Скачать или смотреть ធម្មយាត្រាសន្តិភាព | Peace Walk | Cambodia | Documentary

“ពិធីធម្មយាត្រាសន្តិភាព ក្នុងរាជធានីភ្នំពេញ អំពាវនាវរក្សាបទឈប់បាញ់ជានិរន្តរ៍ កម្ពុជា-ថៃ ដោះលែងទាហានខ្មែរ ១៨ រូប និងគាំទ្រការខិតខំរបស់ថ្នាក់ដឹកនាំក្នុងការពារសន្តិភាព សុវត្ថិភាព និងស្ថេរភាពប្រទេស”
ពិធីនេះមានការយាងពីសំណាក់សម្តេចព្រះអភិសិរីសុគន្ធាមហាសង្ឃរាជាធិបតីកិត្តិឧទ្ទេសបណ្ឌិត បួរ គ្រី សម្តេចព្រះមហាសង្ឃរាជនៃគណៈធម្មយុត្តិកនិកាយនៃព្រះរាជាណាចក្រកម្ពុជា សម្តេចព្រះមហាសុមេធាធិបតី កិត្តិបណ្ឌិត អំ លីមហេង សម្តេចព្រះសង្ឃនាយកនៃព្រះរាជាណាចក្រកម្ពុជា សម្តេចព្រះពោធិវ័ង្សកិត្តិបណ្ឌិត ណយ ច្រឹក សម្តេចព្រះសង្ឃនាយករងទី១នៃព្រះរាជាណាចក្រកម្ពុជា និងនិមន្តពីសំណាក់សម្តេចព្រះសង្ឃនាយករង សម្តេចព្រះរាជាគណៈ ព្រះមេគណ និងព្រះរាជាគណៈតាមឋានានុក្រម ព្រះមន្ត្រីសង្ឃសរុបចំនួន ២៥៦៩អង្គ ព្រមទាំងមានការអញ្ជើញចូលរួមពីប្រជាពុទ្ធបរិស័ទ ប្រជាពលរដ្ឋក្មេងចាស់ប្រុសស្រីជាច្រើននាក់។
ព្រះសង្ឃដែលនិមន្តមកដង្ហែក្បួនធម្មយាត្រានេះ និមន្តមកពី១៨វត្ត ក្នុងរាជធានីភ្នំពេញ ក្នុងនោះមានវត្តបទុមវតីរាជវរារាម វត្តឧណ្ណាលោម វត្តមហាមន្ត្រី វត្តនួនមណីរាម ហៅវត្តថាន់ វត្តលង្កា វត្តនាគវ័ន វត្តស្ទឹងមានជ័យ វត្តជេដ្ឋាឧត្តម ហៅវត្តគ្រួស វត្តវារិន្ទព្រែកលាប វត្តជម្ពូវ័ន វត្តសារវ័នតេជោ វត្តស្រះចក វត្តទួលទំពូង វត្តព្រះពុទ្ធមានបុណ្យ វត្តកោះ វត្តព្រះពុទ្ធឃោសាចារ្យ វត្តញាណរង្សី និងវត្តចិនដំដែក។
ពិធីធម្មយាត្រាសន្តិភាពនេះបានចាប់ផ្តើមដង្ហែចាប់ពីរមណីយដ្ឋានវប្បធម៌ប្រវត្តិសាស្ត្រវត្តភ្នំ រួចបន្តដង្ហែ ក្បួនធម្មយាត្រានេះ ឆ្ពោះទៅកាន់វិមានឯករាជ្យ។
គោលបំណងសំខាន់ៗចំនួន៣ ដែលប្រារព្ធពិធីធម្មយាត្រានាឱកាសនេះ គឺ៖
សុំបិណ្ឌបាត្រឲ្យមានការគោរពបទឈប់បាញ់ជានិរន្តរ៍រវាងប្រទេសទាំងពីរ កម្ពុជា-ថៃ
សុំបិណ្ឌបាត្រភាគីថៃ ក្នុងនាមជាប្រទេសដែលកាន់ព្រះពុទ្ធសាសនាថេរវាទដូចគ្នា ឲ្យមានការដោះលែង កងទ័ពខ្មែរចំនួន១៨រូប ដែលត្រូវបានចាប់ជាចំណាត់ខ្មាំង
សុំបិណ្ឌបាត្រដល់រាជរដ្ឋាភិបាលនៃប្រទេសទាំងពីរ រក្សាសន្តិភាព ស្ថេរភាពសម្រាប់ប្រជាជាតិនៃប្រទេស ទាំងពីរជានិរន្តរ៍។