BSF Inspector (L) T. Alex Lalminlun Luongdamsa vaidawnna Imphal

(L)T. ALEX LALMINLUN TANCHIN TOMKIM





(L) T. Alex Lalminlun (Inspector 168 Bn. BSF, No.113100574) ahileh, Pu. T. Thomas Khupkholam leh Pi. Teresa Niangneiching gil a ga goutan thumna (3) ahia, Dt. 24th April, 1983 in Tuaitengphai khua a apiang hi.
Laisim nalam ahileh taan (class) Nursery apat taan guh (6) tan St. Teresa's School, Tuaitengphai a ana kai hi. Tualeh taan sagi (7) Don Bosco High school, Churachandpur a ana kai a , taan giat (8) apat taan som (matric) St. Mary's High School, Tuibuang a 1999 in ana zou hi. Taan 11 leh 12 Sielmat Christian Higher Secondary a 2001 in ana zou hi. Tuazou in St.Anthony's College Shillong a B.A (English Honours) 2004 in ana zou a, tualeh PM.A (English Honours) Manipur University, Canchipur a 2006 in ana zou khia hi. Kum 2008-2010 in DR. S. Radha Krishnan Foundation School, Tuibuang ah private teacher in ana sem hi.
Kumpi (Govt.) nasep nalang ah 2010 in, SSC (CPO) nuai a Sub-Inspector mu in 2011 in ana join hi. Kum 2018 in promotion mu in Inspector Rank in ana kaisang hi.
Date 10th April, 2013 in Tuibuang a um Pu. Sumzadal Gangte leh Pi. Taikhokim tanu thumna (3) Nu. Ruthy Khollalngai toh hattuom dansiangthou in kinunna St.Teresa Parish Tuaitengphai a Fr. Matthew Mundoly (Parish Priest, St. Teresa Parish, Tuaitengphai) in ana gawm hi. Aman gil a ga goutan tapa melhoitah Master Jeremy Lammuansang kum li (4) ahin hi.
Kum 2018 in Poonch District, Jammu & Kashmir a posting ana pei hi. Duty apuo laitah in cross border shelling splinter (bomb hal) apat liamna tuah in, emergency airlift kibawl in Udhampur Military Hospital puohtung hinanleh damzou talou in nai 3pm vel in a iit angai teng nuasia in ang na muolliem san tahi.
Ama ahileh aneu apat mikukal tah leh mi taima ahia, ganta khawi leh lou bawl lunglut mama mi ahi. Hattuom lang a Catholic Youth Fellowship (CYF) Chairman hun sawttah ana puo hi, tualeh laa lang leh music lunglut mi ahi natoh lapui lamkai in ana pang zing hi. Khotang hi in innsung vai hileh sum leh pai, tha leh zung iit lou a theitawp a ana pang mi ahia, tualeh nu leh pa zatat leh sanggam-u leh nau huaisiam mama mi ahi. Tualeh ama mi kisuangla leh mi kingaingiem mi jong ahi. Adamlai a a laa dei pen ahileh, Khristien Labupi, 5th Edition, No.220: “Na lungkham sah vawt sih un”, chi laa ahi.
Aman pienpi sanggam pasal li (4) anei hi, tuate ahileh: 1. Ignatius Kamsuankhai H/o Mary Niangngaichiin 2. Francis Donglianmang H/o Lynda Nianglamching 3. (L) Alex Lalminlun H/o Ruthy Khollalngai 4. Joseph Zamchinlian H/o Abigial Zamneikim 5. Samuel Nehneihau.