Скачать или смотреть Cəlilabadlı arıçılar təsərrüfatlarında “Boz Qafqaz” arı sortu yetişdirir

Ölkəmizdə 2016-cı ilə qədər fərdi qaydada təsərrüfatlarda bəslənilən arı ailələri Arıçılıq Mərkəzinin yaradılması ilə yeni mərhələyə keçdi. Bununla da arıçılar mütəxəssis təcrübəsindən geniş istifadə imkanları qazandılar. Mərkəzdə yeni arı sortlarının yetişdirilməsinə başlanıldı. "Boz Qafqaz" adlanan arı cinsinləri yerli sortlarla müqayisədə daha məhsuldardır.

Gəncədə fəaliyyətə başlayan Arıçılıq Mərkəzi təsərrüfatçılar üçün geniş imkanlar yaradıb. Mütəxəssislərin fikrincə ölkədə arıçılıqla məşğul olan fermerlərlə sıx əməkdaşlıq bu sahənin inkişafına geniş təkan verəcək. Uzun illər arıçılıqla məşğul olan Cəlilabad sakini Əjdər Feyziyev deyir ki, əvvəllər bəsləmə işlərini ata-baba qaydası ilə həyata keçirirdilər, indi mərkəzin peşəkar mütəxəssisləri sayəsində ana arıların süni yolla mayalandırılması sirlərinə yiyələnəcəklər.

Arıçı Əjdər Feyziyev: “Məhsuldar arı cinslərinin əldə olunması, onların artırılması, çiçək tozunun toplanması, arı südünün toplanması şəxsən bu cəmiyyətlər vasitəsi ilə mən əldə etmişəm.”

Fermer deyir ki, Arıçılıq Mərkəzinin tövsiyəsi ilə artıq ötən ildən etibarən təsərrüfatında yetişdirdiyi “Boz Qafqaz” arı cinsi yerli arı cinsləri ilə müqayisədə daha da məhsuldardır. Ölkəmizin iqliminə uyğunlaşan bu arıların digər üstünlüyü isə soyuğa qarşı davamlı olmasıdır.

Arıçı Əjdər Feyziyev: “Müsbət 5 dərəcə, 10 dərəcə hava şəraitində də çıxıb işləməyə başlayırlar. Bu da arı üçün yaxşı xüsusiyyətdir ki, sərin havalarda da işləyə bilir. Məhsuldarlığı da “Boz Qafqaz” arı cinslərinin yaxşı olur.”

Əjdər Feyziyev Arıçılıq mərkəzinin fəaliyyəti sayəsində arı məhsullarının satışının asan olduğunu bildirdi.

Arıçı Əjdər Feyziyev: “Arının zəhəri var, çiçək tozu var, vələmun var, arı sancması var - hansı ki, arının zəhərindən müalicə məqsədi ilə istifadə olunur. Hətta arının qutusundakı olan hava nəfəs yollarının müalicəsində geniş istifadə edilir.”

Bu il hər arı ailəsinin orta məhsuldarlığı 8-10 kq olub. Hazırda isə yeni arı cinslərinin təsərrüfatlarda yayılması məhsuldarlığın orta hesabla 20-25 kq artmasına səbəb olacaq.