Скачать или смотреть కోరిక తీరిన వేళ (“రాధా! జయకేం తెలియదని, పిల్లల పెంపకము రాదని అంటూ అవమానపరిచే దానివిగా?

కోరిక తీరిన వేళ (“రాధా! జయకేం తెలియదని, పిల్లల పెంపకము రాదని అంటూ అవమానపరిచే దానివిగా? అందుకే జాగ్రత్తగా పెంచమని వీడిని వదిలిపోయింది తీసుకో” అన్నాడు.

రచన: మాదిరెడ్డి సులోచన

అలసటగా ఇంటికి వచ్చిన సారధి హాల్లోనే ఆగిపోయాడు. లోపలినుండి రాధ గొంతు ఖంగుమని వినిపిస్తోంది.
“ఒక్కసారి చెబితే అర్థం కాదూ! నా బిడ్డకా అమ్మవారి అవతారం లాంటి అలంకరణ చెయ్యొద్దని....”
“ఇప్పుడేమయిందే? దాని సరదా కొద్ది అది చేసింది. కాసేపు ఉంచి తీసివెయ్యి” జానకమ్మ అనునయంగా అంది.

“మీ కిష్టమైతే మీ విషయాలలో సర్వ స్వాతంత్ర్యం ఇవ్వండి అత్తయ్యా. నా బిడ్డల విషయములో మాత్రం నాకు కొన్ని ఆదర్శాలున్నాయి,” అనుకుంటూ హాల్లోకి వచ్చిన రాధ, సారధిని చూచి గతుక్కు మంది. వెంటనే తను ప్రక్క గదిలోకి వెళ్ళింది. సారధి గాఢంగా నిట్టూర్చి లోపలికి వెళ్ళాడు. మలిన వదనముతో పడక గది గుమ్మములో జయలక్ష్మి నిల్చుంది. ఎదురుగా అయిదేళ్ళ సీమ, పసుపురంగు కంచి పరికిణి, నల్ల జాకెట్టు వేసుకుని మెరిసిపోతోంది. పొట్టి జడ చివర్న జెడ కుప్పెలు వ్రేళ్లాడుతున్నాయి. నుదుట దోసగింజ బొట్టు, బుట్ట బొమ్మలా ఉంది. రాధ కోపానికి కారణం అర్ధం అయింది. జయలక్ష్మి వంక జాలిగా చూస్తూ, ఆమెను తప్పుకుని గదిలోకి వెళ్ళాడు సారధి. అతను దుస్తులు మారుస్తుండగానే 'సీమా” అంటూ రాధ పిలువటం వినిపించింది. అతను కాళ్ళు చేతులు కడుక్కుని వచ్చేసరికి జయలక్ష్మి కాఫీ తెచ్చింది.