Lənkəran mətbəxinin xüsusi yeməyi olan ördək çölməsi

Respublikamızın bölgələrinin özünəməxsus yeməkləri olduğu kimi, hər mövsümün də ayrıca süfrə nemətləri olur. Məsələn elə yeməklər var ki, onlar məhz soyuq aylarda xüsusən qışda yeyilir. Bu cür spesifik yeməklərdən biri də Cənub bölgəsinin sevilən yeməklərindən olan çöl ördəyindən hazırlanan çölməkdir.

Ördək çölməsi bölgədə yalnız payız-qış fəslində hazırlanır. Kalorisi çox olduğu üçün və ördəyin məhz bu mövsümdə yeyilməsi səbəbindən demək olar əksər evlərin süfrələrində bu yeməyə rast gəlinir. Çölməyin hazırlanması qaydasına gəldikdə isə...

Aşpaz Zaur Qurbanov: “Ördəyin 5-6 növü var. Çölmək əsasən sarı ayaq çöl ördəyindən hazırlanır. Çünki bu növ ördək dadına görə digər növlərdən daha üstün sayılır.”

Təmizlənmiş ördəyi daha da dada gətirmək üçün turşu və ədviyyatlardan istifadə olunur. Bundan sonra isə təxminən 15-20 dəq gözləmək lazımdır ki, ördək daha ləzzətli dad alsın. Sonra isə cənub bölgəsinə xas qoz və soğandan hazırlanmış ləvəngi ördəyin qarın boşluğuna doldurulur. Sonda isə ləvəngi dolu ördəklər isti su olan qazana qoyulur.

Aşpaz Zaur Qurbanov: “Ördək suda itmək şərti ilə qazan su ilə doldurulur. 1 saat-1 saat 20 dəq qaynadıldıqdan sonra hazır olur.”

Bu yeməyi noyabrdan başlayaraq mart ayına kimi hər bir lənkəranlının süfrəsində görmək olar.