充氣奇蹟 ． 香港中環海濱裝置藝術爭議

#充氣奇蹟 #中環海濱 #cvm #裝置藝術

2024 年 7 月 6 日．星期六

最近，香港嘅 #充氣奇蹟 裝置藝術展搞到好大爭議。

最初我都係從唔同朋友嘅 WhatsApp 群組睇到啲相；大家見到個綠色金字塔，諗起用嚟遮屍體嗰啲帳幕；見到啲白色石柱，又會諗起墓碑。

雅虎新聞就走咗去問咗呢個裝置藝術嘅原創人 Joann，問佢點睇呢個展覽。 Joann 話啲展品好唔靚、比例唔啱等等；仲話唔希望自己嘅名同呢件事有任何關連。

負責搞呢次裝置藝術展嘅 Central Venue Management （CVM）話雅虎畀 Joann 睇嘅相係誤導嘅，冇充分反映到展覽嘅真實情況，又強調佢哋喺展覽期間一直同原創者保持聯絡，而原創者冇要求事先睇相，所以唔存在審批或者同意嘅問題。

之後，我都有出過幾個 post ，單單打打。

首先，我自己都覺得，我喺網上嘅留言，真係有啲尖酸刻薄。諗返轉頭，做人應該要多啲同理心；我都相信香港仍然有啲人係抱住啲單純、善良嘅動機，只係希望為香港帶嚟啲藝術嘅氣息。

但係，我都希望搞藝術嘅人明白，對藝術嘅評價的確係好主觀；有時真係可以好負面。

但點解呢次展覽會引起咁多負面反應呢？我相信因為好多人會以為今次係政府搞嘅所謂盛事。

其實活動嘅策展人亦聯絡咗我，問我係咪「殺錯良民」；佢好委屈咁話覺得係網絡欺凌。

我理解佢嘅氣餒。

不過，亦因為呢件事，令我對 CVM 呢間公司更感到興趣；例如，最初呢間公司係點樣得到政府委任去管理中環海濱呢個地方？

為咗解決呢啲疑問，我嘗試邀請咗策展人上我嘅節目，希望佢可以親自解釋或者講述佢嘅版本。

但坦白講，從我見到 CVM 嘅聲明，似乎真係有啲 defensive 。我見南華早報嘅訪問，CVM 嘅 David Rule 直頭話啲劣評係 rather short-sighted ；可能係出於無奈喇，但我認為，件事係有好多值得討論嘅地方。

所以，我希望策展人Grace可以聯絡我；而各位如果有啲乜嘢補充資料，亦歡迎響呢度留言話畀我知。



如果你覺得我嘅分享畀到你唔同嘅睇法，希望你會願意加入成為會員支持我繼續發聲：

   / @leesimon  

此頻道既為香港人而設，內容當以粵語為本。

利世民，香港人，自媒體 unsubject 主筆，自由主義者，樂天知命，不問鬼神。形而上虛無主義者。角色屬性混沌中立；長期處於身份存在危機；總覺得三言兩語間未能介紹自己。過去四分一世紀，平均每半年有個新興趣；課題涵蓋物理心理、政治經濟、歷史、宗教、哲學。