ගිනි අවි ඇල්ලූ එස්.ටී.එෆ් මෙහෙයුම

මීගමුව කුරන දී එස්.ටී.එෆ් ප‍්‍රහාරයෙන් බරපතල තුවාල ලැබූ පුද්ගලයින් දෙදෙනාගෙන් එක් අයෙක් ඊයේ රාත‍්‍රීයේ කොළඹ ජාතික රෝහලට මාරුකර යැවුණා. ඔහු පාතාල නායක මධුෂ්ගේ ගෝලයෙක් බවටයි මේ වන විට අනාවරණය වී ඇත්තේ. වෑන් රථයේ ගමන්කල ආයුධ සන්නද්ධ පුද්ගලයින් විශේෂ කාර්ය බලකාය මෙල්ලකල ආකාරය පුද්ගලයෙකු තම ජංගම දුරකථනයෙන් පටිගත කර තිබෙනවා.

ආයුධ සන්නද්ධ කණ්ඩායමක් මීගමුව ප‍්‍රදේශයේ කිසියම් අපරාධයක් සිදු කිරිමට සුදානම් වන බවට විශේෂ කාර්ය බලකායට ලැබුණු තොරතුරක් මත ජීප් රථයකින් හා වෑන් රථයකින් ඔවුන් සොයා මෙහෙයුමක් ක‍්‍රියාත්මක වුණා ඒ අනුව මීගමුව - හලාවත පාරේ කුරන ප‍්‍රදේශයේදී සැක කටයුතු වෑන් රථයක ගමන් ගන්නා පිරිසක් පොලිස් විශේෂ කාර්ය බලකාය විසින් නිරීක්ෂණය කර තිබුණා.

එය අණ නොතකා ධාවනය කිරීටද අත්සහ දැරීමත් සමඟ විශේෂ කාර්යය බලකා නිලධාරින් ගමන්ගත් ජීප් රථය අදාල වෑන් රථය හරස් කර එය නැවතීමට උත්සහ දැරුවා. ඒ අවස්ථාවේ වෑන් රථයේ සිටි සන්නද්ධ පිරිස වෙඩි තබා ඇති අතර වහා කි‍්‍රයාත්මක වූ විශේෂ කාර්ය බලකා නිළධාරීන් වෑන් රථය වටලා ඔවුන් අත්අඩංගුවට ගැනීමට කටයුතු කළා.

ඒ ආසන්නයේ සිටි පුද්ගලයෙකු විශේෂ කාර්ය බලකා කි‍්‍රයාන්විතය තම ජංගම දුරකථනයෙන් වීඩියෝ කර තිබුණේ මේ ආකාරයෙන්. විශේෂ කාර්ය බලකා නිළධාරීන් ක්ෂණිකව කොල්ලකරුවන් අත්අඩංගුවට ගැනීමට කටයුතු කළ ආකාරයද මෙම දර්ශනවල දැක්වෙනවා.

වෙඩි ප‍්‍රහාරයත් සමග පළායාමට උත්සාහ දැරූ කොල්ලකරුවන් දෙදෙනෙකු විශේෂ කාර්ය බලකා නිළධාරීන් අත්අඩංගුවට ගනු ලැබුවා. මෙහිදී වෑන් රථයේ ගමන්කල සන්නද්ධ පුද්ගලයින් දෙදෙනෙකුට වෙඩි වැදී තිබුණා. ඔවුන් මීගමුව රෝහලට ඇතුළත් කිරීමෙන් අනතුරුව උතුරු කොළඹ ශික්ෂණ රෝහලට මාරුකර යැවුණා. ඉන් බරපතල තත්ත්වයේ පසුවන එක් පුද්ගලයෙකු ඊයේ රාත‍්‍රී 10 ට පමණ රාගමින් කොළඹ ජාතික රෝහලට මාරුකර යවා තිබෙනවා. ඔහු සීදුව ප‍්‍රදේශයේ පදිංචිකරුවෙකු වන වජිර කුමාර නැමති 41 හැවිරිදි පුද්ගලයෙක්.

මෙම පුද්ගලයාගේ හිස ප‍්‍රදේශයට වෙඩි ප‍්‍රහාරය එල්ල වී ඇති අතර ඔහුගේ තත්ත්වය ඉතා බරපතල බවයි සඳහන් වන්නේ.වෙඩි ප‍්‍රහාරයට ලක්ව රාගම රෝහලේ ප‍්‍රතිකාර ලබන අනෙක් පුද්ගලයා වන්නේ කිරිවන්තුඩුව ප‍්‍රදේශයේ පදිංචි චාමික කුමාර ජයතුංග නැමති 28 හැවිරිදි තරුණයෙක්. ඔහුගේ පාදයට වෙඩි ප‍්‍රහාර එල්ල වී ඇති බවයි පැවසෙන්නේ.

මේ වන විට සිදුකල පොලිස් පරීක්ෂණ වලදී අනාවරණය වි ඇත්තේ මෙම පුද්ගලයින් පාතාල නායකයෙකු වන මධූෂ්ගේ ගෝලයින් බවයි. කළුතර බන්ධනාගාර බස් රථයකට වෙඩි තබා සමයං ඇතුළු පුද්ගලයින් ඝාතනය කිරීම මෙන්ම මත්ද්‍රව්‍ය නාශක කාර්යාංශයේ නිළධාරීන් ඉලක්ක කර පිළියන්දල සිදුවූ වෙඩි තැබීම ද මධූෂ්ගේ සැලසුම් මත සිදුවූ ප‍්‍රහාරයක්. කෙසේ වෙතත් මෙම වෙඩි හුවමාරුවේදී පොලිස් විශේෂ කාර්ය බලකායේ කිසිවෙකුටත් තුවාල සිදුවූයේ නැහැ.

මෙහිදී විශේෂ කාර්ය බලකායේ අත්අඩංගුවට පත් වූයේ ජනක අරුණ නැමති තෙල්දෙණිය ප‍්‍රදේශයේ පදිංචි හිටපු නාවික සෙබළෙක් හා චරිත් මධුෂංක නැමති නුවරඑළිය ප‍්‍රදේශයේ පදිංචි පුද්ගලයෙක් බවටයි වාර්තා වන්නේ. ආයුධ සන්නද්ධ පුද්ගලයින් ගමන්ගත් වෑන් රථයේ තිබී ටී 56 ගිනි අවි දෙකක්, පිස්තෝලයක් සහ වාහන අංක තහඩු 7 ක් ද පොලිස් භාරයට ගෙන තිබෙනවා.