XOCALI SAKİNLƏRİ ÜMİDLƏRİNİ ÜZMÜRLƏR

Akif Hüseynov Xocalı qətliamında bütün ailə üzvlərini itirib. O, ailənin sağ qalan yeganə üzvüdür. Qardaşı Milli Qəhrəman Tofiq Hüseynov Xocalıda düşmənlə son nəfəsinədək döyüşüb və əsir düşməmək üçün özünü qumbara ilə partladaraq 10-a yaxın ermənini məhv edib. Akif Hüseynovun digər əzizlərindən isə indiyədək heç bir səs-soraq yoxdur. O, hələ də ailəsinin sağ qalmasına ümid edir.
“Bir gecədə bütün ailə üzvlərini itirmək dəhşətdir, bunu heç kimə arzulamıram. Danışıqlardan sonra Tofiqin nəşini alıb gətirə bilmişdik, o biri ailə üzvlərimdən kim oldü, kim qaldı, heç birini tapa bilməmişik”.
Ailənin itkin düşən üzvü Bakir Hüseynovun həyat yoldaşı Nəzakət Hüseynova deyir ki, həmin dəhşətli gecədə israrlara baxmayaraq, Bakir Xocalını tərk etməyəcəyini və sonadək Vətənini qoruyacağını bildirib. O gündən Bakir Hüseynovdan xəbər-ətər yoxdur. Nəzakət Hüseynovanın gözləri indi də yoldadır.
Xocalı qətliamından 25 il keçsə də, o dəhşətli gecədə yaşadıqları müsibətlər sakinlərin ürəyində sağalmaz yara açıb. Onlar erməni faşistlərinin törətdiyi qətliamın ağrısı ilə yaşayırlar. Və dünya birliyini ikili standartlardan əl çəkib Xocalıda baş verənlərə hüququ-siyasi qiymət verməyə, cinayətkarları cəzalandırmağa çağırırlar.