Todko Samson- Өнгөрсөн рүү буцахсан...

Өнгөрсөн рүү буцахсан
Өөр дээрээ очихсон
Өчнөөн их боломжийн
Өнгийг нь ч сөхөөгүйгээ хэлэхсэн

Харамсал дандаа сүүлд нь ирдгийг
Хагацал гэдэг төгсгөл болохыг
Хийгээгүй үйл
Хэлээгүй үг
Хайрлаагүй цаг бүрийнхээ төлөө
Хатуу зэмийн учиг өөртөө мэдүүлэхсэн

Ядаж...ядаж өчигдөр рүү буцахсан
Явсан хүн
Ирсэн сэтгэл хоёрын дунд
Ямар их зай байсныг харуулахсан
Наран, саранд юүлэгдэх нэгэн шөнийн дараа
Намайг юу хүлээж байсныг дуулгахсан

Балга балгаар биш
Булаг булагаар урсгасан цаг хугацаанаасаа
Буцаагаад дуслыг ч болох нээ авахсан
Тэвэр тэврээр биш
Тэрэг тэргээр асгасан алдаа эндэгдэлээсээ
Тэвнийн дайтай ганцыг ч болох нээ
Зөв рүү зөөхсөн

Өнгөрсөн рүү буцахсан
Өөрийгөө нэг алгадахсан
Өрөвдөж нэг аргадахсан
Бузар ертөнцөд
Бусдад
Бүдрэх чулуу нь болж явснаас
Буцаад эхийнхээ хэвлийд шингэхсэн

Ирээдүйгээс ирэхсэн
Эхэлж байгаа энэ цагийн
Эцэст нь юу байгааг үзүүлэхсэн
Элчилгүй уудам он жилүүдийн төгсгөлд ч
Энэ бие минь одоо хийгээд өнгөрсөн цагт л оршино
Ирээдүй харин мөнх хойшилно

Өнгөрсөн рүү буцахсан
Өөр дээрээ очихсон...Todko Samson