Скачать или смотреть الدواسر لاد زايد كلمات محمد بن سعود الودعاني

هبّ نسناس الهجوس اللي عوايده الفرايد
و إستوا البرّاق للشاعر و قال الليل ليله

وأمطرت سحْب الجزاله وإبتدا بدع القصايد
و إنتحى للمدح سيلِن يروي الارض المحيله

إيه انا شاعر حماوي وافتخر و العمر بايد
شاعرِن ما ياقف لربعه حياته ويش هي له؟

إترك اللي شعرهم فـ الفاتنه .. و أم القلايد
وإترك المتذوّقين لشعـر قيس و حبّ ليلَـهْ

كل مشروهن على من لا نطق بالحق عايد
ما صِدق من قال بإن الغاية تبرّر وسيلة !

جعل راسن يمدح الهافين يِدفن باللحايد
وراسن يذمّ الرجال الطيّبين الله يزيله

نمدح الطيّب ولا نرجي ورى مدحه فوايد
والردّي لا شافنا ما عادت عظامه تشيله

ما حقرنا الا حقير وما مدحنا الا ولايد
وإن فزعنا سِعد عين الضايق اللي نعتزي له

وإن طرا طاري الفخر والعز غنيّنا الجدايد
روسنا يقدح سِطرها بالفخر قدح الفتيله

نفتخر بالطيّب اللي يطّبخ راسه وقايد
و نتحزّم به ليا جات الكبيره و الثقيله

يابو بندر وانت والله ذخرنا وقت الشدايد
ذخرنا اللي تعتزي به فالوعد كل القبيله

إيه يا عمي و لك فـ الطايله قسم و عوايد
لو مدحتك بـ ألف بيت أشوفها بحقك قليله

المراجل تبغي اللي بالفعل ناره تزايد
و أنت تشعمها بطيب الفعل واليمنى الجزيله

إسم عبدالله إبن سيف مْعروفن فـ البدايد
صيت إبن هتلان يبطي ماحدن ياتي مثيله

شايبن راسه صليب و منهجه عسرن و كايد
لاعتزى شال الثقال ولا صهل يفرُق صهيله

حي والله ذا الحجاج و حي والله ذا البنايد
الشجاعه والكرم والعرف والحكمه دليله

كلنا نفخر به و ندعي عسى سنينه مدايد
وإن زهمنا ناتي سيوفن بكفّينه صقيله

والله إنّـا لا وقفنا .. ما نِذلّ و لا نحايـد
نِشرق حلوق الرّجال و نفرِح اللي نحتمي له

من رواشدةِ ن لا جات جموعها يوم الوعايد
مثل سيلن من تنطّح له على دربه يشيله

لاد راشد و آل راشد مالنـا .. ضد و ندايـد
نعشق الفعل الصعيب ونشفي الكبد العليله

في كنفنا يامن الخايف من جموع الضدايد
من زبنا والله إنّا نحتميه و نرتكي له

فعلنا ماهوب يِحصى فالكتب ولّا الجرايد
يركع المجد لرواشدة الفخر في كل ليله

ما ضرينا بالضعافه و الرخامه و النقايـد ..
ننطح كبار المصايب لعنبو النفس الذليله

لاد ودعان الكرام وسلمنا في الوقت سايد
سلمنا غير السلوم و روسنا فوق المخيله

ايه حنا اهل الثمان اللي على حق و شهايد
الوداعين الطغاه اهل المواقيف المِهيله

من يعادينا فـ يبشر بالمذله و النكايد
لا غضبنا ضربنا يفرق خليلن من خليله

للرفيق وللقصيـر و للدخيل إنّـا سنايـد
من تعرّض واحدِ ن منهم لعنّـا سلسبيله

ولا ذكرت إني من اهل الطايله صبيان زايد
افتخر واشوش واطرب وأعتلي راس الطويله

الدواسر لاد زايد و الدواسر لاد زايد
عزوةِ ن ماهي تحبّ إلا الفعول المستحيله

سلمنا وسم العصا يوم الحرايب والزهايـد
من زبن ناسم عصـاه ولآحدِن يقدر يجي له

إيه حنا اهل السلوم المعجزه واهل العوايد
للخوي درعن ينومس والعدو نارٍن غليله

ياهجوسي بعد ماجبت القوافي والشرايـد
قل لمن هو قد تهقوا فوق هقواته نجي له

محمد بن سعود الودعاني