གསར་དུ་འཁྲབ་པའི་ནགས་ཤོད་སྟག་ཕུའི་ཨར་གཞས། 2024 Tibet nagshod Driru folk dance.

འདི་ནི་ནགས་ཤོད་སྟག་ཕུ་རྡོ་རྗེ་འཆང་ཆེན་པོ་སྐུ་ཕྲེང་བརྒྱད་པ་པདྨ་བཛྲ་གྱིས་བརྩམས་གནང་བའི་ཨར་གཞས་ལེའུ་དྲུག་པ་ཡིན །
༄༅། ། ལེའུ་དྲུག་པ། བསྐལ་པ་དང་པོ།

ཨོཾ་སྭ་སྟི། བསྐལ་པ་དང་པོ་མ་ཆགས།།
བསྐལ་པ་དང་པོ་ཆགས་དུས།། ཨོཾ་སྭ་སྟི།
ཨོཾ་སྭ་སྟི། བསྐལ་པ་དང་པོ་རླུང་གི།
རྡོ་རྗེའི་རྒྱ་གྲམ་ཆགས་ཡོད།། ཨོཾ་སྭ་སྟི།
ཨོཾ་སྭ་སྟི། རྡོ་རྗེ་རྒྱ་གྲམ་སྟེང་ལ།།
བདུད་རྩིའི་རྒྱ་མཚོ་འཁྱིལ་ཡོད།། ཨོཾ་སྭ་སྟི།
ཨོཾ་སྭ་སྟི། རྒྱ་མཚོ་དེ་ཡི་ནང་ལ།།
གསེར་གྱི་པད་མ་འཁྲུངས་ཡོད།།ཨོཾ་སྭ་སྟི།
ཨོཾ་སྭ་སྟི། པད་མ་འདབ་མ་སྟོང་མཐོང་།
གཞན་དང་མི་འདྲའི་བསྐལ་པ།། ཨོཾ་སྭ་སྟི།
ཨོཾ་སྭ་སྟི། བསྐལ་པ་མི་ངན་བསྐལ་པ།།
དེ་ལས་བཟང་རྒྱུ་མི་འདུག། ཨོཾ་སྭ་སྟི།
ཨོཾ་སྭ་སྟི། བསྐལ་བ་འདི་ལ་སྐལ་བཟང་།
སངས་རྒྱས་སྟོང་ཕྲག་ཕེབས་ཡོད།། ཨོཾ་སྭ་སྟི།
ཨོཾ་སྭ་སྟི། བསྐལ་བཟང་སངས་རྒྱས་སྟོང་ལ།།
བྲོ་ཡི་མཆོད་པ་འབུལ་ལོ།། ཨོཾ་སྭ་སྟི།

ཨོཾ་སྭ་སྟི། ཚེ་གཅིག་ལུས་གཅིག་སངས་རྒྱས།།
གསང་བ་སྔགས་ཀྱི་རྒྱུད་སྡེ།། ཨོཾ་སྭ་སྟི།
ཨོཾ་སྭ་སྟི། ཨུ་དུམ་ཝ་རའི་མེ་ཏོག།།
རྒྱ་ལམ་ནང་དུ་འཁྲུངས་འདྲ།། ཨོཾ་སྭ་སྟི།
ཨོཾ་སྭ་སྟི། འདས་དང་མ་འོངས་སངས་རྒྱས།།
ཕལ་པོ་ཆེ་ཡིས་མ་གསུངས།། ཨོཾ་སྭ་སྟི།
ཨོཾ་སྭ་སྟི། རྩོད་ལྡན་ཚེ་ལོ་བརྒྱ་པ།།
འདུལ་བའི་ཞིང་དུ་བཞེངས་པའི།། ཨོཾ་སྭ་སྟི།
ཨོཾ་སྭ་སྟི། པད་དཀར་ལྟ་བུར་བསྔགས་པ།།
རྣམ་འདྲེན་ཤཱཀྱ་སེང་གེ། ཨོཾ་སྭ་སྟི།
ཨོཾ་སྭ་སྟི། གསང་སྔགས་ཐེག་པ་ཆེན་པོ།།
བསྟན་པ་འདི་ལ་གསུངས་པ།། ཨོཾ་སྭ་སྟི།
ཨོཾ་སྭ་སྟི། སློབ་དཔོན་ནུས་ལྡན་རྡོ་རྗེ།།
འབྲས་བུའི་བསྟན་པ་མཐར་ཐུག། ཨོཾ་སྭ་སྟི།”
ཨོཾ་སྭ་སྟི། གསང་སྔགས་སྟོན་དང་བསྟན་པར།།
བྲོ་ཡི་མཆོད་པ་འབུལ་ལོ།། ཨོཾ་སྭ་སྟི།

