Скачать или смотреть Partimentu di Shinishi: Señal di penitensia - Djarason di Shinishi - 18 di febrüari 2026

Bendishon di Shinishi i partimentu di Shinishi, durante Partimentu di Santa Komunion na Selebrashon di Santa Eukaristia, riba Djarason di Shinishi, presidí pa Rev. Oscar Cuellar Renteria, selebrá na Parokia La Birgen del Carmen, Groot Kwartier, Kòrsòu - 18 di febrüari 2026

Shinishi – Señal di Penitensia – Kombertí i Kere den Evangelio:

Awe e Temporada di Kuaresma a Kuminsá. E ta dura 40 dia. Nos ta topa e number 40 hopi bia den Beibel i hopi bia e ta nifiká un tempu di nesesidat i prueba. Tempu di deluvio awaseru a yobe 40 dia i 40 anochi. 40 aña largu e hudiunan a pasa den desierto te ora nan a logra e Tera ku Dios a primintí nan. Moises a keda 40 dia i 40 nochi riba Seru di Sinai promé ku ela risibí Lei di Dios. Hesus tambe a pasa 40 dia i 40 nochi den desierto pa prepará su mes pa su tarea komo Mesias. Asina Iglesia ke prepará nos 40 dia largu promé ku nos selebrá Morto i Resurekshon di Hesus.
Durante e dianan aki nos ke hiba un bida sobrio ku yudansa di Dios. Nos ke trata na kuminsá un bida nobo kompletamente na Su sirbishi i den sirbishi di nos rumannan.
Nos ke hala sera lasonan di Amor pa Kristu i demostrá ku nos ta sinti nos uní ku ne den su sufrimentu i morto. Durante 40 dia nos ke limitá eksigensia di nos kurpa. Nos ke parti loke nos ta i loke nos tin ku esnan ku no tin, pasobra limosna ta kubri multitut di piká, skuchando Palabra di Dios i resando ku mas fervor.
Esun ku asina ta pasa tempu di Kuaresma lo resusitá huntu ku Kristu riba dia di Pasku i biba mas felis sirbiendo Dios i su próhimo.

Shinishi ta Señal di penitensia. Señor, Bo ta duna nos pordon si nos ta humiyá nos mes.
Bo ta skucha nos den Bo Miserikòrdia si nos ta arepentí. Humildemente nos ta rekonosé ku nos ta debil i nos sa ku nos ta kai na bo agrado si nos ke drecha nos falta i pikánan.
Den Bo Bondat, skucha nos orashon, i basha Bo grasia i bendishon riba Bo sirbidónan ku a hunta ku shinishi.
Duna nos pas e Kuaresma aki di tal manera ku nos por kumpli ku loke e Tempu aki di Kuaresma ta pidi nos, i asina nos por logra selebrá ku un kurason limpi e Misterio di Pasku di Bo Yu, Kende ta biba i reina, den tur siglo di siglonan, Amèn.