Trailer Amu sira hosi Ataúru - Padres de Ataúro

Ataúru, illa ki’ikoan ida iha Timor-Leste, iha nasaun ki’ik ida iha sudeste aziátiku. Illa ne’e uluk Portugal mak kolonializa no depois Indonézia okupa durante tinan 24, liutiha terus no susar oioin, iha tinan 2002 nasaun ne’e konsege hetan ninia ukun-rasik an. Sosiedade ida ne’ebé harii ho memória terus tanba funu no trauma maka’as, fanu ema aten-boot na’in rua ne’ebé uluk serbisu maka’as tinan 40 ho komunidade kiak sira iha Brasil, la’o hale’u mundu hodi inspira no hahii ema sira, hodi luta defende ema nia dignidade.
Ida-ne’e mak Chico ho Luis sira-nia istória. Sira moris iha Itália, maibé sira hadomi tebes Brasil, sira-na’in rua ne’e mak Padre sira hosi Ataúru!
Sira hala’o misaun greja nian tuir Amu Papa Francisco nia rekomendasaun, hodi-vizita família sira ne’ebé hela dookliu hosi vila nomós insentiva sira hodi serbisu hamutuk no padre sira konsege muda ema rihun nia moris; asegura ema barak nia saúde liuhosi treinamentu uza ekipamentu seguransa iha fatin sira ne’ebé ema barak sai matan aat, diuk no balun to’o mate tanba de’it buka ai-han iha tasi okos.
Sira kria klibur Koperativa Feto ida hodi halo Boneka Ataúro no halo produtu barak tebes ho kualidade aas hodi haruka sai ba mundu tomak.
Iha komunidade ida-ne’ebé iha tempu naruk nia laran moris lahó bee-moos no saneamentu báziku, família atus mak hetan ona benefísiu liuhosi sistema distribuisaun no hariis-fatin iha sira-nia uma.
Sira loke restaurante ida, pouzada ida no investe iha formasaun ba mão de obra lokál ho objetivu hodi fó serbisu ba ema hodi manán osan iha fatin ida ne’ebé mukit, maibé riku tebes iha biodiversidade tasi nian.
Mai ita akompaña hamutuk bénsaun no lansamentu ró. Festa Dada Ró.
Nomós asiste hamutuk Festa São Pedro, Festa Peskadór nian.
Sira sempre bá fatin ne’ebé povu iha. Atu hahii tradisaun lokál, padre sira lori evanjellu besik liu ba ema no hatama kultura populár ba igreja.
Padre sira hosi Ataúru.
Filme inspiradór ida. Ne’e momentu espesiál ida hodi selebra ita-nia fiar iha moris. Ita-nia fiar ba justisa. Ne’e nu’udar testemuñu ida ho solidariedade maka’as ho ema hotu, liu-liu ba sira-ne’ebé kiak liu no ema haluha taumatan iha ita-nia sosiedade.