Скачать или смотреть လူငယ်များစစ်မှုထမ်းရန် ပအို၀်းပြည်သူ့စစ်(PNO/PNA ) ပိုမိုဖိအားပေးနေ

လူငယ်များစစ်မှုထမ်းရန် ပအို၀်းပြည်သူ့စစ်(PNO/PNA ) ပိုမိုဖိအားပေးနေ
--------------------
စစ်တပ်လက်အောက်ခံ ပအို၀်းပြည်သူ့စစ်(PNO/ PNA) ရဲ့ စစ်သားစုဆောင်းမှုကြောင့် ပအို၀်းလူငယ်တွေ ပြည်ပ ထွက်ခွာမှု များပြားလာတဲ့နောက် စစ်မှုထမ်းနိုင်တဲ့ လူငယ်တွေနဲ့ မိသားစုဝင်တွေ အပေါ် PNO/PNA က တင်းကြပ်မှုတွေ ပိုလုပ်လာတယ်လို့ ပအို၀်းဒေသခံတွေ က ဆိုပါတယ်။

ရှမ်းပြည်နယ်တောင်ပိုင်းမှာ အခြေစိုက်တဲ့ ပအိုဝ်းလက်နက်ကိုင်တပ် PNO/PNA ဟာ စစ်တပ်ကအာဏာသိမ်းခဲ့တဲ့ ၂၀၂၁ ဖေဖော်ဝါရီနောက်ပိုင်းမှာ အင်အားပိုမိုကြီးထွားလာပါတယ်။

တခြား တိုင်းရင်းသားလက်နက်ကိုင်တပ်အများစုက အာဏာသိမ်းစစ်တပ်ကို ဆန့်ကျင်ဖို့ အင်အားစုဆောင်းကြပေမယ့် ပအိုဝ်းအမျိုးသားတပ် (PNO/PNA) က တော့ စစ်ကောင်စီကို ကာကွယ်ဖို့ လူသစ်စုနေတာဖြစ်ပြီး ၂၀၂၄ခုနှစ်ထဲမှာ ထောင်နဲ့ချီတဲ့ တပ်သားသစ်တွေကို ထုတ်ပြခဲ့ဖူးပါတယ်။

လက်ရှိမှာလဲ ပအို၀်းပြည်သူ့စစ် ခေါင်းဆောင်တွေနဲ့ ကျေးရွာအုပ်ချုပ်ရေးပိုင်းတာဝန်ရှိသူတွေ က ကျေးရွာတွေအထိ ကွင်းဆင်းစည်းရုံးပြီး ဖိအားမျိုးစုံ ပေးနေတဲ့အတွက် ဆန္ဒမပါဘဲ စစ်မှုထမ်းဖို့ သွားနေရတယ်လို့ ရှမ်းပြည်တောင်ပိုင်း၊ ဟိုပုံးမြို့နယ် ဒေသခံတစ်ဦးက ပြောပါတယ်။

စစ်သားစုဆောင်းမှုကြောင့် ထိုင်း နဲ့ မလေးရှားနိုင်ငံတွေကို တိမ်းရှောင်နေရတဲ့ ပအို၀်းလူငယ် အရေအတွက် တစ်သောင်းဝန်းကျင် ရှိလာတယ်လို့ အရပ်သားတွေ လူ့အခွင့်အရေး ချိုးဖောက်ခံရမှုအပေါ် စောင့်ကြည့်မှတ်တမ်းတင်နေတဲ့ ပအို၀်းလူငယ် အစည်း အရုံး (PYO)က ဆိုပါတယ်။

အသက် ၁၈ နှစ်ကနေ ၄၅ နှစ်အတွင်း အမျိုးသားတွေ စစ်မှုထမ်းဖို့ မလာရင် ကျန်ခဲ့တဲ့ မိသားစုကို PNO/PNA က ဖိအားပို ပေးလာတာကြောင့် မိသားစုအလိုက် နေရပ် စွန့်ခွာရသူတွေလည်း ရှိနေတယ်လို့ ပအို၀်းလူငယ်အစည်းအရုံး(PYO) တာဝန်ရှိသူ လီလီကဆိုပါတယ်။

PNO/PNA ဆီမှာ စစ်မှုထမ်းရင် စစ်ကောင်စီရဲ့ စစ်မှုထမ်း ကင်းလွတ်ခွင့်ရမယ်လို့ စည်းရုံး ခံခဲ့ရသူတွေဟာ မြေပြင်မှာတော့ ရှေ့တန်းပို့ခံနေရပြီး လူငယ်အများစု ဟာ စစ်မှုထမ်း ရှောင်ရှားလိုကြတယ်လို့ ဒေသခံတွေက ပြောကြပါတယ်။

PNO/PNA ပအိုးဝ်လက်နက်ကိုင်တပ်အတွက် ပအို၀်းတိုင်းရင်းသားတွေက တစ်အိမ်ကို လစဉ် ကျပ်နှစ်သောင်း ထောက်ပံ့ကြရပြီး ပအို၀်းမဟုတ်တဲ့ ဒေသခံတွေက စီးပွားရေးလုပ်ငန်း အမျိုးအစားလိုက် မြန်မာကျပ်ငွေ ငါးသောင်း နဲ့ တစ်သိန်းကစပြီး ပေးနေရတယ်လို့ ကိုယ်တိုင်ကြုံတွေ့နေသူတွေက ပြောပါတယ်။

စစ်သားစုဆောင်းခံရသူတွေကို ဆီဆိုင်မြို့နယ်က ဆိုက်ခေါင်ရွာအနီး က အောင်ဆုဗွေ PNO ပြည်သူ့စစ်စခန်းမှာ အများဆုံး သင်တန်းပေးလေ့ရှိပြီး သင်တန်းကာလ ၁၀ ရက်ကနေ တစ်လ အထိ ကြာလေ့ရှိတယ်လို့ ဒေသခံတွေရဲ့ ပြောဆိုမှုတွေအရ သိရပါတယ်။

လူသစ်တွေရဲ့ သင်တန်းဆင်းတဲ့ ရုပ်သံတွေကို PNO ပအိုဝ်း ပြည်သူ့စစ် ရဲ့ ဝါဒ ဖြန့်ဖေ့စ်ဘုတ် စာမျက်နှာမှာ မကြာခဏ ထုတ်ပြန်လေ့ရှိပါတယ်။ ရက်တိုသင်တန်းပေးပြီး ရှေ့တန်းပို့ခံရတဲ့ လူငယ်တွေ သေဆုံးမှုရှိတယ်လို့ ပအို၀်းလူငယ်အစည်းအရုံး တာဝန်ရှိသူ လီလီက ပြောပါတယ်။

ကျော်ဇင်ဝင်း၊ မြတ်ကြီး/Myanmar Now