ཨོཾ་སྭ་སྟི། རྩ་གསུམ་རྒྱལ་བ་རབ་འབྱམས།།
རྡོ་རྗེ་གསང་བའི་ལུང་གི། ཨོཾ་སྭ་སྟི།
ཨོཾ་སྭ་སྟི། བཀའ་བབས་དུས་སུ་སྨིན་པ།།
བསམ་ཡས་བཀོད་པའི་ཁྱད་པར།། ཨོཾ་སྭ་སྟི།
ཨོཾ་སྭ་སྟི། ས་སྟེང་མཛེས་པའི་རྒྱན་གཅིག།
གསང་བ་སྔགས་ཀྱི་སྒྲུབ་སྡེ།། ཨོཾ་སྭ་སྟི།
ཨོཾ་སྭ་སྟི། ཁོར་ཡུག་རྡོ་རྗེའི་ར་བ།།
རྒྱང་འདོམ་ཉིས་བརྒྱ་ཉི་ཤུ།ཨོཾ་སྭ་སྟི།
ཨོཾ་སྭ་སྟི། དགེ་འདུན་འདུས་པ་རྒྱ་མཚོའི།།
བསྟི་གནས་ནམ་མཁའི་སྐར་ཚོགས།། ཨོཾ་སྭ་སྟི།
ཨོཾ་སྭ་སྟི། ཁྱིམ་ཆེན་གྲུ་བཞི་སྒོ་བཞི།།
ཀ་བ་སུམ་ཅུ་སོ་དྲུག། ཨོཾ་སྭ་སྟི།། ཨོཾ་སྭ་སྟི།
དབུ་རྩེ་དམ་པ་རིགས་གསུམ།།
སྒོ་བཞི་ཀ་བ་བཅུ་གཉིས།། ཨོཾ་སྭ་སྟི།
ཨོཾ་སྭ་སྟི། སྟེང་ཐོག་ཞི་བ་དབང་དང་།
དྲག་པོ་ཨེ་ཡི་ཕོ་བྲང་། ཨོཾ་སྭ་སྟི། ཨོཾ་སྭ་སྟི།
རྟེན་གྱི་གཙུག་ལག་ཁང་ལ།།
བྲོ་ཡི་མཆོད་པ་འབུལ་ལོ།། ཨོཾ་སྭ་སྟི།

ཨོཾ་སྭ་སྟི། རྟེན་པ་ལྷ་ཡི་གཙོ་བོ།།
རྒྱལ་བ་ཉི་མའི་གཉེན་གཅིག། ཨོཾ་སྭ་སྟི།
ཨོཾ་སྭ་སྟི། ལོངས་སྤྱོད་རྫོགས་པའི་ཆ་བྱེད།།
ཇོ་བོ་སྲིད་ཞིའི་རྒྱན་གཅིག། ཨོཾ་སྭ་སྟི།
ཨོཾ་སྭ་སྟི། འཕགས་པ་འཇིག་རྟེན་དབང་ཕྱུག།
ལྷ་གཅིག་ནམ་མཁའི་རྒྱལ་པོ།། ཨོཾ་སྭ་སྟི།
ཨོཾ་སྭ་སྟི། བྱིན་རླབས་བླ་མའི་སྙིང་སྒྲུབ།།
རྗེ་འབངས་ཉི་ཤུ་རྩ་ལྔ།། ཨོཾ་སྭ་སྟི། ཨོཾ་སྭ་སྟི།
བདེ་བཤེགས་སྒྲུབ་པ་བཀའ་བརྒྱད།།
ལྷ་ཚོགས་དྲུག་ཅུ་རེ་གཅིག། ཨོཾ་སྭ་སྟི།
ཨོཾ་སྭ་སྟི། བདུད་རྩི་འཆི་མེད་ཚེ་དང་།
ཕ་གཡང་ནོར་གྱི་ལྷ་ཚོགས། ཨོཾ་སྭ་སྟི།
ཨོཾ་སྭ་སྟི། ཚེ་གཅིག་མཆོག་གི་དངོས་གྲུབ།།
གསང་བ་མ་རྒྱུད་རྒྱུད་སྡེ།། ཨོཾ་སྭ་སྟི།
ཨོཾ་སྭ་སྟི། དབང་དྲག་བཀའ་ཡི་དམ་ཅན།།
བྲོ་ཡི་མཆོད་པ་འབུལ་ལོ།། ཨོཾ་སྭ་སྟི།

ཨོཾ་སྭ་སྟི། རྒྱ་གར་འཕགས་པའི་ཡུལ་ནས།།
སངས་རྒྱས་བཀའ་ཡི་ལུང་ཟིན།།
ཨོཾ་སྭ་སྟི། གངས་ལྗོངས་ཆོས་སྲིད་བདག་པོ།།
རྒྱལ་དབང་ཏ་ལའི་བླ་མ།།
ཨོཾ་སྭ་སྟི། མཚན་བཟང་གསེར་གྱི་བཀའ་ལུང་།
འཇིགས་མེད་གདོང་ལྔའི་གད་བརྒྱངས། ཨོཾ་སྭ་སྟི།
ཨོཾ་སྭ་སྟི། ལྷ་དང་བཅས་པའི་འཇིག་རྟེན།།
སྤྱི་བོའི་རྒྱན་དུ་ཕེབས་བྱུང་། ཨོཾ་སྭ་སྟི།
ཨོཾ་སྭ་སྟི། སྐལ་བཟང་ལས་ཀྱི་སྲོག་ཤིང་།
སྐལ་བཟང་ལས་ཀྱི་སྒོ་འབྱེད།། ཨོཾ་སྭ་སྟི།
ཨོཾ་སྭ་སྟི། སྐལ་བཟང་ལས་ཀྱི་ཕན་གྲོགས།།
བསྐལ་བཟང་ལས་ཀྱི་ས་མཁན།། ཨོཾ་སྭ་སྟི།”
ཨོཾ་སྭ་སྟི། སྐལ་བཟང་ལས་ཀྱི་སྦྱིན་བདག།།
བསྐལ་བཟང་ལས་ཀྱི་ཨར་པོ།། ཨོཾ་སྭ་སྟི།
ཨོཾ་སྭ་སྟི། སྐལ་བཟང་འདུས་པ་རྒྱ་མཚོར།།
བྲོ་ཡི་མཆོད་པ་འབུལ་ལོ།།ཨོཾ་སྭ་སྟི།