzalendo.

"Kuanzia asubuhi hadi jioni, habari tunazowalisha watoto wetu kupitia vyombo vya habari rasmi na visivyo rasmi nyingi ni hasi. Hatuwafanyi watu wetu kujitambua, kuthamini walichonacho, kuijua na kuithamini nchi yao," alisema Dkt. Bulendu.

Hafla hiyo iliandaliwa na Sheikh wa Mkoa wa Mwanza kwa ufadhili wa Kampuni ya Rock Solution Tanzania Ltd, ikiwa na lengo la kuwafariji watoto yatima na kuwahamasisha juu ya maadili mema na thamani ya jamii yenye mshikamano.

Katika hotuba yake, Dkt. Bulendu alitoa wito kwa vyombo vya habari na jamii kwa ujumla kuhakikisha kuwa maudhui yanayowasilishwa kwa umma yanajenga maadili, mshikamano, na kuthamini utu wa binadamu badala ya kuchochea migawanyiko na chuki.

"Ni jukumu letu kama wanajamii na wadau wa mawasiliano kuhakikisha kuwa tunawapa watoto wetu taarifa zinazojenga fikra chanya, maadili mema, na upendo kwa nchi yao," alisisitiza.

Hafla hiyo ilihudhuriwa na viongozi wa dini, wadau wa maendeleo, na watoto yatima kutoka maeneo mbalimbali ya mkoa wa Mwanza.