مبارك الحجيلان - قفلت بابك يالمجامل وعزمت

قفلت بابك يالمجامل وعزمت
ولاخير في شخص يرد بكلامه
على كثر ماكنت وافي وقدمت
قاموا يحطوبي عيوب وملامه
بموت .. ماوالله لطيبي تندمت
نادم على المعروف بأهل الرخامه
وميت من الخذلان باللي تعشمت
ومستغرب لطعنة خوي واتهامه
ياما انظلمت .. ولابيوم تظلمت
العمر يمضي .. وآخر العمر خامه
وعرفت وين الفرق كاني تحيزمت
رفيق عز .. ولا رفيق الندامه
وعرفت كيف الصبر يومي تألمت
وكيف اني اهزم ضيقتي فأبتسامه
ماقمت افكر بالبشر واعمل بصمت
ولااشوف عدواني .. أشوف الزعامه
عاهدت نفسي مااتراجع وحرمت
ماألتفت صوب الردي .. والهلامه
وابشرك ياللي تبي طيحتي قمت
والله لاموت .. ولا تموت الكرامه
تركت لك كل الحكي ،، ماتكلمت
صمتي يبي يهزمك شر انهزامه
ببقا انا مثلي انا ،، ماتحطمت ..
بعامل الصادق بصدق وشهامه
والوافي لامنه طلب شي تممت
لو احذف عقالي واحذف العمامه
واحقر رفيق اللي معه لو تخاصمت
يبوح باسرارك .. ويعلن خصامه
و أوفا رفيق اللي ليا شافك اقدمت
يقدم .. ومتساوي مقامك مقامه