Yad e Kal Khair | Khutba e Bibi Zainab In Darbar e Yazid | Reciter Nadeem Sarwar Ali Saqalain Canada

Noha: Yad e Kal Khair Bhi Hum
Original Reciter: Janab Nadeem Sarwar
Poet: Janab Rehan Azmi Marhoom
Reciter: Ali Saqalain
Location: Al Mahdi Islamic Centre, Pickering, Toronto, Canada

Lyrics:

Haye!! Aseer qafila darbar e sham jab aaya,

Yazeed Zainab-e-Kubra se yun huwa goya

Lo aj raaz “Wa tu izzu man tasha” ka khula

Ke ba weqaar hua kon, kon hai ruswa

O! Bad kalam theher, O! Bad kalam theher, Bolen Zainab-e-Kubra

Nashay mai mast hai aayat yeh poori sab ko suna,

Wo haath khair ka hai kon mujh ko yeh to bata

Ke jis se zillat o tauqeer bant’ta hai khuda

Wo haath tu hai ke hum? Wo haath tu hai ke

Hum Ahlebait(AS) hain us kay,

hum hi hai izzat o zillat k baatne wale

Yad e kal khair bhi hum, Rabb e kaaba ki qasam

Unhi hathon mai rasan, sar e darbar e sitam



1. Zainabi lehje me awaaz e Ali goonj uthi
Zulm aur jabr ke darbar pe bijli si giri
Laeq e hamd hai jis ne hame izzat bakhshi
Surah e Rum se shehzadi ne aayat yeh padhi

Jo bure the so bura..x2 un ka hi anjaam hua
Jis ne Quran ko jhutlaya wo nakaam hua


Yad e kal ....


2. Kia kaha tu ne?..(2) ke haq se hame ruswai mili
Hum yeh kehte hai hame izzat o sachai mili
Hum ko Quran mila Rabb ki shanasayi mili
Mere pyaro ko sina par bhi pazirayi mili
Ibn e Marjana teray..(2) jubba o dastar talak
Karbala aagayi ab sham ke darbar talak

Yad e kal ...

3. Aye mere bhai ke qatil hawas e zarr ke ghulaam
Imtehan yeh bhi hai mai aur karun tujh se kalaam
Yun mukhatib hu ke dil mai hai mere gham ki husaam
Mujh ko dena hai Hussain ibn e Ali ka payghaam
Kar kay tazheek e Nabi ..(2) tujh ko maza aata hai
Inteqam e ohad o badr pe itrataa hai

Yad e kal ...


4. Aye Yazeed e sitmai! Jaag bohat shaad hai tu
Qaid karke hame samjha hai ke azaad hai tu
Yeh teri khaam khayali hai ke abaad hai tu
Nasl dar nasl sada ke liye barbaad hai tu
Faisla Rab ka hai..(2), mohlat hai sambhal jaane ki
Dheel dee jati hai zalim ko sambhal jaane ki

Yad e kal ...

5. Aaj kis zaum mai ashraf ka khoon peeta hai
Kaat kay baagh e Risalat ko tu khush hota hai
Cheekhta phirta hai tu badr ka yeh badla hai
Mujh ko hairat nahi hinda hi ka tu beta hai
Hoga maloom shaqawat..(2), ka nateeja us din
Badla yeh kya hai, liya jayega badla us din

Yad e kal ....


6. Kardiya qatl hamein tu ne ghalat socha hai
Gosht apna hi chabaya hai badan nocha hai
Kya khabar tujh ko ke hum logo ka rutba kya hai
Aal e Imran mai Allah ka yeh waada hai
Shohada surat e Quran, sada zinda hain
Wo to wo un ke muhibban sadaa zinda hin

Yad e kal ....


7. Haye! Mehwe hairat hun jinhe Rab ne sar afraaz kiya
Ilm e Quran diya or yad e kal khair kaha
Ah! Un Bagh e Risalat ke gulo'n ko masla
Aasteeno se tumhari hai lahoo un ka baha
Pak o pakeeza banaye..(2), the jo khud rabb ne badan
Aaj sehra mai pade hain wohi be gor o kafan

Yad e kal ...



8. Aazma le sitami jaag sitam ke harbay
Dekh baqi tere dil mai koi hasrat na rahe
Reh gaya ho jo sitam koi to wo bhi karle
Jeet kar har gaye teri hukumat hum se
Fikr e Shabbir to phaylay..(2) gi, Muhammad ki qasam
Yeh tere bus me nahi malik o mukhtar hain hum

Yad e kal ....


9. Hafiz e Nahj e Balagha ka tha wo rob o jalaal
Maut ki khamoshi jesa hua darbar ka haal
Jag utheen bibiyan jo gham se musalsal thi nidhaal
Bhare darbaar se mazloom khateeba ka sawal
Kalema jis ka padha..(2), us ka jigar kaat liya
Apne Mohsin ke nawaase he ka sar kaat liya

Yad e kal....

10. Tum thay nau laakh darinde wo bahattar (72) insaan
Un bahattar me bhi Asghar sa tha ek tishna dahan
Aisa masoom qasam khata hai jin ki Qur’an
Haye un pyaaso ke hulqoom pe khanjar tha rawan
Tum yeh kehte ho paye..(2) jung Hussain (AS) aaya tha
Betiyo behno ko phir saath me kyun laya tha?

Yad e kal...

11. Aye Yazeed! Aj na kyun tujh pe falak toot pade
Tu ne wo zulm kiye jis se Muhammad roye
Haye namoos e Nabi kucha o bazaar phire
Dar o deewar saje kothon se patthar barse
Shamiyo hum pe naya..(2), ab yeh ghazab karte ho
Choti Zehra ko kaneezi mai talab karte ho?

Yad e kal ....

12. Khatm taqreer hui..(2), mehshar e khamosh utha
Ya Ali ! Aap ki beti ka ajab khutba tha
Murda darbaar pe chahi thi khateeba ki sada
Bich gayi Sarwar o Rehan wahan farsh e Aza
Bhai kay sir pe nazar..(2), Zainab e Kubra ki padhi
Jhuk gayi Bali Sakina pe Ali ki beti