Скачать или смотреть ពិធីប្រកាសព្រះសមាសភាពថេរសភានៃព្រះពុទ្ធសាសនា នៃព្រះរាជាណាចក្រកម្ពុជា

ឯកឧត្តម ចាយ បូរិន រដ្ឋមន្ត្រីក្រសួងធម្មការនិងសាសនា អញ្ជើញចូលរួមពិធីប្រកាសអនុក្រឹត្យស្តីពីការកែសម្រួលអនុក្រឹត្យស្តីពីការបង្កើតថេរសភា និងអនុក្រឹត្យស្តីពីការតាំងតែងព្រះសមាសភាពថេរសភា ព្រមទាំងសមាសភាពអគ្គលេខាធិការដ្ឋានថេរសភានៃព្រះពុទ្ធសាសនា នៅព្រះរាជាណាចក្រកម្ពុជា នាពុទ្ធិកសាកលវិទ្យាល័យព្រះសីហនុរាជ នៅសង្កាត់ទន្លេបាសាក់ ខណ្ឌ ចំការមន រាជធានី ភ្នំពេញ ថ្ងៃទី២៣ ខែសីហា ឆ្នាំ២០២៥។

ពិធីនេះមានការ យាង និមន្ត និងអញ្ជើញចូលរួមពីសំណាក់ សម្ដេចព្រះមហាសុមេធាធិបតី កិត្តិបណ្ឌិត អំ លីមហេង សម្ដេចព្រះសង្ឃនាយក សម្តេចព្រះសង្ឃនាយករង សម្តេច ព្រះរាជាគណៈ ព្រះថេរានុត្ថេរៈគ្រប់ព្រះអង្គ ឯកឧត្តម លោកជំទាវ ថា្នក់ដឹកនាំក្រសួងធម្មការនិងសាសនា ។

ឯកឧត្តមរដ្ឋមន្ត្រី មានប្រសាសន៍ថា ការទទួលបានការតែងតាំងជាព្រះប្រធាន ព្រះអនុប្រធាន សមាជិក នៃថេរសភា និងអគ្គលេខាធិការដ្ឋានថេរសភា នៃព្រះពុទ្ធសាសនានៅព្រះរាជាណាចក្រកម្ពុជានាពេលនេះ កើតចេញពីជំនឿទុកចិត្តដ៏ខ្ពង់ខ្ពស់និងប្រកបដោយគតិបណ្ឌិតរបស់ សម្តេអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងសម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា លើព្រះសមត្ថភាពរបស់ សម្ដេច ព្រះរាជាគណៈ ព្រះថេរានុត្ថេរៈគ្រប់ព្រះអង្គក្នុងការបន្តចូលរួមអភិវឌ្ឍលើកកម្ពស់ព្រះពុទ្ធសាសនា អភិរក្សប្រពៃណីនិងសង្គមជាតិ ឱ្យមានការរីកចម្រើនជាបន្តបន្ទាប់។

ឯកឧត្តមបានមានប្រសាសន៍បញ្ជាក់ថា ព្រះសមណស័ក្ដិ និងព្រះតួនាទីដែលទទួលបាននាថ្ងៃនេះ គឺជាសក្ខីភាពមួយបង្ហាញ ឱ្យឃើញច្បាស់ពីព្រះសមត្ថភាព និងសមិទ្ធផលនៃការដឹកនាំវិស័យព្រះពុទ្ធសាសនា នាពេលកន្លងមក របស់ សម្តេច ព្រះរាជាគណៈ ព្រះថេរានុត្ថេរៈគ្រប់ព្រះអង្គ ដែលបានយកអស់ព្រះកាយពល កម្លាំងប្រាជ្ញាស្មារតីប្រកបដោយការលះបង់ និងការទទួលខុសត្រូវខ្ពស់ ក្នុងបុព្វហេតុអភិរក្ស និងអភិវឌ្ឍព្រះពុទ្ធសាសនា ព្រមទាំងការចូលរួម អភិវឌ្ឍសង្គមជាតិទាំងមូល ហើយក៏ជាសហធម្មិកសង្ឃជាន់ខ្ពស់របស់សម្តេចព្រះមហាសង្ឃរាជ និងសម្តេចព្រះសង្ឃនាយក ក្នុងបេសកកម្មជួយអភិបាលកិច្ចសង្ឃ ដោះស្រាយ រម្ងាប់អធិករណ៍ ដែលកើតមានឡើងចំពោះព្រះសង្ឃ នៅទូទាំងព្រះរាជាណាចក្រកម្ពុជា ដោយឈរលើទស្សនៈគ្រប់ជ្រុងជ្រោយ លើមូលដ្ឋាននៃព្រះវិន័យ និងច្បាប់របស់រដ្ឋ ព្រមទាំងទទួលបំពេញភារកិច្ចផ្សេងៗទៀត ដែលសម្តេចព្រះអគ្គមហាសង្ឃរាជ និងសម្តេចព្រះសង្ឃនាយក ទ្រង់តម្រូវឱ្យជួយដោះស្រាយ។

ក្នុងឱកាសនេះដែរ ឯកឧត្តម ចាយ បូរិន ក៏បានបញ្ជាក់អំពីមោទកភាព និងសេចក្តីជ្រះថ្លាយ៉ាងខ្លាំង ពីស្មារតីជាតិនិយម របស់ប្រជាជាតិខ្មែរគ្រប់មជ្ឈដ្ឋាន និងគ្រប់សាសនា ជាពិសេស គណៈសង្ឃទាំងពីរគណៈ ក្រោមព្រះរាជកិច្ចដឹកនាំរបស់ សម្តេចព្រះមហាសង្ឃរាជ សម្តេចព្រះសង្ឃនាយក សម្តេចព្រះសង្ឃនាយករង និងសម្តេច ព្រះមន្ត្រីសង្ឃគ្រប់ៗព្រះអង្គ ដែលបានចូលរួមជាមួយក្រសួងធម្មការនិងសាសនា នាំយកអំណោយ មានគ្រឿងឧបភោគ បរិភោគ និងថវិកាយ៉ាងច្រើន ក្រោមស្មារតីជួយខ្មែរ ខ្មែរតែមួយ គាំទ្រដល់រាជរដ្ឋាភិបាល និងនាំយកទៅឧបត្ថម្ភគាំទ្រលើកទឹកចិត្តដល់កងកម្លាំងជួរមុខកម្ពុជានាពេលកន្លងមក ដូចប្រសាសន៍ សម្ដេចធិបតី លោកបានបានលើកឡើងថា “ខ្មែរស្រឡាញ់ខ្មែរ ខ្មែរជួយខ្មែរ ខ្មែររួបរួម ខ្មែរខ្លាំង ខ្មែរឈ្នះ គ្មានកម្លាំងអ្វីដែលខ្លាំងជាងកម្លាំងនៃការសាមគ្គីឯកភាពជាតិមួយនោះទេ” ត្រង់ចំណុចនេះ ពិតជាស្របទៅពុទ្ធភាសិតដែលទ្រង់សម្តែងថា សាគ្គី សមគ្គានំ តបោ សុខោ «សាមគ្គីភាព តែងនាំមកនូវសេចក្តីសុខដ៏ក្រៃលែង» ៕