P E A C E - P O E M S

❝ မိစ္ဆာမြို့သားများ ❞ #ကိုသန်းထွန်း

■ ချွတ်မိရင် ငါ့စားက သွေးသောက်ရမှ
ဘီလူးစီးနေတဲ့ ဓားမှာ ဘီလူးစည်း လူ့စည်း မရှိဘူး ကြည့်၊ ဓားမှာ အသက်ရှိတယ်။ ဓားမှာ ဒေါသရှိတယ်။ဓားမှာ အမုန်းရှိတယ် ဓားမှာ တော်လှန်ရေးတစ်ခုခုတောင် ရှိကောင်း ရှိမယ်။

■ နံရံမှာ သေနတ်တစ်လက်ကို ချိတ်ပြထားမိရင်
တစ်ချိန်မှာ ဒီသေနတ်ကို မင်း ပစ်ပြရတော့မယ်။ လက်ညှိုးလေး ကွေးညှစ်လိုက်ရုံ ပယောဂပူးနေတဲ့ ကျည်ဆန်ဟာ ပစ်ကွင်းဆီ ရန်စွယ်နဲ့ငေါငေါ တိုးဝင်သွားလိမ့်မယ်။ ကျည်ဆန်မှာ မျက်စိရှိတယ်။ ကျည်ဆန်မှာ နားရှိတယ်။ ကျည်ဆန်မှာ SAM 7 လို ကိုယ်ငွေ့ကို အာ ရုံခံနိုင်တဲ့ အသိတရားတောင် ရှိကောင်း ရှိမယ်။

■ လူတစ်ကိုယ်လုံး ဗုံးတွေချည်း
အဲဒီ ဗုံးတွေက မုန်းသူတွေကို သတ်တယ်။ အဲဒီ ဗုံးတွေက မမုန်းသူတွေကိုလည်း သတ်တယ်။ ပြီးတော့ အဲဒီ ဗုံးတွေက ချစ်သူတွေကို သတ်တယ်။ နောက်ဆုံး ကိုယ့်ကိုယ်ကိုယ်တောင် သတ်တယ်။

■ လူဆိုတာ စစ်သွေးကြွ
လူဆိုတာ အကြမ်းဖက်သမား
လူဆိုတာ အသေခံ ဗုံးခွဲသမားတွေချည်း
ဗုံးဆိုတာ လူတွေနဲ့ ချက်ကြိုးချင်း ငြိနေတဲ့ Clone
ဗုံးဆိုတာ ပေါက်ကွဲလိုက်ရင် Clone ဟာ ရောက်ရာအရပ်က Cluster တွေလို တဝုန်းဝုန်း ဖောက်ခွဲပြလိမ့်မယ်။

■ တစ်လောကလုံး အမှန်ကို ကန်းနေတဲ့အခါ
လက်နက်တွေဟာ ပိုပြီး နတ်ကြီးလာကြတယ်။

■ တစ်လောကလုံး အမှန်ကို ထိုင်းနေတဲ့အခါ
လက်နက်တွေဟာ ပိုပြီး ဓာတ်စီးလာကြတယ်။

■ တစ်လောကလုံး အမှန်ကို ဆွံ့အနေတဲ့အခါ
လက်နက်တွေဟာ လျှပ်စီးတဝင်းဝင်းနဲ့ ပိုပြီး သရဲမရဲ စီးလာကြတယ်။

■ သွေးပွက်ပွက် ဆူနေချိန် လက်နက်ဟာ (မျက်လှည့်ပြလိုက်သလို) လက်ထဲကို သွေးရူးသွေးတမ်း ရောက်လာမယ့် ခေတ်ဟာ မဝေးတော့ဘူး။

■ လက်နက်မှာ လောဘရှိတယ်။
■ လက်နက်မှာ မောဟရှိတယ်။
■ လက်နက်မှာ သူ့ကိုယ်ပိုင် ဘုရားနဲ့
သူ့ကိုယ်ပိုင် ဘာသာတရားတစ်ခုခုတောင် ရှိကောင်း ရှိမယ်။

#ဘဝကိုရိုးသားစွာအသက်ဆက်ရှင်သန်နိုင်ပါစေ

#peace​ ✌️ #မနက်ဖြန်တိုင်းမှာအပြုံးနဲ့ဆုံကြမယ်​ 🫰😊