#APATV #BNA #108A #108B #avtobus #marşrut #Azadlıq #sərnişinlər
2018-ci il, 3 mart tarixində BNA-nın rəsmi saytında yeni elan dərc olunur. Elanın məzmunu 3 marşrut xəttinin dəyişdirilməsi ilə bağlı idi; “59”, “108” və “159”...
Lakin biz hələlik “59” və “159” nömrəli marşrut avtobuslarını kənarda saxlayıb “108” müntəzəm marşrut xətti üzrə edilən dəyişikliyin məzmununa nəzər salırıq. Problemə giriş üçün həmin mətndən bir hissəni oxuyuram:
“108 nömrəli marşrut xətti ləğv edilərək fəaliyyətini “108 A” və “108 B” olmaqla davam etdirəcək. Dəyişikliyə əsasən, “108 A” nömrəli müntəzəm marşrutun başlanğıc dayanacaq məntəqəsi Görədil qəsəbəsi, son dayanacaq məntəqəsi “Azadlıq” metrostansiyası olmaqla, “108 B” nömrəli müntəzəm marşrutun başlanğıc dayanacaq məntəqəsi Fatmayı qəsəbəsi, son dayanacaq məntəqəsi “Azadlıq” metrostansiyası olmaqla müəyyən edilib. Dəyişiklik nəticəsində Fatmayı bağları və Mehdiabad qəsəbə sakinlərinin “Azadlıq prospekti” metrostansiyasına daşınmasının fasiləsizliyi və təhlükəsizliyi təmin ediləcək”.
Axırıncı cümləyə təkrarən baxaq; “Dəyişiklik nəticəsində Fatmayı bağları (Çimərlik) və Mehdiabad qəsəbə sakinlərinin “Azadlıq prospekti” metrostansiyasına daşınmasının fasiləsizliyi və təhlükəsizliyi təmin ediləcək”.
Bəli, bəli. Məhz fasiləsizlik və təhlükəsizlik. Bu, “Metallom”luq ölüm avtobuslarının sərnişinləri lazımi ünvana hansı risklə aparıb çıxarmağı bir yana qalsın. Hələ gəlin, görək BNA-nın haqqında hövüllənə-hövüllənə danışdığı ironik fasiləsizlik əslində necə təmin olunur?
Sorğuya başlamazdan öncə dayanacaqda gözləyən bir neçə sakinə yaxınlaşıb avtobusun nə vaxt gələcəyini öyrənməyə çalışdıq ki, bəlkə daxil olan şikayətlər 3-5 nəfərin narazılığından başqa bir şey deyil? Ancaq bu xala sən demə, elə, bizi gözləyirmiş. Mikrofonu görən kimi başladı, nə başladı...
Gərək Allahın haqqı ilə danışasan. O qədər narazı sərnişinin içində bircə nəfər də tapılmadı, desin ki, gecikmənin səbəbi sürücü özbaşınalığı, ya laqeydliyidir. Di gəl, sürücülərdən tut, hətta dispetçerin yükünü də çiynində daşıyan yol polisinə qədər hamı durumun nə yerdə olduğunu yaxşı bilir: “Hazırda 6 dənədir. Avtobusların sayı ilə bağlıdır. Çatmır. Çünki avtobuslar xarabdır, nasazdır. Goradil-Azadlıq metrosu, Mehdiabad, Fatmayi...”
Problemlə bağlı BNA-nın mətbuat xidməti ilə əlaqə saxlamağa çalışırıq. Birinci zəng, ikincisi, üçüncüsü, dördüncüsü... Yox, cavab gəlmir. Keçirik “votsapa”. Mesajımız oxunar-oxunmaz məsələ ilə bağlı açıqlama olacağı bildirilir. Bir neçə saatdan sonra isə fərqli cavab alırıq. Şikayət edən vətəndaşlarla görüş olacaq. Deyəsən APA TV-nin şikayətindən sonra BNA-nın yadına vətəndaşların narazı olması düşüb. Çünki edilən şikayətlər onu deməyə əsas verir ki, BNA vətəndaş probleminin dərdinə qalan deyil. Bir neçə saatdan sonra nəhayət qurumun mətbuat xidmətinin rəhbəri Mais Ağayev gözlədiyimiz açıqlamanı verir.
Doğrudur, Mais Ağayevin sözlərindən ilk dəfədir ki, öləzimiş ümid işığı gəlirdi. Lakin biz yenə də bəhanə yeri buraxmamaq üçün problemə alternativ çıxış yolları axtarmaq qərarına gəldik. Nəqliyyat üzrə ekspert Rauf Ağamirzəyevdən aldığımız müsahibədən sonra isə qərarımızda yanılmadığımıza əmin olduq. Bakı nəqliyyatı görünür, agentlik müstəvisini çoxdan aşmağa başlayıb. Çünki əgər bir agentlik hələ müsabiqədə düzgün MMC seçimi edə bilmirsə, bu da azmış kimi, sonralar həmin sahibkara söz keçirmək üçün yüzlərlə vətəndaşın öz ayağı ilə BNA-ya gəlməsini gözləyirsə, bax, mən deyiləm, sənsən. Nə deyəsən beləsinə?
Görünən odur ki, BNA-dan bizə bir xeyir gəlməyəcək. Qoy elə ən yaxşısı Allah yolumuzu açsın.
✅ Rəsmi saytımız: https://apa.tv
✅ Rəsmi facebook səhifəmiz: / tvapaxeber
✅ Rəsmi instagram səhifəmiz: / apatvresmi
✅ Rəsmi twitter səhifəmiz: / apatvofficial
✅ Rəsmi teleqram səhifəmiz: https://t.me/apa_tv
✅ Rəsmi youtube kanalımız: https://www.youtube.com/APAGROUPOffic...
Copyright © APA TV
Информация по комментариям в разработке